ރާއްޖޭގައި އުޅޭ ހިންދޫންގެ ބަޔަކު އިސްވެ، އެ މީހުންގެ އީދެއް ފާހަގަކުރަން އުޅެނިކޮށް ފުލުހުން އެކަން ހުއްޓުވައިފި އެވެ.
ޕޮންގަލްގެ ނަމުގައި ކުރިޔަށް ގެންދަން ރޭވި އެ ހަރަކާތާއި ގުޅޭ ސޯޝަލް މީޑިއާ ޕޯސްޓުތައް ވެސް ދައުރުކޮށް، ޕްރޮމޯޓު ކުރާތާ ގިނަ ދުވަސްތަކެއް ވަނީވެފަ އެވެ. އަދި އާންމުން ވެސް އެ މައްސަލަ އެކި ފަހަރުމަތީން ފުލުހަށް ހުށަހެޅީ، އާންމު މުޖްތަމައުގައި އެ ހަރަކާތް ކުރިޔަށް ގެންދިއުމަށް ރާވާފައިވާތީ އެވެ.
ހުޅުމާލެ ސިންތެޓިކް ޓްރެކުގައި ބާއްވަން މަސައްކަތް ކުރި އެ ހަރަކާތް ހުއްޓުވާފައިވާކަމަށް ފުލުހުން ބުނި ފަހުން އަނެއްކާވެސް ތާރީހު ގާތްކޮށް ޕޯސްޓަރުތައް ދައުރު ކުރަން ފެށުމުން ނޫސްވެރިން ވަނީ ފުލުހުންނާއި ސުވާލު ވެސްކޮށްފައެވެ.
މި މައްސަލައިގައި ފުލުހުން އާންމު ކުރި ބަޔާނުގައި ބުނީ އަންނަ ހުކުރު ދުވަހު ”ޕޮންގަލް 2025“ ގެ ނަމުގައި ބޭއްވުމަށް މަސައްކަތް ކުރަމުން ދިޔަ ހަރަކާތް ކުރިޔަށް ނުގެންދެވޭނެކަމަށް އެކަން އިންތިޒާމު ކުރި ފަރާތްތަކަށް އެންގިކަމަށެވެ. އަދި ފެސްޓިވަލް ކެންސަލް ކުރިކަމަށް މިހާރު މައުލޫމާތު ދީފައިވާކަމަށް ފުލުހުން ބުންޏެވެ.
ބަޔާން ނިންމާލައި ފުލުހުން ވަނީ މިފަދަ އެއްވެސް ހަރަކާތެއް ގެންދިއުމަށް ބަޔަކު ރާވާނަމަ އެކަމެއް ހުއްޓުވާނެކަމުގެ ޔަގީންކަން ދީފައެވެ.
