ކަމާ ގުޅުންހުރި އިދާރާތަކުން ކަނޑައަޅާ ކޮންމެ ތަނެއްގައިވެސް ޝަރީއަތްތައް ކުރިއަށް ގެންދަން ތައްޔާރުކަމަށް ކްރިމިނަލް ކޯޓުން ބުނެފިއެވެ.
ޝަރީއަތް ނިމެންދެން ބަންދުކުރާ މީހުންގެ މައްސަލަތައް ލަސްވާ ސަބަބުތަކާ ގުޅޭގޮތުން ގިނަ އިދާރާތަކެއް ހިމެނޭގޮތަށް ކުރިއަށް ގެންދިިޔަ ފޯރަމްގައި ކްރިމިނަލް ކޯޓުގެ ޝަރީއަތްތައް ލަސްވާ މައްސަލައަށް އަލިއަޅުވާލާފައިވެއެވެ.
މި ފޯރަމްގައި ޖުޑީޝަރީ ފިޔަވައި މި މައްސަލައާ ގުޅުންހުރި ހުރިހާ އިދާރާއެއްވެސް ބައިވެރިވެފައިވެއެވެ. އެގޮތުން މި ފޯރަމްގައި ދެކެވިފައިވާ ވާހަކަތަކަށް ބަލާއިރު، ކޯޓުގެ ޖާގައިގެ ދަތިކަން ހުރިނަމަ އިތުރު ގޮތްތަކެއް ހޯދައިގެންވެސް ޝަރީއަތް ކުރިއަށް ގެންދަންޖެހޭކަން ބައިވެރިން ފާހަގަކޮށްފައިވެއެވެ.
އެގޮތުން ބަލާއިރު، ކްރިމިނަލް ކޯޓުގައި ޖާގަ އިތުރުކުރެވެންދެން ވެސް ޝަރީއަތް ނިމެންދެން ބަންދުކުރާ މީހުންގެ މައްސަލަތައް ރަށްރަށުގެ ކޯޓުތަކުގައި ކުރިއަށް ގެންދިއުމާއި، ސްކޫލްތަކުގައި ވެސް ކިޔަވާ ނުދެވޭ ގަޑިތަކުގައި ޝަރީއަތް ގެންދިއުމާ ގުޅޭގޮތުން ހިޔާލުުތައް ހުށަހެޅިފައިވެއެވެ.
އެކަމާ ގުޅޭގޮތުން ”ސަންގު“ އިން ސުވާލު ކުރުމުން ކްރިމިނަލް ކޯޓުގެ މީޑިއާ އޮފިޝަލު ވިދާޅުވީ، ކަމާ ގުޅުންހުރި އިދާރާތަކުް ކަނޑައަޅާ ކޮންމެ ތަނެއްގައިވެސް ކްރިމިނަލް ކޯޓުން ޝަރީއަތްތައް ކުރިއަށް ގެންދިއުމަށް ތައްޔާރު ކަމަށެވެ.
ކަމާ ގުޅުންހުރި އިދާރާތަކުން ކަނޑައަޅާ ކޮންމެ ތަނެއްގައިވެސް ކްރިމިނަލް ކޯޓުން ޝަރީއަތްތައް ކުރިއަށް ގެންދާނަން
ކްރިމިނަލް ކޯޓަށް ދިމާވެފައިވާ ޖާގައިގެ ދަތިކަން ހައްލު ކުރުމަށް ޚާއްސަ އިސްކަމެއް ދީގެން ސަރުކާރުން މަސައްކަތް ކުރަމުންދާކަމަށް ބަންޑާރަނައިބު އަހުމަދު އުޝާމް މި ފޯރަމްގައި ދެއްކެވި ވާހަކަފުޅުގައި ފާހަގަ ކުރެއްވިއެވެ.
ޝަރީއަތް ނިމެންދެން ތިބި މީހުންގެ ތެރޭގައި މިހާރު ގިނައިން ތިބީ ޖިނާއީ ބޮޑެތި ކުށްތަކުގައި ތިބި މީހުންނެވެ. އެގޮތުން ކުޑަކުދިންނަށް ޖިންސީ ގޯނާ ކުރާ މީހުންނާއި، ޓެރަރިޒަމްގެ މައްސަލަތަކުގައި ބަންދު ކޮށްފައި ތިބި މީހުންނާއި، ބޮޑެތި މާރާމާރީއާއި، މަސްތުވާތަކެތި ޓްރެެފިކް ކުރުމާއި، މީހުން މެރުން ފަދަ ކުށްތަކުގައި ބަންދު ކޮށްފައި ތިބި މީހުން އޭގެ ތެރޭގައި ހިމެނެއެވެ.
ވާނުވާ ބަންދުގެ މައްސަލަ ޙައްލު ކުރުމަށް ޤާނޫނު އިސްލާޙު ކުރި ނަމަވެސް ޖުމުލަ ހައްލެއް ނުލިބޭނެ ކަމަށާއި، އެ މައްސަލަ ހައްލުވާނީ ޝަރީއަތްތައް އަވަސް ވެގެންކަމަށްވެސް އުޝާމް ވިދާޅުވެފައިވެއެވެ.
އުޝާމް ވިދާޅުވީ، ކްރިމިނަލް ކޯޓަށް ދިމާވެފައިވާ ޖާގައިގެ ދަތިކަން ހައްލު ކުރުމަށް މިހާރު އަމަލީ މަސައްކަތްތައް ކުރެވެމުންދާ ކަމަށާއި، ވޭތުވެދިޔަ 10 އަހަރު ތެރޭގައިވެސް މި މައްސަލައަށް އެކަށީގެންވާ ހައްލެއް ހޯދިފައިނުވާ ކަމަށެވެ.
އެހެންނަމަވެސް މިހާރު ހުޅުމާލޭގައި ކްރިމިނަލް ކޯޓަށް ޖާގަ ހަމަޖެއްސުމަށްޓަކައި އިމާރާތުގެ މަރާމާތު މަސައްކަތް ކުރިއަށްދާކަން ފާހަގަ ކުރައްވައި އުޝާމް ވިދާޅުވީ، ވަރަށް އަވަހަށް އެ މައްސަލަ ހައްލު ކުރެވޭނެ ކަމަށެވެ.
އެހިސާބުން މައްސަލަތައް ކުރިއަށް ގެންދިއުމަށް އެއްވެސް ބަހަނާއެއް ނޯންނާނެކަމަށްވެސް އުޝާމް ވިދާޅުވިއެވެ.
