މާލީ އިސްލާހީ އެޖެންޑާތަކުގެ ތެރެއިން ބައިނަލްއަޤުވާމީ މާލީ އިދާރާތަކުން ދީފައިވާ އިރުޝާދުތަކާއި އެއްގޮތަށް އެމްޑީޕީގެ ސަރުކާރުގައި އެއްވެސް ފިޔަވަޅެއް އަޅާފައި ނުވާކަމަށް ށ. ފުނަދޫ ދާއިރާގެ މެމްބަރު މުހައްމަދު މަމްދޫހު ވިދާޅުވެއްޖެ އެވެ.
ރާއްޖޭގެ އިގްތިސާދީ ހާލަތު ދަށްވެ، ބޭނުން ކުރެވޭ ޑޮލަރު ރިޒާވް ހުސްވެފައިވާކަމަށް ކުރާ ތުހުމަތުތައް ސަރުކާރުން ދޮގު ކުރެ އެވެ. އަދި ގޮންޖެހުންތަކެއް ހުރި ނަމަވެސް، ހަރުދަނާ ފިޔަވަޅުތައް މި ސަރުކާރުން އަޅާފައިވުމުން ކުރިޔަށް އޮތް ދުވަސްތަކުގައި އޭގެ ހެޔޮ ބަދަލު ފެންނާނެކަމަށް ވަނީ ބުނެފަ އެވެ.
މިފަހަކަށް އައިސް ދެކެވޭ ވާހަކަތަކަށް ރައްދު ދެއްވައި ސަންގުޓީވީގެ ޚަބަރަށްފަހު ޕްރޮގްރާމްގައި މަމްދޫހު ވިދާޅުވީ، މިއަދު އެމްޑީޕީ އެންމެ ބާރަށް ދައްކަމުން ދަނީ ކޮވިޑު-19 ގެ ބަލިމަޑުކަމުގައި ގައުމުގެ އިގްތިސާދު މެނޭޖު ކުރި ގޮތްކަމަށެވެ. އެއީ ހަގީގީ މަންޒަރުތޯ ސުވާލު ކުރައްވައި މަމްދޫހު ވިދާޅުވީ ކާމިޔާބީ ހޯދުމަކީ ބޮޑެތި އިންޓްރެޓް ރޭޓުގައި ލޯނު ނަގައި، ފައިސާ ޗާޕު ކުރުން ނޫންކަމަށެވެ.
މަމްދޫހު ވިދާޅުވީ މާލީ ހާލަތު ރަނގަޅު ކުރުމަށް އިރުޝާދުދީ ބައިނަލްއަޤުވާމީ މާލީ އިދާރާތަކުން ދިން ލަފައާއި އިރުޝާދު ބަލައިގަތުމަށް ބޭނުން ނުވީ އެމްޑީޕީކަމަށެވެ. ނަތީޖާއެއްގެ ގޮތުން ރައީސް ޑރ. މުހައްމަދު މުއިއްޒު ވެރިކަމާއި ހަވާލުވި މަހު ވެސް ހާލަތު އޮތީ މުސާރަތައް ދޭން ވެސް ދަތިވާ ހިސާބުގައިކަމަށް މަމްދޫހު ވިދާޅުވި އެވެ. އެކަމަކު އެކަން ގަބޫލުކޮށް ރައްޔިތުންނަށް ހާލަތު ކިޔައިދީ، އަޅަމުން ދަނީ ރަނގަޅު ފިޔަވަޅުތަކެއްކަމަށާއި، އެކަން ހާސިލު ކުރުމަށް ގާނޫނަށް ގެންނަން ޖެހޭ ބަދަލުތައް ވެސް އިއުލާނުކޮށްފަައިވާނެކަމަށް މަމްދޫހު ވިދާޅުވި އެވެ.
މި ފިޔަވަޅުތަކަކީ 2022 ގެ މާލީ އިސްލާހީ އެޖެންޑާތަކުގައި ވެސް އެމްޑީޕީގެ ސަރުކާރު އޮތް އިރު ވެސް އިބްރާހިމް މުހައްމަދު ސޯލިހު ވެރިކަމުގައި ހުންނެވިއިރު ފިޔަވަޅު އަޅަން އައިއެމްއެފްއާއި ވޯލްޑް ބޭންކުން ލަފާދީފައިވާ ފިޔަވަޅުތައް.. އަޅުގަނޑުމެން މިކަންކަން ކުރަމުން މިދަނީ.. އެމްޑީޕީ އޮތީ އިގްތިސާދަށް އަޅަން ޖެހުނު އެތައް ފިޔަވަޅެއް ނާޅައި..
މަމްދޫހު ވިދާޅުވީ ސަރުކާރުގެ މަސައްކަތްތަކުން ރިކަރަންޓު ހަރަދު ކުޑަކުރެވިފައިވާކަން ތަފާސްހިސާބުތަކުން އެނގޭކަމަށެވެ. އެކަން އެމްޑީޕީގެ ސަރުކާރުގެ ފުރަތަމަ ހަ މަހާއި، ރައީސް މުއިއްޒުގެ ހަ މަސް އަޅާ ކިއުމުން ސާފުވާނެކަމަށް މަމްދޫހު ވިދާޅުވި އެވެ.
ރާއްޖޭގެ އިގްތިސާދުގައި މިވަގުތު އޮތް ދަތިތަކުގެ ތެރޭގައި ހިމެނޭ ޑޮލަރުގެ އާމްދަނީ އިތުރު ކުރުމަށް މަސައްކަތް ކުރަމުން ގެންދާކަން ފާހަގަކޮށް މަމްދޫހު ވިދާޅުވީ އެކަމަށް ގާނޫނަށް ގެންނަން ޖެހޭ އިސްލާހުތައް ވެސް އިއުލާނުކޮށްފައިވާކަމަށެވެ. މި ފިޔަވަޅުތައް އަޅައި، ކާމިޔާބީ ހޯދުމުގެ މަސައްކަތުގައި ރައްޔިތުންގެ މަޖިލީހުގެ ފުރިހަމަ އެއްބާރުލުން ލިބޭނެކަމަށް މަމްދޫހު ވިދާޅުވި އެވެ.
މަމްދޫހު ވިދާޅުވީ މި ސަރުކާރުން މަސައްކަތް ކުރާނީ ބޮޑެތި ލޯނުތައް ނުނަގައި، ފައިސާ ޗާޕު ނުކޮށް ގައުމުގެ ހާލަތު ރަނގަޅު ކުރުމަށް ކަމަށެވެ. އަދި އެމްޑީޕީގެ ވެރިކަމުގައި ފައިސާ ޗާޕުކޮށް ލޯނު ނަގައިގެން ގައުމަށް ލިބުނު އެއްވެސް މަންފާއެއް ހަމަ ލޮލަށް ފެންނަން އެބަހުރިތޯ އޭނާ ސުވާލު އުފެއްދެވި އެވެ.
އެމްޑީޕީގެ ވެރިކަމުގައި ރާއްޖެއަށް އާމްދަނީ ވަންނާނެ އެއްވެސް މަގެއް ހޯދާފައި ނެތްކަމަށާއި، ހަރަދު ބޮޑު ސިޔާސަތެއްގެ ތެރެއިން ދައުލަތަށް ހިޔާނާތްތެރިވަމުން ދިޔައީ ވެސް މިދިޔަ ފަސް އަހަރުގައިކަމަށް މަމްދޫހު ވިދާޅުވި އެވެ.
