ގައިގެ އެތަށް ތަނަކަށް ތޫނު އެއްޗަކުން ހަމަލާ ދީ ލިޓަސް ސާވިސް ސެންޓަރުގެ ތެރޭގައި ރ. މީދޫ ފެންފިޔާޒުގޭ، މުހައްމަދު އަނަސް މަރާލި މައްސަލައިގައި ދައުލަތުން ދައުލަތުން ދައުވާ އުފުލާފައި ތިބި އެންމެންގެ މައްޗަށް ކުށް ސާބިތުނުވެ މިނިވަންވި މައްސަލަ ހައިކޯޓުގައި ފަށައި އެ މީހުން ބަންދުކޮށްދޭން ދައުލަތުން އެދެފި އެވެ.
އަނަސް މަރާލުމުގައި ބައިވެރިވިކަމުގެ ތުހުމަތަށް ހައްޔަރުކޮށް ޝަރީއަތް ކުރަމުން ދިޔަ މީހުން ހަތް އަހަރު ފަހުން ކޯޓުން މިނިވަންވި އިރު އޭގެ ތެރެއިން އެކަކު ދާދިފަހުން މަސްތުވާތަކެތީގެ މައްސަލައެއްގައި ވަނީ ހައްޔަރުކޮށްފައެވެ. ސަރުކާރުން ވެސް ކަންބޮޑުވުންފާޅުކޮށް، ބަޔާން އާންމު ކުރި މި މައްސަލަ އިސްތިއުނާފަށް އެދި އޭރު ހުށަހެޅިފައި ނުވަނީ ރިޕޯޓު ލިބިފައި ނުވާތީއެވެ. މައްސަލަ އެކި ގޮތްގޮތުން ލަސްވިއިރު، ހުކުމް ވެސް ކުރީ ޝަރީއަތް ނިމުނުތާ އަހަރެއް ފަހުންނެވެ.
އަނަސްގެ މަރުގެ ތުހުމަތަށް ހައްޔަރު ކުރި 07 މީހުންގެ މައްޗަށް ވެސް ކުށް ސާބިތު ނުވާކަމަށް ކަނޑައަޅައި ކޯޓުން ހުކުމް ކުރީ މިއަހަރުގެ ފެބްރުއަރީ 25 ގަ އެވެ. މި މައްސަލަ ދައުލަތުން ހައިކޯޓުގައި އިސްތިއުނާފް ކޮށްފައި ވަނީ މޭއި މަހުގެ 14 ވަނަ ދުވަހުއެވެ.
2017 ވަނަ އަހަރުގެ ޖުލައި މަހުގެ 31 ވަނަ ދުވަހުގެ ރޭ، އަނަސް މަރާލި މައްސަލައިގައި ދައުވާކޮށްފައި ވަނީ ލ. ގަން، ނަންނާރިގެ ޖުނައިހު އަބްދުﷲ އާއި ސ. ފޭދޫ ވެސްޓަންވިލާ ހަސަން މަހްފޫޒް އާއި ދަފްތަރު ނަމްބަރު 1746 ސިމާހު މޫސާ އާއި ޅ. ކުރެންދޫ އަސަރުމާގެ އަހުމަދު ޒަޔާނާއި މ. ދިމިޝްގު އުސްމާން ޝަރީފާއި މ. ލޮނުމިދިލިގެ އަފްރާހު އަބްދުލްރަހްމާން އަދި ތ. ކިނބިދޫ ގުލްފާމްގެ މުހައްމަދު ސާޒްގެ މައްޗަށެވެ.
ހައިކޯޓުގައި މައްސަލައިގެ އިސްތިއުނާފު މިއަދު ފެށިއިރު ދައުވާ ލިބޭ މީހުންގެ ތެރެއިން ބައެއް މީހުން ވަކީލުން ހަމަޖައްސާފައި ނެތުމުން އެކަމަށް ހަފްތާއެއްގެ މުއްދަތު ދޭން އެ މީހުން އެދުނެވެ. އަދި އެ ފުރުސަތު ފަނޑިޔާރުންގެ ބެންޗުން ވަނީ މިއަދު ދީފަ އެވެ.
މައްސަލަ ބައްލަވާ ފަނޑިޔާރުންގެ ބެންޗުން ވިދާޅުވީ މިއީ ވަކީލުން ހަމަޖައްސަން ދޭ ފަހު ފުރުސަތުކަމަށާއި، ދެން ތާވަލު ކުރާ އަޑުއެހުމެއްގައި ވަކީލަކު ނެތި ވެސް ޝަރީއަތް ކުރިޔަށްގެންދާނެ އެވެ.
ދައުވާ ލިބޭ މީހުން ބަންދުކޮށްދޭން ދައުލަތުން އެދުނު ނަމަވެސް ޝަރީއަތުން ގޮތެއް ނިންމާފައި ނުވަނީ، އެ މީހުންނަށް ވަކީލަކު ހަމަޖެހިފައި ނުވާތީ އެވެ.
މި މައްސަލަ ހައިކޯޓުގައި ބައްލަވަނީ ފަނޑިޔާރު މުހައްމަދު ޝަނީޒާއި، އިސް ފަނޑިޔާރު ހުސެއިން ޝަހީދާއި، ފަނޑިޔާރު މުހައްމަދު ފައިސަލް އެވެ. ބެންޗުގެ ރިޔާސަތު ބެލެހެއްޓެވީ ފަނޑިޔާރު ޝަނީޒެވެ.
މި މައްސަލައިގައި ކްރިމިނަލް ކޯޓުން ކުރި ހުކުމުގައި ވަނީ ދައުލަތުން ހުށަހެޅި ހެއްކާއި ގަރީނާތަކަށް ރިއާޔަތްކޮށް ދައުވާކޮށްފައިވާ މީހުން ކުށުގައި ބައިވެރިވާކަމަށް އެކަށީގެންވާ ޝައްކެތް ނެތް މިންވަރަށް ސާބިތުވާކަމަށް ކަނޑައެޅެން ނެތް ކަމަށެވެ. އަދި ހުކުމުގައި ވާގޮތުން، މައްސަލައިގައި ހުށަހަޅާފައިވާ ސީސީޓީވީ ފުޓޭޖްތަކާއި ފުލުހުންގެ އިންޓެލިޖެންސް ރިޕޯޓުތަކުން ވެސް ކުށް ސާބިތު ކުރެވޭ ވަރަށް ހެކި ލިބިފައި ނެތެވެ. އަދި ފުޓޭޖުތަކުގެ ޗެއިން އޮފް ކަސްޓަޑީ ލިބިފައި ނުވާކަމަށް ހުކުމުގައި ވަނީ ބުނެފަ އެވެ.
މީގެއިތުރުން ހުކުމުގައި ބުނެފައި ވަނީ ވީޑިއޯ ފުޓޭޖުތަކުން ފެންނަނީ ކުށުގެ ތުހުމަތުގައި ތިބި މީހުންކަން ކަށަވަރު ކުރުމުގެ އިތުރު އެއްވެސް ހެއްކެއް ނުވަތަ އެއްއަށް ބާރު ދޭނެ އިތުރު އެއްވެސް ހެއްކެއް ހުށަހަޅާފައި ވެސް ނުވާ ކަމަށެވެ. އެއާއި އެކު ސިއްރު ހެކިންގެ، ހެކި ބަހަށް ބަލާއިރު އެ މީހުންގެ މައްޗަށް ކުށް ސާބިތު ކުރެވޭ މިންވަރަށް ނުވަތަ އެ އަމަލު ހިންގީ އެ މީހުންކަމަށް ޝަރީއަތަށް ސާބިތު ކުރެވެން ނެތްކަމަށް ހުކުމުގައި ވެއެވެ.
ހުކުމުގައި އިތުރަށް ބުނެފައި ވަނީ ތުހުމަތު ކުރެވޭ ބައެއް މީހުންގެ ކޯލް ޑީޓެއިލްތަކުގެ ޗާޓު ހުށަހަޅާފައިވީ ނަމަވެސް، އެއީ ފުލުހުން ތައްޔާރުކޮށްފައިވާ ކަރުދާހެއް ނަމަވެސް އެއީ އެއްވެސް ބުރަދަނެއް ނެތް ހެއްކެއް ކަމަށެވެ.
