ހުޅުމާލޭގައި ތަރައްގީކުރަމުން އަންނަ ކޭ-ޕާކް ފްލެޓްތަކުގެ މައްސަލާގައި އުފުލާފައިވާ ދައުވާތަކުގެ އަޑުއެހުމެއް އާދިއްތަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ދައުވާ އުފުލާފައިވަނީ ޙަސަން މަމްދޫހު(މަންޑޭ) ގެ އިތުރުން ޖައިޝާން ސައީދުގެ މައްޗަށެވެ. މަމްދޫޙުގެ މައްޗަށް 104 ދައުވާއެއް ކުރުމަށް ކޯޓަށް ހުށަހަޅާފައިވެއެވެ. އަދި ޖައިޝާން ސައީދުގެ މައްޗަށް 97 ދައުވާއެއް ކުރުމަށް ކޯޓަށް ހުށަހަޅާފައިވެއެވެ.
ކްރިމިނަލް ކޯޓުގައި މި މައްސަލަ ބައްލަވަނީ ގާޒީ އަލީ ނަދީމްއެވެ.
މި އަޑުއެހުމުގައި މަމްދޫޙު ހާޒިރުވެފައިވަނީ ވަކީލަކާ ނުލައެވެ. އެކަމާމެދު ގާޒީ ސުވާލު ކުރެއްވުމުން މަމްދޫޙު ބުނީ، އޭނާގެ ވަކީލުން މައްސަލައިން ވަކިވެފައިވާ ކަމަށާއި، މައްސަލައިގައި ކުރިއަށްދާން ބޭނުންވަނީ ވަކީލަކާއެކު ކަމަށެވެ. ނަމަވެސް މި އަޑުއެހުމަށް ވަކީލަކާ ނުލައި ހާޒިރުވީ ވަކީލަކު އައްޔަނު ކުރުމުގެ ތަނަވަސްކަމެއް ނެތުމުންކަމަށްވެސް މަމްދޫހު ފާހަގަކުރިއެވެ.
މަމްދޫހު ބުނީ، ވަކީލަކު އައްޔަނު ކުރުމުގެ މަސައްކަތް އޭނާގެ އާއިލާއިން ކުރަމުންދާކަމަށެވެ.
މައްސަލަ ބައްލަވާ ގާޒީ ވަނީ މަމްދޫޙުގެ އެދުމުގެ މަތިން އޭނާއަށް ވަކީލަކު އައްޔަނު ކުރުމަށް އަނެއްކާވެސް ފުރުސަތެއް ދެއްވާފައެވެ.
އޭގެ އިތުރުން، މި އަޑުއެހުމުގައި ދުރާލާ ޗިޓް ފޮނުވިފައިވާ ކަމަށާއި، އެހެންކަމުން ވަކީލަކު އައްޔަނު ކުރުމަށް ފުރުސަތުވެސް ދެވިފައިވާ ކަން ގާޒީ ފާހަގަ ކުރެއްވިއެވެ.
ހަމައެއާއެކު، ޝަރީއަތް ކުރިއަށް ގެންދަން ދަތިވާގޮތަށް މަމްދޫޙު އަމަލުކުރަމުންދާކަމަށް ފާހަގަ ކުރެވޭކަމަށްވެސް ގާޒީ ވިދާޅުވިއެވެ. ގާޒީ ވަނީ އެކަން އެގޮތަށް ނުކުރުމަށް އިރުޝާދު ދެއްވާފައެވެ.
މި އަޑުއެހުމަކީ މި މައްސަލައިގެ އިފްތިތާހީ ބަޔާން ހުށަހަޅައި، ޝަރީއަތް ފެށުމަށް ބޭއްވި އަޑުއެހުމެކެވެ. އެންމެ ފުރަތަމަ ދައުލަތުން ވަނީ އިފްތިތާޙީ ބަޔާން އިއްވާފައެވެ. އެއަށްފަހު ޖައިޝާންގެ ފަރާތުންވެސް އިފްތިތާޙީ ބަޔާން އިއްވާފައިވެއެވެ.
ދެން އޮންނާނީ މި މައްސަލައިގެ ހެކިބަސް ނެގުމުގެ މަރުޙަލާއެވެ. އެގޮތުން ކޮންމެ ދުވަހަކުވެސް 7 ހެއްކެއްގެ ހެކިބަސް ނެގުމަށް މަސައްކަތް ކުރައްވާނެކަން ގާޒީ ފާހަގަ ކުރެއްވިއެވެ.
މި މައްސަލައިގައި ކޯޓުގައި އުފުލާފައިވާ ދައުވާތަކުގައި، މީހަކަށް ކަމެއް އޮޅުވާލުމުގެ ނިޔަތުގައި، އެނގިހުރެ، ސައްހަނޫން ލިޔުމެއް ދިނުމުގެ ކުށުގެ ދައުވާއާއި، ޓެކުމާއި، ޓެކުމުގައި ބައިވެރިވުމުގެ ކުށުގެ ދައުވާގެ އިތުރުން، މަނީ ލޯންޑްރިންގއާއި މަނީ ލޯންޑަރކުރުމަށް އެހީތެރިވުމުގެ ކުށުގެ ދައުވާތަކެއް ހިމެނެއެވެ.
މަމްދޫހުގެ ވަކީލުން ނެރުނު ބަޔާނުގައި ވާގޮތުން އެ މަޝްރޫއު ހިންގުމަށް ހަވާލުކޮށްފައިވަނީ މަމްދޫހު އާއި، ކޮރެއާ ރައްޔިތެއް ހިއްސާވާ ހަންބޯ ކޮމްޕެނީ ލިމިޓެޑް (ހަންބޯ ޓެކް) ކުންފުންޏާއެވެ. އަދި، ޗައިނާގެ ޖިންޝީ ހޫގެ ހިއްސާ އޮންނަ ހަންބޯ މޯލްޑިވްސް އަކީ އެ މަސައްކަތުގެ ލޮޖިސްޓިކްސް ކަންކަން ހަމަޖެއްސުމަށް އެކުލަވާލި ލޯކަލް ކުންފުންޏެއް ކަމަށެވެ.
ހަންބޯ މޯލްޑިވްސްގެ ޗައިނާ ހިއްސާދާރު، ޖިންޝީ ހޫއަށް ބޮޑެތި ތުހުމަތުތަކެއް ކޮށް ބަޔާނުގައި ވާ ގޮތުން، ކޮވިޑާއި ހަމައަށް ކޭޕާކު ފްލެޓުތަކުގެ މަސައްކަތްތައް ހިނގަމުން ދިޔައީ ވަރަށް ރަނގަޅަށެވެ. ނަމަވެސް މަމްދޫހުއާއި ޖިންޝީ ހޫ ދެއާމެދު މައްސަލަ ޖެހުނު ހިސާބުން ހޫ ހަންބޯ ޓެކުގެ އޮފީހަށް ވަދެ، މަމްދޫހުއާއި ދެމެދު މާރާމާރީވެސް ހިންގިއެވެ. އަދި އޮފީހުގައި ހުރި ބައެއް ލިޔެކިޔުންތައް ވަގަށް ގެންގޮސްފައިވާކަމަށްވެސް ބަޔާނުގައިވެއެވެ.
