އެކައުންޓަކުން ލައްކައަށްވުރެ ގިނަ ރުފިޔާ ވަގަށް ނެގި މައްސަލައިގައި ހައްޔަރުކޮށްފައިވާ މީހާގެ ބަންދަށް 15 ދުވަސް ކްރިމިނަލް ކޯޓުން އިތުރުކޮށްފިއެވެ.
މި މައްސަލައިގައި ކޯޓުން އަމުރުކޮށްފައިވަނީ ގދ. ތިނަދޫ، ސްކޫނާ، ހުސައިން ޝާހިލް މުހައްމަދު (22 އަހަރު) ގެ މައްޗަށެވެ. ޝާހިލްގެ އެކައުންޓަށް 95,000 ރުފިޔާއާ ގާތްކުރާ އަދަދެއް ޖަމާވެފައިވާކަން ފުލުހުންގެ ތަޙްޤީޤަށް ހާމަވެފައިވާކަމަށް ބަންދު އަމުރުގައި ބަޔާންކޮށްފައިވެއެވެ.
ޝާހިލްގެ ބަޔާނުގައި، މި ޢަމަލު ހިންގީ އޭނާގެ ރައްޓެއްސެއް ކަމަށާއި، އެއީ ޢަބްދުﷲ ކިޔާ މީހެއްކަމަށް ތުހުމަތުކޮށްފައިވެއެވެ. އަދި އޭނާގެ އެކައުންޓަށް ޖަމާވި ފައިސާއިން ބައެއް ނެގިކަމަށް އެއްބަސްވެފައިވާ ކަމަށާއި، ބާކީ ފައިސާ ޢަބްދުﷲ ބުނުމުން ޓްރާންސްފަރ ކުރިކަމަށްވެސް ބުނެފައިވެއެވެ.
ފުލުހުންގެ ތަޙްޤީޤަށް ޝާހިލްގެ މައްޗަށް ތުހުމަތު ކުރެވޭ މިންވަރަށް ހެއްކާއި ޤަރީނާ ލިބިފައިވާކަމަށް ބަންދު އަމުރުގައި ފާހަގަކޮށްފައިވެއެވެ. މި މައްސަލައިގެ ތަޙްޤީޤު ދަނީ ކުރިއަށެވެ.
މި މައްސަލައިގައި އިތުރު ތަފްސީލު ހޯދުމަށް ފުލުހުންނާ ގުޅުމުން، މައްސަލައިގެ ތަޙްޤީޤު ދަނީ ކުރިއަށް ކަމަށާއި، މިވަގުތު އިތުރު މަޢުލޫމާތެއް ހާމަނުކުރެވޭނެ ކަމަށް ބުނެފައިވެއެވެ.
