މިސްކިތްތަކުގައި ފަންޑުފޮށި ބަހައްޓައިގެން އެކި ކަންކަމަށް ފަންޑު ހޯދުމާއި ގުޅޭ ކަންކަން ރެގިއުލޭޓު ކުރާނެ ޤަވާއިދެއް ހެދުމަށް ނިންމާފައިވާކަމަށް އިސްލާމީ ކަންތައްތަކާ ބެހޭ ވަޒީރު ޑރ. މުޙައްމަދު ޝަހީމް އަލީ ސަޢީދު ވިދާޅުވެއްޖެއެވެ.
ވަޒީރު ވިދާޅުވީ، މިފަދަ ޤަވާއިދެއް ހެދުމަށް ނިންމާފައިވަނީ އެކިއެކި ޖަމްޢިއްޔާތަކުން މިސްކިތްތަކުގައި ފަންޑުފޮށިތައް ބަހައްޓައިގެން އެކި ކަންކަމަށް ފަންޑު ހޯދަން ހުއްދައަށް އެދުން ގިނަވެފައިވާތީ މިކަން ކަން ގާތުން ބެލުމަށް ކަމަށެވެ. އެގޮތުން މިސްކިތްތަކުގައި ފަންޑުފޮށި ބެހެއްޓުމާ ބެހޭގޮތުން އުސޫލެއް އޮތުން މުހިންމުކަން ވަޒީރު ފާހަގަ ކުރެއްވިއެވެ.
މި ޤަވާއިދުގެ ދަށުން ހުއްދަ ދެވޭނީ ހޯދާ ފައިސާ ޚަރަދުކުރާނެ ގޮތުގެ ތަފްސީލް ހުށައެޅުމުންކަމަށް މިނިސްޓަރ ވިދާޅުވިއެވެ. އަދި ހުއްދަ ތަކުރާރު ކުރެވޭނީ ޚަރަދުކުރި ގޮތުގެ ތަފްޞީލާއި އޮޑިޓް ރިޕޯޓް ހުށައެޅުމުންކަމަށް ޤަވާއިދުގައި ބަޔާން ކުރާނެކަމަށް ވަޒީރު ވިދާޅުވިއެވެ.
މި އުޞޫލު ހެދުމަށް ހަމަޖެހިފައިވަނީ ދީނީ އެއްބައިވަންތަކަށް ޙިމާޔަތްކުރުމުގެ ޤާނޫގައި ޤަވާއިދުގެ ތެރެއިންނެވެ.
މިސްކިތްތަކުގައި ފަންޑުފޮށި ބެހެއްޓުމަކީ ދޭތެރެ ދޭތެރެއިން ކުރާ ކަމެކެވެ. އެގޮތުން ދާދި ފަހުން ފަލަސްތީނަށް އެހީވުމުގެ ގޮތުންވެސް އެކި މިސްކިތްތަކުގައި ފަންޑުފޮށި ބަހައްޓާފައިވެއެވެ.
