އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް)ގެ ސަރޖަރީތައް ހުއްޓާލާފައިވާކަމަށް ސޯޝަލް މީޑިއާގައި ފެތުރެމުންދާ ޚަބަރުތަކަކީ ދޮގު ހަބަރުތަކެއް ކަމަށާއި ސަރޖަރީތައް ޝެޑިއުލް ކޮށްފައިވާގޮތަށް ކުރިއަށްދާ ކަމަށް އެ ހޮސްޕިޓަލުން ބުނެފިއެވެ.
ސޯޝަލް މީޑިއާގައި ބައެއް ފަރާތްތަކުން އަންނަނީ އެ ހޮސްޕިޓަލުގައި އޮޕަރޭޝަންތަކަށް ބޭނުންކުރާ މުހިންމު ކޮންސިއުމަބަލްތަކުގެ ސްޓޮކް ހުސްވެފައިވާ ކަމަށް ބުނެ ހަބަރުތައް ފަތުރަމުންނެވެ. މިކަމާއި ގުޅިގެން އެކްސްގައި ޕޯސްޓެއް ހިއްސާކޮށް އައިޖީއެމްއެޗުން ބުނެފައިވަނީ އެ ހޮސްޕިޓަލުގެ އެއްވެސް ސަރޖަރީއެއް މިވަގުތު ހުއްޓާލާފައި ނުވާކަމުގެ ޔަޤީންކަން އަރުވާ ކަމަށެވެ.
އާއްމު ރައްޔިތުންނަށް އޮޅުންއަރާ ގޮތަށް، މިފަދަ ހަޤީޤަތާ ޚިލާފު މަޢުލޫމާތު ސޯޝަލް މީޑިއާގައި ފަތުރަމުންދާތީ، އެކަން ހަރުކަށި ޢިބާރާތުން ކުށްވެރިކޮށް ޒިންމާދާރުކަމާ އެކު މަޢުލޫމާތު ފެތުރުމަށް ނަޞޭޙަތްތެރިވާ ކަމަށް ވަނީ ބުނެފައެވެ. އޮޕަރޭޝަންތަކަށް ބޭނުންވާ ކޮންސިއުމަބަލް ވެސް ސްޓޮކުގައި ހުރި ކަމަށްވެސް އެ ހޮސްޕިޓަލުން ވަނީ ބުނެފައެވެ.
