އިންޑިއާގެ އެކްސްޓާނަލް އެފެއާޒްއާއި ބެހޭ މިނިސްޓްރީގެ އިސް އޮފިޝަލުންތަކެއް ތިލަމާލެ ބްރިޖުގެ މަސައްކަތް ކުރިޔަށް ދާ ގޮތް ބައްލަވާލައްވައިފި އެވެ.
ބްރިޖުގެ މަސައްކަތުގެ ތެރެއިން މިހާރު ކުރިޔަށް ދަނީ ވިލިމާލެއާއި ދިމާލުން އެއް ތަނބު އަނެއް ތަނަބާއި ގުޅުވާލުމަށް ބޭނުންވާ ޕްރީ ކާސްޓުގެ މަސައްކަތެވެ. ޝެޑިއުލްއާއި އެއްގޮތަށް މަސައްކަތް ކުރިޔަށް ގެންދެވޭނަމަ، މި އަހަރުގެ ކުރީކޮޅު މާލެ – ވިލިމާލެ ގުޅުވާލެވޭނެކަމަށް މިނިސްޓްރީން ލަފާކޮށްފައިވެއެވެ.
ރައީސް ޑރ. މުހައްމަދު މުއިއްޒުގެ ސަރުކާރުން ލަފާ ކުރާ ގޮތުގައި، ތިލަމާލެ ބްރިޖުގެ މަސައްކަތް އެއްކޮށް ނިންމާލެވޭނެކަމަށް ބެލެވެނީ 2026 ގަ އެވެ.
ގްރޭޓާ މާލެ ކަނެކްޓިވިޓީ ޕްރޮޖެކްޓު” ނުވަތަ “ތިލަ މާލެ” ބްރިޖުގެ ނަމުން ނަންދީ ކުރިޔަށް ގެންދާ މަޝްރޫއުގެ އެކި ސާވޭތައް ކުރިޔަށް ގެންގޮސް ތާފާތު ތާރީހުތަކެއް ދިން ނަމަވެސް ރައީސް އިބްރާހިމް މުހައްމަދު ސޯލިހުގެ ސަރުކާރު ނިމިގެން ދިޔައީ ބްރިޖުގެ އެއްވެސް ފޭސްއެއް ނިންމާނުލެވި އެވެ.
މި މަސައްކަތް ކުރިޔަށްދާ ގޮތް އިންޑިއާގެ އެކްސްޓާނަލް އެފެއާޒް މިނިސްޓަރ ޖައިޝަންކަރުގެ ދަތުރުފުޅުގައި ވެސް ބައްލަވާލެއްވި އެވެ.
އިންޑިއާގެ ޓީމަކުން ބްރިޖުގެ މަސައްކަތް ކުރިޔަށް ދާގޮތް ބައްލަވާލެއްވި އިރު، ދިވެހި ސަރުކާރުގެ ފަރާތުން ކޮންސްޓްރަކްޝަން މިނިސްޓްރީއާއި ފޮރިން މިނިސްޓްރީގެ އިސްބޭފުޅުން ވެސް އެކުގައި ވަޑައިގަތެވެ.
މި ދަތުރުގައި ބްރިޖްގެ މަސައްކަތް ކުރިއަށްދާ މިންވަރު ބެއްލެވުމުގެ އިތުރުން، މަޝްރޫޢުގެ މަސައްކަތް އަވަސްކުރުމަށްޓަކައި އެޅިދާނެ ފިޔަވަޅުތަކާއި ބެހޭގޮތުން ވަނީ މަޝްވަރާކޮށްފައެވެ. އަދި މަޝްރޫޢު ނިންމުމަށް ކަނޑައަޅާފައިވާ މުއްދަތުގައި ނިންމުމަށް ކުރެވިދާނެ ކަންކަމާއި ބެހޭގޮތުންވެސް ވާހަކަދެކެވުނެވެ.
މަޝްރޫއު ކުރިޔަށް ދާގޮތް ރައީސް މުއިއްޒާއި، މިނިސްޓަރ އަދި ކެބިނެޓު ވަޒީރުން ވަނީ މީޑިއާތަކުގެ ހާޒިރުގައި ވެސް ބައްލަވާލައްވާފަ އެވެ. ތިލަމާލެ ބްރިޖުގެ މަސައްކަތް ކުރިޔަށް ގެންދަނީ ވަރަށް ލަސްކޮށްކަމަށް ވާތީ، މަޝްރޫއު އަވަސްކޮށްދޭން އިންޑިއާގެ ސަރުކާރުގައި ރައީސް މުއިއްޒު ވަނީ އެދިވަޑައިގެންފަ އެވެ.
7.7 ބިލިއަން ރުފިޔާ ހަރަދުކޮށް ކުރިޔަށް ގެންދާ މި މަޝްރޫއަށް ދިވެހި ސަރުކާރުން ވަނީ އިންޑިއާގެ އެގްޒިމް ބޭންކުން 400 މިލިއަން ޑޮލަރުގެ ލޯނެއް ނަގައިފައެވެ. އަދި އިންޑިއާ ސަރުކާރުން ހިލޭ އެހީގެ ގޮތުގައި 100 މިލިއަން ޑޮލަރުވެސް ހޯދާއިފައި ވެއެވެ.
އެއަށް ފަހު ރައީސް މުއިއްޒު ސަރުކާރުން ވެރިކަމާއި ހަވާލުވުމަށް ފަހު އާންމު ކުރި މައުލޫމާތުތަކުން އެނގުނު ގޮތުގައި، ރައީސް ސޯލިހު ވަނީ ދައުރު ނިމުމާއި ގާތްވެފައި ވަނިކޮށް އެއްބަސްވުން އިތުރުކޮށް 2026، ސެޕްޓެމްބަރ 30 އަށް ދަންމާލާފަ އެވެ.
