19 ވަނަ ރައްޔިތުންގެ މަޖިލީހުން ރުހުން ނުދިން ތިން ވަޒީރުންނަށް ރުހުން ހޯދުމަށް އަލުން ރައްޔިތުންގެ މަޖިލީހަށް ފޮނުވައިފިއެވެ.
ވަޒީރުންނަށް ރުހުން ދިނުމަށް އެދި އަލުން ފޮނުވާފައިވާއިރު މާދަމާއަށް މި މައްސަލަ ވަނީ އެޖެންޑާ ކޮށްފައެވެ. މާދަމާ މި މައްސަލައިގައި ވޯޓަށް އެހުން އޮންނާނެ ކަމަށް ބެލެވޭއިރު މިހާރު މަޖިލީހަކީ ސަރުކާރުގެ ސުޕަރމެޖޯރިޓީ އޮތް މަޖިލީހަކެވެ.
ރައްޔިތުންގެ މަޖިލީހުން ރުހުން ނުދިން ތިން ވަޒީރުންގެ ތެރޭގައި ބަންޑާރަނައިބު އަހުމަދު އުޝާމާއި އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދާއި ހައުސިން މިނިސްޓަރު ޑރ. އަލީ ހައިދަރު ހިމެނެއެވެ.
މިދިޔަ ޖެނުއަރީ 29 ވަނަ ދުވަހު ދައުރުން ބޭރުން ބޭއްވި މަޖިލީހުގެ ޖަލްސާގައި ވަޒީރުންނަށް ރުހުން ދީފައިވާއިރު މި ތިން ވަޒީރުންނަށް ރުހުން ދީފައެއް ނުވެއެވެ. އެހެންނަމަވެސް ރައީސް ވަނީ އެ ތިން ވަޒީރުން އަލުން މަޤާމަށް އައްޔަންކުރައްވައިފައެވެ.
އުޝާމަށް ރުހުން ނުދޭން މަޖިލީހުން ފާސްކުރީ ވޯޓުގައި ބައިވެރިވި 64 މެމްބަރުންގެ ތެރެއިން 44 މެމްބަރުން އެގޮތަށް ވޯޓު ދެއްވައިގެންނެވެ. އޭނާއަށް ރުހުން ދޭން ފެންނަ ކަމަށް ވޯޓު ދެއްވީ 24 މެމްބަރުންނެވެ.
ޑރ. ޝަހީމަށް ރުހުން ދޭން ނުފެންނަ ކަމަށް، 31 މެމްބަރަކު ވޯޓު ދެއްވި އިރު އޭނާއަށް ރުހުން ދޭން ނުފެންނަ ކަމަށް، 30 މެމްބަރަކު ވޯޓު ދެއްވި އެވެ. ވަކިކޮޅަކަށް ވޯޓު ނުދެއްވައި އަށް މެމްބަރަކު ތިއްބެވި އެވެ.
ހައިދަރަށް ރުހުން ދޭން ނުފެންނަ ކަމަށް 46 މެމްބަރަކު ވޯޓު ދެއްވި އިރު އޭނާއަށް ރުހުން ދޭން ނުފެންނަ ކަމަށް 24 މެމްބަރަކު ވޯޓު ދެއްވި އެވެ.
