ސުޕްރީމް ކޯޓުގެ ފަނޑިޔާރު ޑރ. އަޒްމިރަލްދާ ޒާހިރު ޖުޑީޝަލް ސާވިސް ކޮމިޝަން (ޖޭއެސްސީ) އަށް ހާޒިރު ކުރުމަށް ނިންމައިފައި އޮތް އޮތުން އަނެއްކާވެސް ފަސްކޮށްފިއެވެ.
ސްޕްރީމް ކޯޓުގެ ތިން ފަނޑިޔާރަކު ސަސްޕެންޑް ކުރީ ޖިނާއީ ތުހުމަތުތަކަކާއި ގުޅިގެންނެވެ. އެއަށްފަހު ފަނޑިޔާރުންގެ ސުލޫކީ މައްސަލަތަކެއްވެސް ވަނީ ބަލަން ފަށާފައެވެ.
އަޒްމިރަލްދާގެ އިތުރަށް ސަސްޕެންޑް ކުރީ ފަނޑިޔާރު މަހާޒް އަލީ ޒާހިރުގެ އިތުރުން ފަނޑިޔާރު ހުސްނުއްސުއޫދެވެ. ހުސްނުއްސުއޫދު މިހާރު ވަނީ އިސްތިއުފާ ދެއްވާފައެވެ.
ސުލޫކީ މައްސަލަތަކާ ގުޅިގެން ފަނޑިޔާރުން އާދިއްތަ ދުވަހު ޖޭއެސްސީއަށް ހާޒިރުކުރާ ގޮތަށް ކުރިން އޮތް ނަމަވެސް އާދިއްތަ ދުވަހު ހާޒިރުކުރީ ހަމައެކަނި ފަނޑިޔާރު މަހާޒް އަލީ ޒާހިރެވެ. އެގޮތުން އަޒްމިރަލްދާ ހާޒިރު ކުރުން ހޯމަ ދުވަހަށް ފަސްކޮށް، އެ ނިންމުން އަނެއްކާވެސް ޖޭއެސްސީން މިހާރު ވަނީ ބަދަލުކޮށްފައެވެ.
އެކަމާ ގުޅޭގޮތުން ”ސަންގު“ އާ ވާހަކަ ދައްކަވަމުން އަޒްމިރަލްދާގެ ވަކީލު ވިދާޅުވީ، ޖޭއެސްސީއަށް ހާޒިރުކުރުން ފަސްވެފައިވާކަން ހޯމަ ދުވަހު ވަކީލުން ގުޅާލުމުން އެ ކޮމިޝަނުން އެންގި ކަމަށާއި، ނަމަވެސް ފަސްކުރި ސަބަބެއް ކިޔާދީފައިނުވާ ކަމަށެވެ. އަދި ފަހުން ޗިޓް ފޮނުވާނެކަމަށް ބުނި ކަމަށާއި، ނަމަވެސް ހާޒިރުކުރާނެ ވަކި ދުވަހެއް އަންގާފައިނުވާކަމަށްވެސް އޭނާ ވިދާޅުވިއެވެ.
ފަނޑިޔާރު އަޒްމިރަލްދާގެ ޤާނޫނީ ޓީމުން ބުރާސްފަތި ދުވަހު ވަނީ ބަޔާނެއް ނެރެފައެވެ.
ބަޔާނުގައި ބުނެފައިވަނީ، އޭސީސީން ހިންގަމުންގެންދާ ޖިނާއީ ތަހުގީގަކާ ގުޅިގެންކަމަށް ބުނެ ފަނޑިޔާރު އަޒްމިރަލްދާ ސަސްޕެންޑުކޮށް، އަދި އެއަށްފަހު ފަނޑިޔާރުގެ ސުލޫކީ މައްސަލައެއް ބެލުމަށް ނިންމާފައިވާކަމަށް ޖޭއެސްސީން އަންގާފައިވާއިރު، އެ މައްސަލަތަކަކީ އެއްވެސް އަސްލެއް އަދި އަސާސެއް ނެތް މައްސަލަތަކެއް ކަމަށެވެ.
އަދި އެއީ ފަނޑިޔާރުންގެ މަސައްކަތާބެހި، ނުފޫޒު ފޯރުވުމަށް އުފައްދާފައިވާ ޙާލަތެއްކަމަށް ބަޔާނުގައި ފާހަގަކުރައްވާފައިވެއެވެ.
ފަނޑިޔާރު މަހާޒް އަލީ ޒާހިރު އަދި ފަނޑިޔާރު ޑރ އަޒްމިރަލްދާގެ ސުލޫކީ މައްސަލައެއް ބަލަމުންދަނީ ފަނޑިޔާރު އަޒްމިރަލްދާގެ ފިރިކަލުން ޑރ އިސްމާއިލް ލަތީފް މައްސަލައެއްގެ ތުހުމަތުގައި ގެންދެވުމުން އެ ދެ ފަނޑިޔާރުން ކްރިމިނަލް ކޯޓުގެ ގާޒީންނަށް ގުޅުއްވައި މި މައްސަލައަށް ނުފޫޒު ފޯރުވަން މަސައްކަތް ކުރެއްވިކަމަށް ތުހުމަތުކޮށެވެ. ޖޭއެސްސީން ފާހަގަ ކުރާ ގޮތުގައި އެ މައްސަލަ އަމިއްލަ ފަރާތަކުން ކޮމިޝަނުގެ ސަމާލުކަމަށް ގެނައުމުން ކޮމިޝަނުގެ އަމިއްލަ އިސްނެގުމުގެ މަތިން މައްސަލަ ތަހުގީގުކުރަން ނިންމީއެވެ.
އެކަމާ ގުޅޭގޮތުން ބަޔާނުގައި ބުނެފައިވަނީ، އެއީ ކަނޑައެޅިގެން ޙަގީގަތާ ޚިލާފު ދޮގު ތުހުމަތެއް ކަމަށާއި، އެ މައްސަލައާ ގުޅިގެން އެއްވެސް ފަނޑިޔާރަކަށް ގުޅުއްވާފައިނުވާނެ ކަމަށެވެ. ޑރ އިސްމާއިލް ލަތީފް ޖިނާއީ ތުހުމަތެއް ނެތި ހައްޔަރު ކުރެވުމުން، ބަންދުން ދޫކޮށްލުމަށް އެދި ނުފޫޒު ފޯރުވިކަމަށް ބުނެ ދެކެވެމުންދަނީ ދޮގު ތުހުމަތުތަކެއްކަމަށް ބަޔާނުގައި ބުނެފައިވެއެވެ. އެކަމުގެ ތަފްސީލުތައް ފަނޑިޔާރު އަޒްމިރަލްދާވެސް ވަނީ ޖޭއެސްސީއަށް ސިޓީއަކުން ހިއްސާ ކުރައްވާފައެވެ.
