ރައީސުލްޖުމްހޫރިއްޔާ ޑރ. މުހައްމަދު މުއިއްޒު އެސްޓޯނިއާއަށް ކުރެއްވި ރަސްމީ ދަތުރުފުޅަށް 1.4 މިލިއަން ރުފިޔާ ހަރަދުވެފައިވާ ކަމަށް ރައީސް އޮފީހުން ބުނެފިއެވެ.
މިއަހަރުގެ ޖެނުއަރީ މަހުގެ 13 ވަނަ ދުވަހުން 17އާއިހަމައަށް ރައީސް ކުރެއްވި ދަތުރުފުޅުގެ ހަރަދު އަދު މުހިންމު މައުލޫމާތު ހިއްސާކޮށް ރައީސް އޮފީހުން ބުނެފައިވަނީ އެ ދަތުރުފުޅަށް ދިވެހި ސަރުކާރުން 1،371،069.18 (އެއް މިލިއަން ތިން ލައްކަ ހަތްދިހަ އެއްހާސް ފަސްދޮޅަށް ނުވަ ރުފިޔާ / އަށާރަ ލާރި) ހޭދަކޮށްފައިވާ ކަމަށެވެ.
އެސްޓޯނިއާ ދަތުރުފުޅުގެ ތެރެއިން އިޔާދަކުރަނިވި ހަކަތައާއި ޑިޖިޓަލް އީޖާދުތަކާއި ތިމާވެށީގެ ވިލުންތެރިިކަމުގެ ދާއިރާއިން އެއްބާރުލުން ދިނުމަށް ފަހުމުނާމާއެއްގައި ވަނީ ސޮއިކޮށްފައެވެ. އަދި އެ ގައުމުގެ އެކިއެކި ވަޒީރުންނާއި ގާނޫނު ހަދާ މަޖިލީހުގެ ރައީސް ލޯރީ ހުއްސާރާއާ ވެސް ވަނީ ބައްދަލުކުރައްވާފައެވެ.
މި ދަތުރުފުޅުގައި ރައީސް އަރިހުގައި ޚާރިޖީ ވަޒީރު ޑރ. ޢަބްދުﷲ ޚަލީލާއި، ދާޚިލީ ސަލާމަތާއި ފަންނިއްޔާތާބެހޭ ވަޒީރު ޢަލީ އިޙުސާން ވަނީ ބައިވެރިވެވަޑައިގަންނަވާފައެވެ.
ރައީސްގެ މި ދަތުރުފުޅަކީ އެސްޓޯނިއާގެ ރައީސް ޑރ. އަލާރާ ކަރިސްގެ ދަޢުވަތަކަށް ކުރެއްވި ރަސްމީ ދަތުރުފުޅެކެވެ. މި ދަތުރުފުޅަކީ ޑިޖިޓަލް އިނޮވޭޝަން، ސައިބާ ސެކިއުރިޓީ އަދި އީ-ގަވާނެންސް ފަދަ ދާއިރާތަކުން ދިވެހިރާއްޖެއާއި އެސްޓޯނިއާއާ ދެމެދު ގުޅުން ބަދަހިކޮށް، އިލްމު ހިއްސާކުރުމުގެ ބޭނުމުގައި ކުރެއްވި ދަތުރުފުޅެއްކަމަށް ސަރުކާރުން ވަނީ ބުނެފައެވެ.
