ހަގީގީ މާނައިގައި ފަނޑިޔާރުގެ އިސްލާހު ކުރެވޭނީ ޖުޑިޝަލް ސަރވިސް ކޮމިޝަން (ޖޭއެސްސީ) އަލުން އެކުލަވާލައިގެންކަމަށް ހުޅުމާލެ ދެކުނު ދާއިރާގެ މެންބަރު ޑރ އަޙްމަދު ޝަމްހީދު ވިދާޅުވެއްޖެއެވެ.
ފަނޑިޔާރުންގެ ގާނޫނަށް ހުށައެޅި އިސްލާހުގައި މައިގަނޑު ގޮތެއްގައި ހުރީ ރަނގަޅު ވާހަކަކަމަށާއި، ނަމަވެސް ފަނޑިޔާރުން ވަކިކުރުމަށް މަޖިލީހަށް އޮންނަ ދައުރު ހަނިވެގެންދާ ގޮތަށް އިސްލާހުގައިވާތީ ކަންބޮޑުވާކަމަށެވެ. މަޖިލީހުން ފަނޑިޔާރެއް ވަކިކޮށްފިކަމަށްވާނަމަ، އެ ފަނޑިޔާރަކަށް ލިބެން ޖެހޭ އިނާޔަތްތައް ނުލިބޭނެކަމަށް އިސްލާހުގައިވާކަމަށް ޝަމްހީދު ފާހަގަކުރެއްވިއެވެ. އެހެންކަމުން އޭގެ ކުރިން އިސްތިއުފާ ދިނުމަށް ފަނޑިޔާރަށް މަޖުބޫރުވާކަމަށް ވިދާޅުވިއެވެ.
ކޯޓުގެ އިސް ފަނޑިޔާރަށް ފަނޑިޔާރުންގެ ބެންޗް މައްސަލަ ބެލުމަށް އެކުލަވާލުމުގެ ފުރުސަތުވެސް އެބަލިބޭކަމަށާއި، އަދި އާންމުކޮށް ފަނޑީޔާރެއް އުޅޭ އުޅުމުގެ ތެރެއިން ދިމާވާކަމެއްގެ ތެރެއިންވެސް ސުލޫކީ މައްސަލަތައް ނެގޭކަމަށް ޝަމްހީދު ވިދާޅުވިއެވެ. ފަނޑިޔާރުންނަކީ މުޅި މުޖުތަމައުގެ ފަރާތުން މިނިވަންވެ ތިބޭ ބަޔަކަށް ވާން ޖެހޭކަމަށް އިސްލާހުގައި އޮތްއިރު، މީގެ މާނަ ނެތްކަމަށް ފާހަގަކޮށް ޝަމްހީދު ކަންބޮޑުވުން ފާޅުކުރެއްވިއެވެ.
މުޅި މުޖުތަމައުން މިނިވަންވެގެން ތިބޭ ބަޔަކަށް ވާން ޖެހޭނެކަމަށް. އޭގެ މާނައަކީ އީދު ކުޅިވަރުގައިވެސް ބައިވެރި ނުވެވޭނޭ މި ބޭފުޅުންނަށް.
ޝަމްހީދު ވިދާޅުވިއެވެ.
ސުލުކީ މައްސަލަތައްކަމަށް ބެލޭ މައްސަލަތައް އިތުރުކުރުމުން ފަނޑިޔާރުގެ ވާނީ މިނިވަންތޯ ނޫންތޯ ޝަމްހީދު ސުވާލު އުފެއްދެވިއެވެ. އަދި ވިދާޅުވީ މި އިސްލާހުގެ ސަބަބުން ފަނޑިޔާރުގެ ވާނީ ކުރިއަށްވުރެ އަޅުވެތިކަމަށެވެ. އާއިލާތަކުން ހައްގު ހޯދަން ހާހުން ހަރަދުކުރި ނަމަވެސް، އަދުލު އިންސާފު ގާއިމްނުވާކަމަށް ޝަމްހީދު ވިދާޅުވިއެވެ.
ހަގީގީ މާނައިގައި ފަނޑިޔާރުގެ އިސްލާހު ކުރަން ބޭނުންވާނަމަ، ޖުޑިޝަލް ސަރވިސް ކޮމިޝަން އިސްލާހުކޮށް އަލުން އެކުލަވާލަން ޖެހޭކަމަށާއި، ޖުޑީޝަލް ޑިސިޕްލިނަރީ ވަކި ކޮމިޓީއެއް އުފައްދަން ޖެހޭކަމަށް ފާހަގަކޮށް ޝަމްހީދު ވިދާޅުވީ، ވަކި ފަންތީގެ ފަނޑީޔާރުން ވަކިކުރުމަށް ހާއްސަ ކޯޓެއް ހެދިދާނެކަމަށެވެ. ފަނޑީޔާރަކަށް ވަނީނަމަ ޑިގްރީއެއް އޮންނަންޖެހޭކަމަށްވެސް އޭނާ ވިދާޅުވިއެވެ.
ކޮންމެ މައްސަލައެއްވެސް ބަލަން ފަށާ ދުވަހާއި، ނިމެން ޖެހޭނެ ދުވަސް ކުރިއާލާ އެނގެން ޖެހޭކަމަށް އޭނާ ވިދާޅުވިއެވެ.
