ފޮރިން ސެކެޓްރެޓަރީގެ މަގާމަށް އައްޔަނުކޮށްފައިވަނީ އެ މަގާމަށް ޝަރުތު ހަމަވާ މީހެއްކަމަށް ފޮރިން މިނިސްޓަރު ޑރ. އަބްދުﷲ ހަލީލް ވިދާޅުވެއްޖެއެވެ.
މިނިސްޓަރ މިފަދައިން ވިދާޅުވީ ގަލޮޅު އުތުރު ދާއިރާގެ މެންބަރު މުހައްމަދު އިބްރާހީމް ކުރެއްވި ސުވާލުގެ ޖަވާބުގައެވެ.
މެންބަރު ސުވާލުކުރެއްވީ ދިވެހިރާއްޖޭގެ ފޮރިން ސަރވިސްގެ ގާނޫނުގެ 11 ވަނަ މާއްދާ ނިޔާކުރާ ގޮތުން، ފޮރިން ސެކްރެޓަރީގެ މަގާމަށް އައްޔަނުކުރާ މީހަކީ، އެ ގާނޫނުގައި ބަޔާންކޮށްފައިވާ އެގްޒެކެޓިވް ސްޓާފުންގެ ގިންތީގެ ”ސެކްރެޓަރީ“ ގެ މަގާމުގައި ހިދުމަތްކުރަމުން ގެންދާ ފޮރިން ސާވިސްގެ މުވައްޒަފުންގެ ތެރެއިން ފޮރިސް ސަރވިސްގެ ތަޖުރިބާއާއި މަގާމުގެ މަސްއޫލިއްޔަތު އަދާކުރުމުގެ ގާބިލުކަން ހުރި މީހަކަން ވާން ވާނެކަމަށް އޮންނަކަމަށް ފާހަގަކޮށެވެ.
މިނިސްޓްރީގައި މަދުވެގެން 10 އަހަރު ދުވަހު މަސައްކަތްކޮށް، ތަޖުރިބާ ލިބިފައިވާ މީހަކަށްވާންވާނެކަމަށްވެސް އޮންނަކަމަށްވެސް މެންބަރު ފާހަގަކުރެއްވިއެވެ. އެހެންކަމުން ފޮރިން ސެކެޓްރެޓަރީގެ މަގާމަށް އައްޔަނުކޮށްފައިވަނީ އެ ޝަރުތުތައް ފުރިހަމަވާ މީހެއްތޯ މެންބަރު ވަނީ ސުވާލުކޮށްފައެވެ.
ޖަވާބުގައި މިނިސްޓަރު ވިދާޅުވީ ފޮރިން ސެކެޓްރެޓަރީގެ މަގާމަށް އައްޔަނުކޮށްފައިވަނީ އެ މަގާމަށް ޝަރުތު ހަމަވާ މީހެއްކަމަށެވެ. އެގޮތުން ތަޖުރިބާއާއި މަސްއޫލިއްޔަތު އަދާކުރުމުގެ ގާބިލުކަން ހުންނާނެކަމަށެވެ.
އޭނާ 10 އަހަރު ދުވަހު މިނިސްޓްރީގައި މަސައްކަތް ކުރައްވާފައިވާކަމަށްވެއެވެ.
