ސަރުކާރުގެ ތަރުޖަމާނުކަމަށް އައްޔަނު ކުރި މުހައްމަދު ޝަހީބު މަގާމުން ވަކިކޮށް ފޮރިން މިނިސްޓްރީގެ ސްޓޭޓް މިނިސްޓަރުކަމަށް އައްޔަނުކޮށްފި އެވެ.
ޝަހީބު ވަކި ކުރިކަން އަދި މިހާތަނަށް ރަސްމީ ގޮތުން ކަށަވަރުކޮށް ނުދިން ނަމަވެސް ރައީސުލްޖުމްހޫރިއްޔާގެ އޮފީހުގެ ވެބްސައިޓުން ފެންނަ ގޮތުގައި އޭނާއަކީ މިހާރު ސްޓޭޓް މިނިސްޓަރެކެވެ. އަދި ތަރުޖަމާނަށް ހާއްސަ ކުރާ އެކްސް އެކައުންޓުގައި އޭނާގެ، ފޮޓޯއާއި ނަމެއް ވެސް މިހާރު ނެތެވެ.
ސަރުކާރު އުފެދުމަށް ފަހު ދުވަސްތަކެއް ފަހުން، ޑިސެމްބަރު މަހުގެ 13 ގައި ޝަހީބު އެ މަގާމަށް އައްޔަނު ކުރުމަށް ފަހު މަހެއް ނުވަނީސް އޭނާ އެ މަގާމުން ވަކި ކުރީ ކޮން ސަބަބަކާއި ހުރެކަން ސާފެއް ނޫނެވެ. އެކަމަކު ކުރިން ބްރޯޑްކާސްޓިން ކޮމިޝަނުގެ ރައީސްކަން ވެސް ކުރި ޝަހީބު ބައިވެރިވެ ބޭއްވި ތިން ނޫސްވެރިންގެ ބައްދަލުވުމުގައި ވެސް އޭނާގެ ފަރާތުން އެދެވޭ ޖަވާބުތައް ނުލިބޭތީވެ ނޫސްވެރިން ވަނީ އެކަމުގެ ޝަކުވާތައްކޮށްފަ އެވެ.
