ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އދ. މާމިގިލިއަށް ވަޑައިގަތުމުން ޖުމްހޫރީ ޕާޓީގެ ލީޑަރު ގާސިމް އިބްރާހިމްގެ ފަރާތުން ރަތްދޫލައިގެ މަރުހަބާއެއް ކިޔައިފި އެވެ.
މާމިގިލިއަށް އަބްދުއްރަހީމް ވަޑައިގަތީ، ގާސިމްއާއި އެކު ބައެއް މަޝްވަރާ ބައްދަލުވުންތައް ކުރިޔަށް ގެންދިއުމަށެވެ. އަދި އެކަމާއި ގުޅޭ ތަފްސީލެއް ލިބުމުން ހާމަކުރާނެކަމަށް ޖޭޕީގެ ފަރާތުން މީޑިއާތަކަށް ފޮނުވި މެސެޖެއްގައި ވަނީ ބުނެފަ އެވެ.
ފްލައިމީގެ މަތިންދާބޯޓު އެއާޕޯޓުގައި ޖެއްސުމާއި އެކު އަބްދުއްރަހީމަށް އެއާޕޯޓުން މަރުހަބާ ދެންނެވީ ގާސިމާއި ޖޭޕީގެ މެމްބަރުންނެވެ.
އަބްދުއްރަހީމް މާމިގިލިއަށް ވަޑައިގެންނެވިއިރު ގާސިމް ވަނީ ސަރުކާރުގެ މަސަައްކަތުގައި ޖޭޕީއާއި އޭނާގެ އެއްބާރުލުން ލިބޭނެކަމުގެ ޔަގީންކަން ދެއްވާފަ އެވެ. އަދި ގައުމުގެ އިގްތިސާދު ހަމަމަގަށް އެޅުވުމަށް ކުރާ މަސައްކަތްތަކުގައި، މަޖިލީހުގެ ތެރެއިން ދެވެން ހުރި ހުރިހާ އެހީތެރިކަމެއް ދެއްވާނެކަމަށް ގާސިމް ވަނީ ވިދާޅުވެފަ އެވެ.
