ދަތުރުފަތުރާއި މަދަނީ އުދުހުންތަކާ ބެހޭ ވުޒާރާ އިސް އޮފިޝަލުންގެ ޓީމެއް އިންޓަރނޭޝަނަލް އެއަރ ޓްރާންސްޕޯޓް އެސޯސިއޭޝަން (އައިއޭޓީއޭ) ގެ އޭރިއާ މެނޭޖަރާ މިއަދު ބައްދަލުކޮށް، ދިވެހިރާއްޖޭގެ އޭވިއޭޝަން ދާއިރާ ހަރުދަނާކުރުމާއި ގުޅޭގޮތުން މަޝްވަރާކޮށްފިއެވެ.
މިނިސްޓްރީގައި މިއަދު ބޭއްވުނު ބައްދަލުވުމުގައި ދިވެހިރާއްޖޭގެ އޭވިއޭޝަން ޤާނޫނުތަކާއި ޤަވާއިދުތައް ހަރުދަނާކޮށް ތަންފީޒުކުރުމަށްޓަކައި ދެފަރާތުގެ މެދުގައި އޮންނަ ގުޅުން ބަދަހިކޮށް، އިސްތިރާޖީ ބައިވެރިވުން އިތުރުކުރުމާ ގުޅޭގޮތުން ފުޅާ ދާއިރާއެއްގައި މަޝްވަރާކުރެވުނެވެ.
މިނިސްޓްރީގެ ފަރާތުން މި ބައްދަލުވުމުގައި ބައިވެރިވެވަޑައިގަތީ ޑެޕިއުޓީ މިނިސްޓަރ މުޙައްމަދު އަފްލާހް އަދި ޕޮލިޓިކަލް ޑިރެކްޓަރ ހަސަން ޒުހުރީ އެވެ. އައިއޭޓީއޭގެ ފަރާތުން ބައިވެރިވެވަޑައިގަތީ ސައުތު އޭޝިއާ ރީޖަންއަށް ކަނޑައަޅާފައިވާ އޭރިއާ މެނޭޖަރ އަދި އެ ފަރާތުގެ އިސް އޮފިޝަލުންނެވެ.
މި ބައްދަލުވުމުގައި ދެފަރާތުން މަޝްވަރާކުރެވުނު މައިގަނޑު ކަންތައްތަކުގެ ތެރޭގައި ދިވެހިރާއްޖޭގެ އޭވިއޭޝަން ދާއިރާ ތަރައްޤީކުރުމަށް ކުރެވިދާނެ ކަންތައްތަކާއި، ބައިނަލްއަޤްވާމީ މިންގަނޑުތަކާއި އެއްގޮތަށް ދިވެހިރާއްޖޭގެ އޭވިއޭޝަން ޤަވާއިދުތައް ބައްޓަންކުރުމަށް ކުރެވިދާނެ ކަންތައްތައް ހިމެނެއެވެ.
ދިވެހިރާއްޖޭގެ އޭވިއޭޝަން ޤަވާޢިދުތައް މުރާޖަޢާކޮށް، ބައިނަލްއަޤްވާމީ މިންގަނޑުތަކާއި އެއްގޮތަށް އެ ޤަވާޢިދުތައް އަދާހަމަކުރުމަށްވެސް މި ބައްދަލުވުމުގައި މަޝްވަރާކުރެވުނެވެ.
