ރަށްރަށުގައި ދިރިއުޅޭ ރައްޔިތުންނަށް ލުއިފަސޭހަކަން ހޯދައިދިނުމަށް ގެނެވޭ ތަރައްޤީގެ ސަބަބުން، ރަށްރަށުގައި ޤުދުރަތީ ގޮތުން އޮތް ތިމާވެށްޓާ ރައްޓެހި މާހައުލު ގެއްލިގެން ގޮސްފައިވާ ކަމަށް ސިޓީތަކާއި އިދާރީ ދާއިރާތަކުގެ ވަޒީރު އާދަމް ޝަރީފު ޢުމަރު ވިދާޅުވެއްޖެއެވެ.
ރާއްޖޭގެ އުފާވެރިކަން ވަޒަންކުރުމަށް އެކުލަވާލެވުނު ”ހެޕިނަސް އިންޑެކްސް“ ތަޢާރަފުކުރުމުގެ ރަސްމިއްޔާތުގައި ވާހަކަފުޅު ދައްކަވަމުން، މި އިންޑެކްސް ތަންފީޒުކުރެވޭނީ ކައުންސިލްތަކާ ގުޅިގެންކަމަށާއި، މިކަމަށް ކައުންސިލްތައް އަހުލުވެރިކުރުވުމުގެ މަސައްކަތް ސިޓީސް މިނިސްޓްރީން ކުރިއަށް ގެންދާނެކަމަށް ވިދާޅުވިއެވެ. އަދި އިންޑެކްސްގެ ދަށުން ރަނގަޅު ނަތީޖާ ހާސިލުކުރާ ރަށްތަކަށް އިނާމު ދިނުމުގެ ނިޒާމެއް ޤާއިމުކުރުމުގެ މުހިންމުކަންވެސް ފާހަގަކުރެއްވިއެވެ.
ވަޒީރު އިތުރަށް ފާހަގަކުރެއްވި ގޮތުގައި، ރައްޔިތުންގެ ދިރިއުޅުމަށް ފަސޭހަކަން ހޯދައިދިނުމަށް ހެދޭ ބަނދަރުތަކާއި މަގުތަކުގެ ސަބަބުން، ރަށްރަށުގައި ޤުދުރަތީ ގޮތުން އޮތް ތިމާވެށްޓާ ރައްޓެހި މާހައުލު މިހާރު ވަނީ ބަދަލުވެފައެވެ.
މި އިންޑެކްސްގެ ދިރާސާތަކުގެ ބައިވެރިއަކީ ދިވެހިރާއްޖޭގެ އިސްލާމިކް ޔުނިވަރސިޓީ ކަމަށާއި، މިކަމާ ގުޅޭގޮތުން ތިން މަސައްކަތު ބައްދަލުވުން ވޭތުވެދިޔަ އަހަރު ބޭއްވިފައިވާކަން ފާހަގަކޮށްލެވެއެވެ. މި މަޝްރޫޢަކީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ އިރުޝާދުގެ ދަށުން ވަޒީރު އާދަމް ޝަރީފު ޢުމަރުގެ އިސްނެންގެވުމުގައި ސިޓީސް މިނިސްޓްރީން ކުރިއަށް ގެންދާ މަސައްކަތެކެވެ.
