ސަރުކާރުގެ މައި ޕާޓީ ޕީޕަލްސް ނެޝަނަލް ކޮންގްރެސް (ޕީއެންސީ) ގެ އެތެރޭގޭ އިންތިހާބަށް އިއުލާނުކޮށްފި އެވެ.
ޖުމްލަ 2095 މަގާމަކަށް މެންބަރުން އިންތިހާބުކުރުމަށް ބާއްވާ ބޮޑު އިންތިހާބު ބޭއްވުމަށް ހަމަޖެހިފައި ވަނީ އަންނަ އޮކްޓޯބަރު މަހުގެ 19 ވަނަ ދުވަހު އެވެ.
އިންތިހާބަށް ހުޅުވާލައި ތަފްސީލު ހިއްސާ ކުރުމަށް ބޭއްވި ނޫސްވެރިންގެ ބައްދަލުވުމުގައި ތަފްސީލު ދެއްވައި ހެލްތް މިނިސްޓަރ ޑރ. އަބްދުﷲ ޚަލީލު ވިދާޅުވީ ޕާޓީން ހުޅުވާލާފައި ވަނީ ތިން ގިންތިއެއްގެ މަގާމަކަށް ކުރިމަތިލުމަށް ކަމަށެވެ. އަދި ދާއިރާތަކުގެ ރައީސުންނާއި ނައިބު ރައީސުންގެ އިތުރުން ރަށްރަށުގެ ޒުވާނުންގެ ހަރަކާތުގެ ރައީސުންނާއި އަންހެނުންގެ ހަރަކާތުގެ ރައީސުންނާއި ސްޓިއަރިން ކޮމިޓީތަކުގެ މެންބަރުން އިންތިހާބު ކުރާނެ ކަމަށެވެ.
ޚަލީލު ވިދާޅުވި ގޮތުގައި ޕީއެންސީގެ މެންބަރަކު ރައްޔިތުންގެ މަޖިލީހުގައި ތަމްސީލު ކުރައްވާ ދާއިރާތަކުގެ ރައީސުންނަކީ އެ ދާއިރާއެއްގެ މަޖިލިސް މެންބަރުންނެވެ. އެހެންކަމުން 75 ދާއިރާއެއްގެ ރައީސުންގެ ގޮތުގައި ތިއްބަވާނީ އެ ދާއިރާތަކުގެ މަޖިލިސް މެންބަރުންނެވެ. ބާކީ 18 ދާއިރާގެ ދާއިރާ ރައީސުން އިންތިހާބުކުރާއިރު 93 ދާއިރާއެއްގެ ދާއިރާ ނައިބުރައީސުންގެ މަގާމަށް ކުރިމަތިލުމަށް ހުޅުވާލިއިރު، ދާއިރާ ރައީސުންނާއި ނައިބުރައީސުންގެ ގޮތުގައި ޖުމްލަ 111 ބޭފުޅަކު އިންތިހާބުކުރުން އޮންނާނެ އެވެ.
ކޮންމެ ރަށަކުން ޒުވާނުންގެ ހަރަކާތުގެ ރަށުގެ ރައީސަކާއި އަންހެނުންގެ ހަރަކާތުގެ ރަށުގެ ރައީސެއް އިންތިހާބުކުރާއިރު ސިޓީތަކުގައި ރައްޔިތުންގެ މަޖިލީހުގެ އިންތިހާބީ ކޮންމެ ދާއިރާއަކުން ޒުވާނުންގެ ހަރަކާތުގެ ރައީސަކާއި އަންހެނުންގެ ހަރަކާތުގެ ރައީސެއް އިންތިހާބުކުރާނެ އެވެ. ޒުވާނުންގެ ހަރާކތާއި އަންހެނުންގެ ހަރަކާތުގެ ރަށު އަދި ދާއިރާ ރައީސުންގެ ގޮތުގައި ޖުމްލަ 420 މެންބަރުން އިންތިހާބުކުރަންވަނީ ހުޅުވާލާފަ އެވެ.
އޭގެ އިތުރަށް 3،000 އަށްވުރެ އާބާދީ ކުޑަ ކޮންމެ ރަށަކުން ހަތް މެންބަރުންގެ މައްޗަށް އެކުލެވޭ ސްޓިއަރިން ކޮމިޓީއެއް، އަދި 3،000 އަށްވުރެ ބޮޑެތި އާބާދީތައް އޮތް ރަށްރަށުން ނުވަ މެންބަރުންގެ މައްޗަށް އެކުލެވޭ ސްޓިއަރިން ކޮމިޓީއެއް އިންތިހާބުކުރާނެ އެވެ. ސިޓީތަކުގައި ކޮންމެ ދާއިރާއަކުން ސްޓިއަރިން ކޮމިޓީއެއް ހޮވާނެ އެވެ.
ސްޓިއަރިން ކޮމިޓީތަކުގައި އާންމު މެންބަރުންގެ އިތުރަށް އަންހެނުންގެ މެންބަރަކާއި ޒުވާނުންގެ މެންބަރަކު ހިމެނޭނެ އެވެ.
އެގޮތުން ސްޓިއަރިން ކޮމިޓީތަކުގެ އާންމު މެންބަރުންގެ ގޮތުގައި 1،144 މެންބަރުން އަދި ޒުވާނުންގެ މެންބަރުންނާއި އަންހެނުންގެ މެންބަރުންގެ ގޮތުގައި 420 މެންބަރުން އިންތިހާބުކުރަންވަނީ ހަމަޖެހިފަ އެވެ.
އިންތިހާބަށް ވާދަކުރުމަށް ނަން ހުށަހެޅުމުގެ އެންމެ ފަހު ވަގުތަކީ ސެޕްޓެމްބަރު 30 ގެ އިރުއޮއްސި 18:00 އެެވެ.
