ރާއްޖޭގައި އުޅެމުންދާ ބިދޭސީންގެ ވަކިވަކި މީހުންނަކީ ގަވައިދާ ހިލާފަށް އުޅޭ ބައެއްތޯ ނުވަތަ ނޫންތޯ ދެނެގަނެވޭނެ އެޕްލިކޭޝަނެއް ތައްޔާރު ކުރުމުގެ މަސައްކަތް ކުރަމުންދާކަމަށް ކޮންޓްރޯލާރ އޮފް އިމިގްރޭޝަން މުހައްމަދު ޝަމްއާން ވަހީދު ވިދާޅުވެއްޖެ އެވެ.
ރާއްޖޭގައި ގަވައިދާ ހިލާފަށް އުޅެމުންދާ ބިދޭސީންގެ މައްސަލަތައް ހައްލު ކުރުމަށް އިމިގްރޭޝަނާއި ކަމާއި ގުޅުން ހުރި އިދާރާތައް ގުޅިގެން ފެށި މަސައްކަތުން މިހާތަނަށް ތިންހާހަށް ވުރެ ގިނަ މީހުން ވަނީ ޑީޕޯޓުކޮށްފަ އެވެ. އަދި އިމިގްރޭޝަންގެ ވޮޗްއަށް ލިބިފައި ހުރި މައްސަލަތަކަށް ތައްޔާރުކޮށް އެތަންތަން ވެސް ބަލައި ފާސް ކުރާނެކަމަށް އެ އިދާރާއިން ވަނީ ބުނެފަ އެވެ.
މި މަސައްކަތް އިތުރަށް ފުޅާކުރުމާއި ގުޅޭގޮތުން ޝަމްއާން ވިދާޅުވެފައި ވަނީ ބިދޭސީ މީހާ އުޅެނީ ގަވައިދަށްތޯ ބެލުމަށް އެޕްލިކޭޝަނެއް ތައްޔާރު ކުރުމަށް މަސައްކަތް ފެށީ އެ އިދާރާގެ ހިދުމަތްތަކަށް ޒަމާނީ ބަދަލެއް ގެނައުމުގެ ސިޔާސަތުގެ ދަށުން ކަމަށެވެ.
މިފަދަ އެޕްލިކޭޝަނެއްގެ މަސައްކަތް ފެށި ސަބަބެއްކަމަށް ޝަމްއާން ވިދާޅުވީ، މީގެ ކުރިން މަސައްކަތްތައް މެނުއަލީ ކުރަމުން އައުމަވެ. އެހެން ނަމަވެސް ޑިޖިޓަލައިޒް ކުރުމުގެ މަސައްކަތް ފެށި، އޭގެއިން އެއް ކާމިޔާބީއެއްގެ ގޮތުގައި އިމިގްރޭޝަން ވޮޗް ފާހަގަކުރެއްވި އެވެ.
އެޕްލިކޭޝަން މެދުވެރިކޮށް އެއީ ގަވައިދާ ހިލާފަށް އުޅޭ މީހެއްތޯ ނުވަތަ ނޫންތޯ ބަލާލެވޭނެކަމަށް ޝަމްއާން ވިދާޅުވި އެވެ.
މީގެއިތުރުން ޝަމްއާން ވިދާޅުވީ ވެލާނާ އިންޓަނޭޝަނަލް އެއާޕޯޓު (ވީއައިއޭ) އޮޕަރޭޝަނަށް ގެނެވުމުން، އީގޭޓްގެ އިތުރު ފަސޭހަތައް ލިބިގެންދާނެ ކަމަށެވެ. އަދި އުންމީދަކީ ކުރިޔަށް އޮތް ތަނުގައި ޑިޖިޓަލްކޮށް ކުރިއެރުންތަކެއް ލިބިގެންދިއުންކަމަށެވެ.
އިމިގްރޭޝަންގެ މަސައްކަތައްތައް ފުޅާވެ، ބައެއް ބިދޭސީން އަތޮޅުތެރެއަށް ދަތުރު ކުރާކަމުގެ މައުލޫމާތު ލިބި އެކަމަށް ވެސް މިހާރު ވަނީ ތައްޔާރުވާން ފަށާފަ އެވެ. އެގޮތުން ފިލަން ބިދޭސީންގެ ގިނަ ބަޔަކު ހދ. ކުޅުދުއްފުއްޓަށް ދާކަމުގެ ޝަކުވާތަކެއް ލިބިގެން އިމިގްރޭޝަނުން ވަނީ ބޯޓެއް ބަލައި ފާސް ކުރުމަށް ފަހު ނޯޓިސް ދީފަ އެވެ.
