ފަންނީ އުފެއްދުންތައް ގިންތި ކުރުމުގައި އުމުރުފުރާތަކަށް ބާހާލައިފައިވަނީ އޭގައި ހިމެނޭ ކޮންޓެންޓް އިންޓެންސިފައިވާ މިންވަރަކުން ކަމަށް ނޭޝަނަލް ބިއުރޯ އޮފް ކްލެސިފިކޭޝަނުން ބުނެފިއެވެ.
ސަންގުޓީީގެ ފުރަމެންދުރު ޕްރޮގްރާމްގައި ބިއުރޯގެ ފަރާތުން މައުލޫމާތު ދެއްވަމުން ބުނެފައިވަނީ އެ އޮފީހުގެ މައިގަނޑު މަސައްކަތްތަކަކީ ރާއްޖޭގައި އުފަައްދާ އަދި ރާއްޖެއަށް އތެރެކޮށް އާންމުކުރާ ފަންނީއުފެއްދުންތައް، އާންމުކުރުމުގެ ކުރިން އެ އުފެއްދުމެއް ގިންތިކޮށް އެކަށީގެންވާ ދަރަޖަ ކަނޑައެޅުން ކަމަށެވެ. އަދި ރާއްޖޭގެ އައިއެސްބީއެން އޭޖެންސީގެ ހައިސިއްޔަތުން މަސައްކަތްކުރާ އިދާރާ ކަމަށް ވަނީ ބުނެފައެވެ.
އެ އިދާރާއިން ބުނެފައިވަނީ ފަންނީ އުދެއްދުންތައް ގިންތި ކުރުމާއި ބެހޭ އާ ގާނޫނަށް އަހުލުވެރިކުރުވުމުގެ ގޮތުން އެ އިދާރާއިން އާއްމުން ހޭލުންތެރިކުރުމުގެ ޕްރޮގްރާމްތައްވެސް ހިންގަމުން ގެންދާ ކަމަށް ވަނީ ބުނެފައެވެ. ފަންނީ އުފެއްދުންތައް ގިންތި ކުރުމުގައި ބަލާ ގިނަ ކަންކަން ހުންނާނެ ކަމަށް އެ އިދާރާއިން ވަނީ ބުނެފައެވެ.
އެގޮތުން އެ އުފެއްދުމުގެ މައުޟޫއު، ބަހުރުވަ، އަނިޔާވެރިކަން، ޖިންސީ އަމަލު، މަސްތުވާތަކެތި، އަދި ދީނީ މައުލޫމާތު ހުރިގޮތަށްވެސް ބަލާނެ ކަމަށް އެ އިދާރާއިން ވަނީ ބުނެފައެވެ. އަދި ހަމަ އޯޑިއޯ ވިޒުއަލް އުފެއްދުމެއްނަމަ، އޭގެ ސބަބުން ސިކުނޑިއަށް ފަސޭހައިން އަސަރުކުރާނެ ކަމަށާއި އެ ވިޒުއަލް އަންނަގޮތަށްވެސް ބެލޭނެ ކަމަށެވެ.
ގިންތިކުރާ އުމުރުފުރާތަކަށް ބަލާއިރު ޖެނެރަލް އަކީ ހުރިހާ ފަރާތްތަކަށް ބެލުމަށް، ކިޔުމަށް ނުވަތަ އަޑުއެހުމަށް އެކަށީގެންވާ އުފެއްދުންތަކަށް ދެވޭ ދަރަޖަ ކަމަށް އެ އިދާރާއިން ވަނީ ބުނެފައެވެ. މި ދަރަޖައަށް ދޫކުރެވޭ އުފެއްދުމެއްގައި، ހަރުކަށި ބަހުރުވަ، މަސްތުވާތަކެތީގެ ވާހަކަ، އަނިޔާވެރިކަން ނުހިމެނޭނެ، އަދި މައުޟޫއުވެސް ހުރިހަ އުމުރަކަށް އެކަށީގެންވާނެ ކަމަށް އެ އިދާރާއިން ވަނީ ބުނެފައެވެ.
ދެން އިންނަނީ ބެލެނިވެރިޔަކާއިއެކު ބެލުމަށް ކިޔުމަށް ނުވަތަ އަޑުއެހުމަށް ހުއްދަދެވޭ ދަރަޖައެއް ކަމަށް އެ އިދާރާއިން ވަނީ ބުނެފައެވެ. މިއީ ޖެނެރަލް އާއި އެއްގޮތްވި ނަމަވެސް ކުޑަކުއްޖަކަށް އެއާއިމެދު ސުވާލެއް ނުވަތަ އެއްވެސް ވަރެއްގެ ނުތަނަވަސްކަމެއް އަތުވެދާނެތީވެ ދެވޭ ދަރަޖައެއް ކަމަށެވެ. މީގެއިތުރުން 12+، 15+، އަދި 18+ މިއީ އޭގައި ހިމެނޭ ކޮންޓެންޓް އިންޓެންސިފައިވާ މިންވަރަކުން ހަމަ ދަރަޖަވެސް އެއާއިއެއްވަރަކަށް މަތިވަމުން ދާނެ ކަމަށް އެ އިދާރާއިން ވަނީ ބުނެފައެވެ.
