އިމިގްރޭޝަން ވޮޗަށްލިބުނު މައުލޫމާތަކާއިއެކު ގިނަ އަދަދެއްގެ ބިދޭސީން ދިރިއުޅެމުންދިޔަ އިމާރާތެއް ބަލައިފާސްކޮށް ގަވައިދާ ހިލާފަށް އުޅެމުންދިޔަ ހަތް ބިދޭސީއަކު އިމިގްރޭޝަންގެ ބެލުމުގެ ދަށަށް ގެންގޮސްފިއެވެ.
އިމިގްރޭޝަނުން އެކްސްގައި ކުރި ޕޯސްޓެއްގައި ބުނެފައިވަނީ އެ އިމާރާތް ބަލައި ފާސްކޯށްފައިވަނީ ގަވައިދާ ޚިލާފަށް އުޅޭ ބިދޭސީންގެ މައްސަލަތައް ރިޕޯޓުކުރުމަށް ހުޅުވާފައިވާ އޮންލައިން ޕޯޓަލް އިމިގްރޭޝަން ވޮޗް އަށް ލިބުނު މައުލޫމާތަކާ ގުޅިގެން ކަމަށެވެ.
އިމިގްރޭޝަނުން އެ ރެއިޑް އޮޕަރޭޝަންގެ ވީޑިއޯއެއް ހިއްސާކޮށްފައިވާއިރު، އެ މީހުން ދިރިއުޅެމުންދިޔަ އިމާރާތް ހުންނަނީ ހީނާމާގޭ ޕާކިން ސަރަހައްދު ކައިރީގައެވެ.
މީގެ ކުރިން އިމިގްރޭޝަނުންވަނީ، ހީނާމާގެ ޕާކިން ސަރަހައްދަކީ ބިދޭސީންގެ ކޮންޓްރޯލް ވަރަށް ބޮޑަށް އޮންނަ ސަރަހައްދެއް ކަމަށް ބުނެ އާންމުންގެ ފަރާތުން އަބަދުވެސް ޝަކުވާތައް ލިބޭ ކަމަށް ބުނެފައެވެ. އެހެންވެ، މީގެ ކުރިން ވެސް އެ ސަރަހައްދުގައި އިމިގްރޭޝަނުން ޚާއްސަ އޮޕަރޭޝަންތައް ހިންގައިފައިވެއެވެ.
ދިވެހިރާއްޖޭގައި ގަވާއިދާ ހިލާފަށް އުޅޭ ބިދޭސީންގެ މައްސަލަ ހައްލުކުރުމަށް ދާހިލީ ސަލާމަތާއި ފަންނިއްޔާތާ ބެހޭ ވުޒާރާއިން އިސްނަގައިގެން އޮޕަރޭޝަން ކުރަނގީގެ ނަމުގައި ހަރަކާތެއް އަންނަނީ ހިންގަމުންނެވެ.
މި ހަރަކާތުގެ ތެރެއިން ބިދޭސީންގެ ބަޔޯމެޓްރިކް ޑޭޓާ ނެގުމުގެ މަސައްކަތް އަންނަނީ ކުރަމުންނެވެ. އަދި މާލޭގައި ތިބި ބިދޭސީންގެ މައުލޫމާތު އަދާހަމަކުރުމަށް ބިދޭސީންނަށް ވަޒީފާ ދޭ ފަރާތްތަކަށް އެ މިނިސްޓްރީއިން ވަނީ ދޮޅުމަހުގެ މުއްދަތެއް ދީފައެވެ.
