ވޭޕާއި ސިގިރޭޓުން ނަގާ ކަސްޓަމްސް ޑިއުޓީ ބޮޑުކުރުމަށް ފިނޭންސް މިނިސްޓްރީއިން ހުށަހަޅައިފިއެވެ.
އެގޮތުން ވޭޕުން ނަގާ ކަސްޓަމްސް ޑިއުޓީ ބޮޑު ކުރުމަށް ހުށައަޅާފައިވަނީ 200 އިންސައްތައަށެވެ. އަދި ސިނގިރޭޓަކުން ފަސް ރުފިޔާގެ ޑިއުޓީއެއް ނެގުމަށެވެ. މިހާރު ވޭޕްގެ ބާވަތްތަކުން ޑިއުޓީގެ ގޮތުގައި ނަގަނީ 25 އިންސައްތައެވެ. އަދި ސިނގިރޭޓަކުން ޑިއުޓީގެ ގޮތުގައި ނަގަމުން އަންނަނީ ތިން ރުފިޔާއެވެ.
ފިނޭންސް މިނިސްޓްރީއިން މާލިއްޔަތު ކޮމެޓީއަށް ހުށައަޅާފައިވަނީ މި އަހަރުގެ ޑިސެމްބަރު މަހުން ފެށިގެން ނުރައްކާތެރި އެ ދެ ބާވަތުން ޑިއުޓީ ބޮޑުކުރުމަށެވެ.
މިހާރު ސިނގިރޭޓް ފޮއްޓެއް ވިއްކަނީ 105 އަށްކަމަށްވާއިރު، މި ބަދަލާއިއެކު މީގެ އަގު ބޮޑުވެގެންދާނެއެވެ. އަދި ވޭޕްގެ އަގުތައް މިހާރަށް ވުރެ 175 އިންސައްތަ އުފުލިގެން ދާނެއެވެ.
މިދިޔަ ބުދަ ދުވަހު ފިނޭންސް މިނިސްޓަރު މުހައްމަދު ޝަފީގު މާލިއްޔަތު ކޮމެޓީއަށް ހާޒިރުކުރުމުން ވަޒީރު ވިދާޅުވީ، ސިއްހަތަށް ގެއްލުންވާ ބާވަތްތައް ރާއްޖެއަށް އެއްވެސް ވަރަކަށް އެތެރެކުރަން މެޖޯރިޓީ މީހުން ބޭނުންނުވާކަމަށެވެ. ދުންފަތުގެ ޑިއުޓީގެ އަގު ބޮޑު ކުރަން ނިންމީ އެހެންވެކަމަށް މިނިސްޓަރު ވިދާޅުވިއެވެ.
މިކަމުގެ މަގްސަދެއްގެ ގޮތުގައި މިނިސްޓަރު ފާހަގަކުރެއްވީ މުޖުތަމައުއާއި، އާންމު ފަރުދުންނަށް، ސިއްހަތަށް ގެއްލުންވާ އެއްޗެހި ޑިސްކަރޭޖްކުރުމެވެ.
މިހާރު އަހަރެއްގެ މައްޗަށް ރާއްޖެއަށް 1.8 ބިލިއަން ރުފިޔާގެ ނުވަތަ 400 މިލިއަން ޑޮލަރުގެ ސިނގިރޭޓު އެތެރެކުރާކަމަށް ތަފާސް ހިސާބުތައް ދައްކާއިރު، މިކަން މަދުކުރުމަށްޓަކައި އަދިވެސް އިތުރު ޓެކްސްތައް ނަގަންޖެހޭކަމަށް ހެލްތު މިނިސްޓްރީއިންވެސް ވަނީ ބުނެފައެވެ.
މީގެ އިތުރުން ދުންފަތާއި ގުޅުން ހުރި ހުރިހާ ތަކެއްޗަކަށް ކުރިން ދެމުން އައި ޑިއުޓީ އިނާޔަތްތައްވެސް ކަނޑާލުމަށް މި ސަރުކާރުން ވަނީ ނިންމާފައެވެ. މިކަމަށް ކަނޑައަޅާފައިވާ ތާރީހަކީ އަންނަ ނޮވެމްބަރު މަހެވެ.
