ހުޅުމާލެ ފޭސް 1 ގައި ކުރިއަށް ގެންދިޔަ ރޭޑް އޮޕަރޭޝަނުގައި 8 ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
މި ހަރަކާތް ކުރިއަށް ގެންގޮސްފައިވަނީ ހުކުރު ދުވަހުގެ ހަވީރުގެ ވަގުތެއްގައެވެ. ހުކުރު ދުވަހުގެ ހަވީރު ޖޮއިންޓް ޓާސްކްފޯސްއިން ފުލުހުންނާއި ގުޅިގެން ޓޭކްއަވޭ ކޮފީ ޝޮޕްގެ ވިޔަފާރި ކުރަމުން ގެންދާ ބައެއް ސަރަހައްދުތައް ވަނީ ބަލާއިފާސް ކޮށްފައެވެ. މި އޮޕަރޭޝަނުގައި 8 ބިދޭސީން ވަނީ އިމިގްރޭޝަންގެ ބެލުމުގެ ދަށަށް ގެންގޮސް އެމީހުންނާއި ގުޅުންހުރި ތަހުޤީޤުތައް ކުރިއަށްދާ ކަމަށް ވަނީ ބުނެފައެވެ.
އިކޮނޮމިކް މިނިސްޓްރީން ދާދި ފަހުންވަނީ ބިދޭސީންއަށް 25 ދާއިރާ އަކުން ވިޔަފާރި ކުރުން މަނާކޮށްފައިވާ ކަމަށް ޢިއުލާންކޮށްފައެވެ. އޭގެ ތެރޭގައި އެއް ދާއިރާއެއްގެ ގޮތުގައި ކެފޭ އާއި ރެސްޓީރެންޓް އަދި ބޭކަރީތައް ހިމެނޭ ގޮތަށް ކާބޯތަކެތި ވިޔަފާރި ކުރުން މަނާކޮށްފައެވެ.
ދިވެހި ސަރުކާރުން އަންނަނީ ޤަވާއިދާ ޙިލާފަށް އުޅޭ ބިދޭސީން ދެނެގަނެ، ހަރުދަނާ ސިޔާސަތުތަކާއެކު ފިޔަވަޅުތައް އަޅަމުންނެވެ. ނިމިދިޔަ މަހުގެ ނިޔަލަށް 1500 އަށްވުރެން ގިނަ ބިދޭސީން ވަނީ ރާއްޖެއިން ޑީޕޯޓްވެސް ކޮށްލައިފައެވެ. ސަރުކާޒުގެ އަމާޒަކީ ކުރިއަށް އޮތް 3 އަހަރު ދުވަސް ތެރޭގައި ޤަވާއިދާ ޚިލާފަށް އުޅޭ ބިދޭސީން ހޯދައި ހުރިހާ ބިދޭސީންގެ މަޢުލޫމާތު އެއް ޑޭޓާބޭސްއަކަށް ގެނައުމެވެ.
