ލޭނުގެ މަސްވެރިކަމުގެ ސަބަބުން ރާއްޖޭގެ އިގްތިސާދަށް ނޭދެވޭ އަސަރުކުރާނެކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
ދިވެހިރާއްޖޭގައި ލޭނުގެ މަސްވެރިކަން ފުޅާކޮށް ލޭނުގައި ޖެހި މަރުވާ މިޔަރު އެކްސްޕޯޓުކުރުމަށް ހުއްދަ ދިނުމަށް ފިޝަރީޒް މިނިސްޓްރީއިން ނިންމުމާއިއެކު ރައީސް ނަޝީދުވަނީ ސޯޝަލްމީޑިއާގައި އެކަމާއި ދެކޮޅަށް ހިޔާލު ފާޅުކުރައްވާފައެވެ. އެމަނިކުފާނު ވިދާޅުވީ، އެގޮތަށް މަސްވެރިކަން ކުރުމުން ގިނަ އަދަދަކަށް މަޑީގެ ބާވަތްތަކާއި ކޯމަސް އަދި ކަނޑުދޫނީގެ ބާވަތްތައްވެސް ލޭނުގައި ޖެހޭކަމަށާއި އެކަމުގެ ސަބަބުން ދިވެހިރާއްޖޭގެ ފަތުރުވެރިކަމަށް ގެއްލުންތައް ލިބިގެންދާނެކަމަށް ފާހަގަކުރެއްވިއެވެ.
އެމަނިކުފާނު ވިދާޅުވީ، އެކަމުގެ ސަބަބުން ދިވެހިރާއްޖޭގެ މަސްވެރިކަމުގެ ބްރޭންޑިންގްއަށްވެސް ނޭދެވޭ އަސަރުކުރާނެކަމަށާއި ދެ ސިނާއަތުވެސް މަސައްކަތްތައް ބައްޓަންކޮށްފައިވަނީ ދެމެހެއްޓިނިވި ސިޔާސަތުތެއްގެ މަތިން ކުރިއަށް ގެންދިއުމަށްކަމަށް އަލިއެޅުއްވިއެވެ.
ރާއްޖޭގައި ލޭނުގެ މަސްވެރިކަން ކުރުމަށް ދިން ހުއްދައާއިއެކު މިިނިސްޓްރީއިންވަނީ ލޭނުގައި ޖެހި މަރުވާ މިޔަރުވެސް ގައުމުން ބޭރަށް އެކްސްޕޯޓުކުރުމަށް ލައިސެންސެއް ދޫކުރުމަށް ނިންމާފައެވެ. އެހެންނަމަވެސް ލޭނުގެ މަސްވެރިކަން ކުރާއިރު މިޔަރު ހިފުމަށް އަމާޒުކޮށްގެން ނުވާނެކަމަށް ބަޔާންކޮށްފައިވާއިރު އަމާޒުކުރަންވާނީ ލޯބޮޑު ކަންނެއްޔާއި ހިބަރާއި ރީނދޫ އުރަހަ ކަންނެއްޔަށް ކަމަށް ބުނެފައިވެއެވެ. އަދި މިޔަރެއް މަރު ނުވެ އޮތްނަމަ ވީހާވެސް އަވަހަށް ދޫކޮށްލުމަށްވެސް އިރުޝާދު ދީފައިވާއިރު، ލޭނުކޮޅުގެ މިޔަވާލީގައި ނަރާއި ވަޔަރު ބޭނުންކުރުން މިނިސްޓްރީންވަނީ މަނާކޮށްފައެވެ.
