ފްލެޓުތަކާއި ގުޅޭ މައްސަލައެއްގައި އެންޓި ކޮރަޕްޝަން ކޮމިޝަން (އޭސީސީ) އިން ފުލުހުންގެ ވިޔަފާރި ކުންފުނި ޕޮލްކޯއަށް ރެއިޑުކޮށްފިއެވެ.
މަސައްކަތް ފެށިތާ އެތައް އަހަރެއް ހޭދަވެ، އެތައް މައްސަލައެއް ދިމާވި ފުލުހުންގެ ފްލެޓް މަޝްރޫއުގައި މަސައްކަތްކުރީ ވަކި ބަޔަކަށް ނާޖާއިޒު ފައިދާ ހޯދައިދިނުމަށް ކަމަށް ބެލެވޭތީ އެކަމުގައި ޝާމިލުވާ އެންމެން ހޯދައި ފިޔަވަޅު އެޅުމަށް އޭސީސީ އަށް ހުށަހެޅުމަށް އޮޑިޓާ ޖެނަރަލްގެ އޮފީހުން މީގެ ހަފްތާއެއް ކުރިން ވަނީ އަންގާފައެވެ. އަދި ތަހުގީގުގެ ބޭނުމަށް ޕޮލްކޯ ބަލައި ފާސްކުރަމުންދާކަމަށް މީޑިއާތަކުން ވަނީ ރިޕޯޓުކޮށްފަ އެވެ.
މި މައްސަލައިގައި ”ސަންގު“ އަށް މައުލޫމާތު ދެމުން އޭސީސީން ބުނެފައި ވަނީ މިވަގުތު ވެސް އެތަން ދަނީ ބަލައިފާސް ކުރަމުން ދާ ކަމަށެވެ. އެތަނުން އެއްވެސް ލިޔެކިޔުމެއް އޭސީސީން ގެންސޮސްފައިވޭތޯ ސުވާލު ކުރުމުން، ތަހުގީގަށް ބުރޫއަރާފަނެތީ އެކަމުގެ އިތުރު ތަފްސީލް ދެވެން ނެތްކަމަށް އެ ކޮމިޝަނުގެ އޮފިޝަލް ވިދާޅުވި އެވެ.
މަސައްކަތް ފެށިތާ އެތައް އަހަރެއް ހޭދަވެ، އެތައް މައްސަލައެއް ދިމާވި ފުލުހުންގެ ފްލެޓް މަޝްރޫއުގައި މަސައްކަތްކުރީ ވަކި ބަޔަކަށް ނާޖާއިޒު ފައިދާ ހޯދައިދިނުމަށް ކަމަށް ބެލެވޭތީ އެކަމުގައި ޝާމިލުވާ އެންމެން ހޯދައި ފިޔަވަޅު އެޅުމަށް އޭސީސީ އަށް ހުށަހެޅުމަށް އޮޑިޓާ ޖެނަރަލްގެ އޮފީހުން މީގެ ހަފްތާއެއް ކުރިން ވަނީ އަންގާފައެވެ.
”ބްލޫސް ހައުސިން“ގެ ނަމުގައި ފުލުހުންގެ ވެލްފެއާ ކުންފުނި ޕޮލްކޯއިން ހުޅުމާލޭ 1 ގައި އިމާރާތްކުރި ފްލެޓް މަޝްރޫއުއާ ގުޅިގެން ހަދާފައިވާ އޮޑިޓުގައި ބުނީ ފްލެޓް މަޝްރޫއުއަށް ބިލިއަނަކަށް ވުރެ ގިނަ ރުފިޔާ ހަރަދުކުކޮށްފައި ވާއިރު 355 މިލިއަނުގެ ގެއްލުން ވެފައިވާ ކަމަށެވެ.
ގިނަ މައްސަލަތަކެއް ފާހަގަކޮށްފައިވާ އެ ރިޕޯޓުގައިވާ ގޮތުން މަޝްރޫއުގެ މަސައްކަތް ކުރިއަށް ގެންދިއުމުގައި ކޮންޓްރެކްޓަރުންނާ އެކު ވެފައިވާ އެއްބަސްވުންތަކަށް އެކި ފަހަރު ބޮޑެތި ބަދަލުތައް ގެނައުމާއި ކޮންޓްރެކްޓަރުން ނިންމާ މަސައްކަތްތަކަށް ފައިސާ ދެއްކުމުގެ ބަދަލުގައި އެކި ނަންނަމުގައި ކޮންޓްރެކްޓަރުންނަށް ފައިސާ ދައްކާފައިވާ ކަމަށެވެ.
އެ މުއާމަލާތްތަކުގެ ތެރެއިން ކޮންޓްރެކްޓަރަށް ނުވަތަ ވަކި ބަޔަކަށް ނާޖާއިޒު ފައިދާއެއް ހޯދައިދިނުމުގެ މަގްސަދުގައި ކަމަށް ބެލެވޭތީ މިކަމުގައި ޝާމިލުވާ ހުރިހާ ފަރާތްތައް ހޯދައި ފިޔަވަޅު އެޅުމަށް، އޭސީސީ އާއި އެހެން ތަހުގީގީ އިދާރާތަކަށް ހުށަހެޅުމަށް ވަނީ ލަފާދީފައެވެ.
އެ ރިޕޯޓުގައި ބުނީ މަޝްރޫއުގެ މަސައްކަތްތައް ނުނިމި ލަސްވެގެން ދިއުމާއި ކޮންޓްރެކްޓަރަށް ސީދާ ފައިދާވާ ގޮތަށް އަދި ދައުލަތަށް ގެއްލުންވާ ގޮތަށް އަމަލުކޮށްފައިވާ ކަމަށެވެ. އެހެންވެ، އެކަންކަން ކުރިއަށް ދިޔައިރު ޕޮލްކޯގެ ޑިރެކްޓަރުންގެ ބޯޑުގައި ތިބި ފަރާތްތަކާއި އިސްވެރިން، އެކަމުގައި ބަލަންޖެހޭ ކަންކަން ބަލައި ފިޔަވަޅު އަޅާފައިނުވާތީ އެ ފަރާތްތައް ޒިންމާކުރުމަށް ވެސް އޮޑިޓު އޮފީހުން ވަނީ ބުނެފައެވެ.
