ޣައްޒާއިން 2500 ކުޑަކުދިން ވަގުތުން ވަގުތަށް ސިއްހީ ފަރުވާ ދިނުމަށް އެ ސަރަހައްދުން ބޭރަށް ގެންދިއުމަށް އދގެ ސެކްޓްރީ ޖެނެރަލް އެންޓޯނިއޯ ގުޓޭރެޒް ގޮވާލައްވައިފިއެވެ.
ނޫސްތަކުން ބުނާގޮތުން 2500 ކުދިންނަށް ސިއްހީ ހިދުމަތްތައް ދިނުމުގެ ގޮތުން ޣައްޒާއިން ބޭރަށް ގެންދިއުމަށް ގުޓޭރެޒް ގޮވާލައްވާފައިވަނީ އެ ސަރަހައްދުގައި މަސައްކަތްކުރާ އެމެރިކާގެ ޑޮކްޓަރުންނާއިއެކު ކުރިއަށް ގެންދިޔަ މަޝްވަރާތަކަށްފަހު އެ ކުދިން ކުރިއަށް އޮތް ހަފްތާއެއްހާ ދުވަހުގެ ތެރޭގައި ނިޔާވެދާނެކަމުގެ ބިރު އޮތްކަމުގެ މައުލޫމާތު ލިބިވަޑައިގެންފައިވުމުންނެވެ. ގުޓޭރެޒް ބައްދަލުކުރެއްވި 4 ޑޮކްޓަރުންނަކީވެސް ވޭތުވެދިޔަ 15 މަސް ދުވަހުގައި އިސްރާއީލާއި ހަމާސް ޖަމާއަތުގެ ދެމެދު ހަނގުރާމަ ކުރިއަށް ގެންދިޔައިރު ހަރަކާތްތެރިވަމުން އައިސްފައިވާ މީހުންނެވެ.
ހަނގުރާމައިގެ ސަބަބުން ދެމިލިއަން ރައްޔިތުންނަށް އާންމު ހިދުމަތްތައް މެދުކެނޑިފައިވާއިރު ސިއްހީ ނިޒާމު އެއްކޮށް ނެތިވެފައިވާކަމަށް ރިޕޯޓުތަކުގައިވެއެވެ. ގުޓޭރެޒް ވިދާޅުވީ ޑޮކްޓަރުންނާއިއެކު ކުރިއަށް ގެންދިޔަ މަޝްވަރާތަކުގައި ވަރަށް ބޮޑަށް އޭނާއަށް އަސަރުކުރިކަމަށާއި އަނބުރާ އާއިލާތަކުގެ ގާތަށް އާދެވޭނެކަމުގެ ޔަގީންކަން ދިނުމަށްފަހު އެ ކުދިން ވަގުތުން ވަގުތަށް ސިއްހީ ފަރުވާދިނުމަށް ޣައްޒާއިން ބޭރަށް ގެންދަންޖެހޭކަމަށެވެ.
ނިމިދިޔަ މަހުގެ 19 ވަނަ ދުވަހު ސުލްހައިގެ އެއްބަސްވުމަށް އަމަލުކުރަން ފެށުމުގެ ކުރިން ދުނިޔޭގެ ސިއްހަތު ޖަމިއްޔާއިންވަނީ އެ ސަރަހައްދުން ބޭރަށް ދެވޭނެކަމުގެ އުންމީދުގައި ސިއްހީ ފަރުވާގެ ބޭނުންޖެހިފައިވާ 12،000 މީހުން ތިބިކަމަށެވެ. އަދި އެއްބަސްވުމަށް އަމަލުކުރަން ފެށުމާއިއެކު އެ މަސައްކަތްތައް އަވަސްވެގެންދިއުމަށް އުންމީދުކުރާކަމަށްވެސް ބުނެފައިވެއެވެ. އެ ޖަމާއަތުގެ ފަރާތުން މަސައްކަތްކުރާ ޑޮކްޓަރުންވެސް ވަނީ 2500 ކުޑަކުދިންނަށް އަވަސް ފަރުވާގެ ބޭނުން ވަރަށް ބޮޑަށް ޖެހިފައިވާކަން ހިއްސާކޮށްފައެވެ. އެގޮތުން މަދު ހަފްތާތަކެއްގެ ތެރޭގައި އެ ކުދިން ނިޔާވުމުގެ ފުރުސަތު އޮތްކަމަށާއި ނަމަވެސް ގިނަ ކުދިންނަށް އާދައިގެ ފަރުވާތަކެއް ދިނުމުން ސަލާމަތްވުމުގެ ފުރުސަތުތައް އޮތްކަމަށެވެ.
ބައެއް ޑޮކްޓަރުންވަނީ ގުނަވަންތައް ބުރިކުރަންޖެހުނު ކުދިންނަށް އެކަށީގެންވާ ސިއްހީ ހިދުމަތްތައް ނުލިބޭކަމުގެ ކަންބޮޑުވުން ހިއްސާކޮށްފައެވެ. އެހެންކަމުން ހާލަތު ދެރަވުމުގެ ބޮޑު ފުރުސަތުތަކެއް އޮތްއިރު ސަލާމަތްވުމަށް އޮތް ގޮތަކީ ރަނގަޅު ފަރުވާތަކެއް ދިނުމަށްޓަކައި ބޭރަށް ގެންދިއުންކަމަށެވެ. ނަމަވެސް ބައެއް ސަލާމަތީ ފިޔަވަޅުތަކުގެ ސަބަބުން ކޮންމެ ކުއްޖަކާއެކުވެސް ދެވެނީ އެންމެ ހިދުމަތްތެރިއަކަށް ކަމަށްވާއިރު ބައެއް ހާލަތްތަކުގައި އެއީ ކުރެވޭނެ ކަމެއް ނޫންކަންވެސް ފާހަގަކޮށްފައިވެއެވެ.
