ޑީއާރުޕީ އުވާލިއިރު އެ ޕާޓީން ރައްޔިތުންގެ މަޖިލީހުގެ ކުރީގެ މެމްބަރު އަހުމަދު އާމިރަށް ދައްކަން ޖެހޭ ފައިސާ ނުދައްކައި އޮތް މައްސަލަ ކުރިޔަށް ނުގެންދެވޭނެކަމަށް ސިވިލް ކޯޓުން ނިންމައިފިއެވެ.
މިއީ އާމިރުގެ ދެ ސްޓޫޑިއޯއަކުން 2008 ގެ ރިޔާސީ އިންތިހާބުގެ ދުވަސްވަރު ފޯރުކޮށްދިން ހިދުމަތަކަށް އޭނާއަށް 19 މިލިއަން ރުފިޔާ ދައްކަން ޖެހޭނެކަމަށް ސިވިލް ކޯޓުން ހުކުމް ކުރި މައްސަލައެކެވެ. އެކަމަކު އެ މައްސަލައިގައި ފަހުން ހައިކޯޓުން ނިންމީ އެ ޕާޓީން ދައްކަން ޖެހޭނީ 4 މިލިއަން ރުފިޔާކަމަށެވެ.
މި މައްސަލަ ހިމެނޭހެން ޑީއާރުޕީގެ ގިނަ ދަރަނިތަކެއް އޮއްވައި އެ ޕާޓީ އިލެކްޝަންސް ކޮމިޝަނުން އުވާލީ 2022 ވަނަ އަހަރުއެވެ.
ކޯޓުގެ ހުކުމާއި އެއްގޮތަށް ޑީއާރުޕީގެ ފައިސާ ލިބިފައި ނުވާތީ، އެ ނިންމުން ތަންފީޒުކޮށްދިނުމަށް އެދި އާމިރުގެ ފަރާތުން އަނެއްކާވެސް ކޯޓަށް ހުށަހެޅީ އެވެ.
މި މައްސަލައިގައި ކޯޓުން ކުރި ހުކުމުގައި ވަނީ ދިވެހި ރައްޔިތުންގެ ޕާޓީގެ ނަމުގައި އެއްވެސް ބޭންކެއްގައި ފައިސާއެއް، ނުވަތަ ވިޔަފާރިއެއް ވެސް ނެތްކަމަށެވެ.
ކޯޓުން ސާފުކުރި މައުލޫމާތުތަކުގެ ތެރޭގައި އިލެކްޝަންސް ކޮމިޝަނުން ޑީއާރުޕީއަށް ދޫކުރަން ޖެހޭ އެއްވެސް ފައިސާއެއް ހުރިތޯއާއި އެންމެ ފަހުން އެ ޕާޓީއަށް ފައިސާއެއް ދޫކުރި ތާރީހަކީ ކޮބައިތޯ ބެލުން ހިމެނެއެވެ. ކޯޓުގެ ހުކުމުން އެނގޭ ގޮތުގައި އެ ޕާޓީއަށް އެންމެ ފަހުން ކޮމިޝަނުން ފައިސާ ދޫކުރީ 2015 ގައެވެ.
ޑީއާރުޕީއަކީ މިހާރު އުވާލާފައިވާ ޕާޓީއަކަށްވާއިރު، މައްސަލައިގެ ބޭނުމަށް އެ ޕާޓީ ވުޖޫދުކޮށް ހުކުމް ތަންފީޒު ކުރުމުގެ ބޭނުމަށް ސާބިތު ދަރަނީގެ ފައިސާ ކޯޓު މެދުވެރިކޮށް ހޯދިދާނެކަމަށް ނުފެންނަކަމަށް ހުކުމުގައި ވެއެވެ.
މި މައްސަލަ ސިވިލް ކޯޓުގައި ބެއްލެވީ ގާޟީ އަހުމަދު އަބްދުލްމަތީނެވެ.
ޑީއާރުޕީ މީގެ ތިން އަހަރު ކުރިން އުވާލާފައި ވަނީ ސިޔާސީ ޕާޓީއެއްގައި ހަމަވާން ޖެހޭކަމަށް ބުނާ 3000 މެމްބަރުން ނެތުމުންނެވެ. އެ ނިންމުން ނިންމިއިރު ކުންފުނިތައް ހިމެނޭ ގޮތަށް ވަކި ފަރުދުންތަކަށް ވެސް ދޭން ޖެހޭ ފައިސާ މިލިއަނުން ހުއްޓެވެ.
ޑީއާރުޕީއާއި ގުޅުން ހުރި ދަރަނީގެ އިތުރު މައްސަލައެއްގެ ގޮތުގައި ދެން ފާހަގަކުރެވެނީ އެމްޓީސީސީއަށް އެ ޕާޓީ ދައްކަން ޖެހޭ 1 މިލިއަނަށް ވުރެ ގިނަ ރުފިޔާގެ މައްސަލަ އެވެ. އެ ފައިސާ ހޯދުމަށް ކުންފުނިން ހުށަހެޅި މައްސަލައިގައި އެދުނީ ދަރަންޏަށް އެ ޕާޓީގެ ބާނީ، ކުރީގެ ރައީސް މައުމޫން އަބްދުލްގައްޔޫމް ޒިންމާ ކުރުވުމަށެވެ. އެހެން ނަމަވެސް އެ މައްސަލަ ރައީސް މައުމޫންގެ ފަރާތުން ވަނީ ސުޕްރީމް ކޯޓުގައި އިސްތިއުނާފު ކުރައްވާފައެވެ.
