އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ އަންހެނުން ސާރާ ނަތަންޔާހޫއާ ދެކޮޅަށް ޖިނާއީ ތަހުގީގެއް ފަށައިފިއެވެ.
ސާރާ ނަތަންޔާހޫއާ ދެކޮޅަށް އިޒްރޭލުގެ ފުލުހުން ޖިނާއީ ތަހުގީގެއް ހިންގަން ފަށާފައިވާކަން އެ ޤައުމުގެ ސްޓޭޓް އެޓަރނީ އޮފީހުން އާންމުކުރި ލިއުމެއްގައި ވަނީ ކަށަވަރު ކޮށްދީފައެވެ.
އޭނާގެ މައްޗަށް މި ތަހުގީގު ހިންގަނީ ނަތަންޔާހޫގެ މައްޗަށް ކުރެވޭ ކޮރަޕްޝަންގެ ތުހުމަތުތަކުގެ ޝަރީއަތަށް ނުފޫޒު ފޯރުވަމުންދާކަމަށް އެ ޤައުމުގެ ޤާނޫނުހަދާ މަޖިލީހުގެ މެމްބަރަކު ކުރި ތުހުމަތަކާ ގުޅިގެންނެވެ. އެގޮތުން އެ މައްސަލައިގެ މުހިއްމު ހެކިވެރިއަކަށް ސާރާ ބިރުދައްކާފައިވާކަމަށް އިޒްރޭލުގެ ޗެނަލް 12 އިން ކުރި ތަހުގީގެއްގައި ފާހަގަކޮށްފައިވެއެވެ.
މީގެ އިތުރުން، އެ މައްސަލައާ ގުޅިގެން އެ ޤައުމުގެ ބަންޑާރަނައިބާއި، އޭނާގެ ޑެޕިއުޓީންނާ ދެކޮޅަށް އެއްވުންތައް ރޭވުމުގައިވެސް ސާރާ އިސްކޮށް ޙަރަކާތްތެރިވެފައިވާކަމަށް އެ ޗެނަލްގެ ތަހުގީގުގައި ދައްކާފައިވެއެވެ.
ސާރާއާ ދެކޮޅަށް ތުހުމަތުކުރެވޭ މި މައްސަލައިގެ ޖިނާއީ ތަހުގީގު ހިންގަމުންދަނީ އިޒްރޭލުގެ ފުލުހުންނާއި ސްޓޭޓް އެޓަރނީ އޮފީހުގެ ސައިބަރ ޑިޕާޓްމަންޓް ގުޅިގެންނެވެ.
އިޒްރޭލުގެ ބޮޑުވަޒީރު ބެންޖަމިން ނަތަންޔާހޫގެ މައްޗަށް ހިންގަމުންދާ ކޮރަޕްޝަންގެ ޝަރީއަތްތަކަށް ބަލާއިރު، އޭނާގެ މައްޗަށް ރިޝްވަތު ދިނުމާއި، މަކަރާ ހީލަތް ހެދުން ފަދަ ދައުވާތަކާ ގުޅޭ ޝަރީއަތްތައް ހިމެނެއެވެ.
