ފޮރިން ސާވިސްގެ ގާނޫނުގައި ބަޔާން ކުރާ އަދަދަށް ވުރެ އިތުރަށް، ދެ ސަރުކާރުގައި ވެސް ސިޔާސީ މަގާމުތަކަށް މީހުން އައްޔަނުކޮށްފައިވާކަމަށް ފޮރިން މިނިސްޓްރީން ރައްޔިތުންގެ މަޖިލީހަށް ފޮނުވި މައުލޫމާތުތަކުން ހާމަވެއްޖެ އެވެ.
ފޮރިން ސާވިސް ގާނޫނުގެ 41 ވަނަ މާއްދާގައި ބަޔާން ކުރާ ގޮތުގައި މުވައްޒަފުން އައްޔަނު ކުރަން ވާނީ، މުވައްޒަފުންގެ ޖުމްލަ އަދަދުގެ 20 އިންސައްތައަށް ވުރެ އިތުރު ނުވާނެ ގޮތެއްގެ މަތީން ކަމަށެވެ. ގާނޫނުގައި ލިޔެފައިވާ އަދަދަށް ވުރެ އިތުރަށް ސިޔާސީ މުވައްޒަފުން އައްޔަނުކޮށްފައިވާކަމަށް މައުލޫމާތު ލިބިފައިވާތީ އެކަން ސާފުކޮށްދިނުމަށް ފޮރިން މިނިސްޓަރ ޑރ. އަބްދުﷲ ޚަލީލުއާއި ސުވާލު ކުރައްވާފައި ވަނީ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމެވެ.
މިނިސްޓަރ ޚަލީލް ލިޔުމުން ފޮނުވި ޖަވާބުން އެނގޭ ގޮތުގައި އެމްޑީޕީގެ ސަރުކާރުގައި ވެސް ހާރިޖިއްޔާއަށް ސިޔާސީ މުވައްޒަފުން އައްޔަނުކޮށްފައި ވަނީ ގާނޫނު ބުނާ އަދަދަށް ވުރެ ގިނައިންނެވެ. އެގޮތުން ދައުރު ނިމެން މަހަކަށްވެފައި ވަނިކޮށް 2023 ގެ އޮކްޓޯބަރުގެ ނިޔަލަށް މިނިސްޓްރީއާއި މިޝަންތަކުގައި ފޮރިން ސާވިސްގެ 137 މުވައްޒަފުން ތިބިއިރު މިނިސްޓްރީއާއި މިޝަންތަކުގައި 116 ސިޔާސީ މުވައްޒަފުން ތިބިކަމަށް އެނގެއެވެ.
މީގެއިތުރުން މި އަހަރުގެ ޖެނުއަރީ މަހުގެ ނިޔަލަށް މިނިސްޓްރީއާއި މިޝަންތަކުގައި ތިބި ފޮރިން ސާވިސް މުވައްޒަފުންގެ ޖުމްލަ އަދަދަކީ 139 އެވެ. އަދި އެ މުއްދަތުގެ ތެރޭގައި، މިނިސްޓްރީއާއި މިޝަންތަކަށް އައްޔަނުކޮށްފައިވާ ސިޔާސީ މުވައްޒަފުންގެ އަދަދު 132 އަށް އަރައެވެ.
މިއަދުގެ ޖަލްސާގައި ދެން މެމްބަރު ސާފުކޮށްދިނުމަށް އެދި ހުށަހަޅާފައިވާ އިތުރު ސުވާލެއްގެ ޖަވާބު ވެސް މިނިސްޓަރ ފޮނުއްވާފައި ވެއެވެ. އެއީ ފޮރިން ސެކްރެޓަރީގެ މަގާމަށް އައްޔަނު ކުރި ފާތިމަތު އިނާޔާގެ ޝަރުތު ހަމަނުވާކަމަށް ދެކެވޭ ވާހަކައެވެ. ޖަވާބުގައި މިނިސްޓަރ ވިދާޅުވެފައި ވަނީ ފޮރިން ސާވިސްގެ ގާނޫނުގައި ބަޔާންކުރާ ގޮތުގެ މަތީން އިނާޔާއަކީ މިނިސްޓްރީގައި 10 އަހަރު ހިދުމަތްކޮށްފައިވާ ތަޖުރިބާކާރެއް ކަމަށެވެ. އަދި އިނާޔާއަކީ މިނިސްޓްރީގެ އެގްޒެކެޓިވް ސްޓާފުންގެ ގިންތީގެ ސެކްރެޓަރީގެ މަގާމުގައި ހިދުމަތް ކުރައްވަމުން ދާ ގާބިލު މުވައްޒަފެއްކަމަށް ވެސް ވިދާޅުވި އެވެ.
