މާލެ ސަރަޙައްދުގެ ބިދޭސީންގެ މައުލޫމާތު މާރޗު 15 ވަނަ ދުވަހުގެ ކުރިން އަޕްޑޭޓްކުރަން ޖެހޭނެކަމަށް ދާޚިލީ ސަލާމަތާއި ފަންނިއްޔަތާ ބެހޭ ވުޒާރާއިން ބުނެފިއެވެ.
އެ ވުޒާރާއިން ބުނީ، ގްރޭޓަރ މާލެ ސަރަޙައްދުގައި ވަޒީފާ އަދާކުރާ އެންމެހައި ބިދޭސީންގެ ބައޯމެޓްރިކްސް އަޕްޑޭޓް ކުރުމުގެ މަސައްކަތް މިއަހަރުގެ މާރޗު މަހުގެ 15 ވަނަ ދުވަހުގެ ކުރިން ވަޒީފާދޭ ފަރާތުން މިނިސްޓްރީގެ ޑިޕާޓްމަންޓް އޮފް ފޮރިން ލޭބަރ އާ ގުޅިގެން ކުރިއަށް ގެންދަންޖެހޭނެ ކަމަށެވެ. އެގޮތުން މާލެ ސަރަޙައްދުގައި ހިމެނޭ މާލެ، ހުޅުމާލޭ ފޭސް 1، ފޭސް 2، ވިލިމާލެ، ތިލަފުށި، ގުޅިފަޅު ހިމެނޭނެއެވެ.
މިނިސްޓްރީން މައުލޫމާތު ދޭ ގޮތުގައި މި މުއްދަތުގެ ތެރޭގައި ބައޯމެޓްރިކްސް އަޕްޑޭޓް ނުކުރާ ފަރާތްތައް އެކްސްޕެޓް ސިސްޓަމްއިން ސަސްޕެންޑުކޮށް ޚިދުމަތް މެދުކަނޑާލެވޭނެއެވެ.
އޭގެ އިތުރުން، ގްރޭޓަރ މާލެ ސަރަޙައްދުގައި ބިދޭސީންގެ ބައޯމެޓްރިކްސް ނެގުމާއި، އޮޕަރޭޝަން ކުރަނގީގެ ދަށުން ސަރުކާރުން ތަންފީޒުކުރުމަށް އެކަށައެޅިފައިވާ އެންމެހައި ކަންކަން ވިލަރެސްކޮށް ކޯޑިނޭޓް ކުރަމުންދާނީ އެންސީއައިޓީގައި އެ އޮޕަރޭޝަނަށް ޚާއްސަކޮށް ޤާއިމުކޮށްފައިވާ ޖޮއިންޓް އޮޕަރޭޝަން ސެންޓަރުންކަމަށްވެސް މިނިސްޓްރީން ފާހަގަކުރެއެވެ.
އެ ސެންޓަރުން ޚިދުމަތް ދެމުންދާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 09:00ން ރޭގަނޑު 22:00 އަށެވެ.
ރާއްޖޭގައި ގަވައިދާ ހިލާފަށް އުޅެމުންދާ ބިދޭސީން ހިފެހެއްޓުމަށް އިމިގްރޭޝަނުން ކުރަމުންދާ މަސައްކަތުގެ ތެރެއިން، މާލެއާއި ކައިރި ބައެއް އަތޮޅުތަކުގައި ވެސް އިމިގްރޭޝަން ހަރަކާތްތެރިވި އެވެ.
ބިދޭސީން އާންމުކޮށް ކުރަމުންދާ ވިޔަފާރީގެ ތެރޭގައި ހިމެނޭ ކާބޯތަކެތި ތައްޔާރު ކުރުކޮށް ވިއްކާ މައްސަލަތައް ވެސް އިމިގްރޭޝަނުން ބަލާފައި ވެއެވެ. އަދި މިފަދަ ގިނަ ގޮޅިތައް ބަލައި ފާސްކުރުމަށް ފަހު، ބިދޭސީންތަކެއް އަތުލައިގަތެވެ.
އެންމެ ފަހުން އިމިގްރޭޝަނުން އޮޕަރޭޝަނެއް ފަށާފައި ވަނީ އާންމު ސަރަހައްދުތަކުގައި ބިދޭސީން ހަމަނުޖެހުން އުފައްދާ ސަރަހައްދުތަކުގަ އެވެ. މި މަސައްކަތް ފަށާފައި ވަނީ އާންމު ސަރަހައްދުތަކަށް އެއްވެ އުޅޭ ބިދޭސީންގެ މެދުގައި އާންމު މަސްލަހަތު ގެއްލޭ ކަންތައްތައް ހިނގައި ތަކުރާރުވަމުންދާ ވަގުތެއްގަ އެވެ. އެގޮތުން އެ ސަރަހައްދުގައި މި ހަފްތާގައި މޮނީޓަރ ކުރަން ފަށާފައިވާއިރު އޭގެ ތެރޭގައި އާޓިފިޝަލް ބީޗާއި، ރަސްފަންނުގެ އިތުރުން ބައެއް ޕާކިން ޒޯން ސަރަހައްދުތައް ހިމެނެ އެވެ.
