މީސް މީޑިއާގައި އާންމު އިޖުތިމާއީ މިންގަނޑާ ޚިލާފު މަންޒަރުތައް އާއްމު ކުރަމުން ގެންދާ ފިރިހެނެއް ކަމަށްވާ ގ. ކަމަރާގެ، މުޙައްމަދު ނަބީލް ގެ މައްޗަށް މަސްތުވާތަކެތީގެ މައްސަލައެއްގައި އުމުރު ދުވަހުގެ ޖަލު ޙުކުމެއް އިއްވައިފިއެވެ.
މި މައްސަލައިގައި އޭނާގެ މައްޗަށް އުފުލި މަސްތުވާތަކެތި ޓްރެފިކް ކުރުމުގެ ކުށުގެ ދައުވާ ސާބިތުވެ އުމުރަށް ޖަލަށްލާން ޙުކުމްކޮށްފައިވާއިރު، 100،000 ރުފިޔާއިން ޖޫރިމަނާ ކުރުމަށްވެސް ޙުކުމުގައިވެއެވެ.
ނަބީލްއަކީ މީސް މީޑިއާގައި އާންމު އިޖުތިމާއީ މިންގަނޑާ ޚިލާފު މަންޒަރުތައް އާއްމު ކުރަމުން ގެންދާ މައްސަލައިގައިވެސް އެކި ފަހަރުމަތިން ފުލުހުންގެ ބެލުމުގެ ދަށަށް ގެންގޮސްފައިވާ ފަރާތެކެވެ. އެގޮތުން އެފަދަ މައްސަލައެއްގައި ނަބީލު މީގެ ކުރިންވެސް ހައްޔަރުކޮށް އޭނާގެ މައްޗަށް ޝަރީއަތްވެސް ހިންގާފައިވެއެވެ. އަދި މިނިވަންވުމަށްފަހުވެސް އޭނާ ގެންދަނީ އެ އަމަލުތައް ތަކުރާރު ކުރަމުންނެވެ.
ޕީޖީ އޮފީހާ ސަންގުޓީވީން ސުވާލުކޮށްލުމުން ޕީޖީ އޮފީހުން ބުނީ، ނަބީލް ނިވައިކަން ކުޑަ އަންހެން ހެދުން ލައިގެންހުރެ ނަށާ ވީޑިއޯތަކެއް ”ޓިކްޓޮކް“ އެކައުންޓެއްގައި ޝާއިޢުކުރަމުންދާކަމަށް ހުށަހެޅުނު މައްސަލައާ ގުޅިގެން ދައުލަތުން ފަހުންވެސް ދައުވާ އުފުލާފައިވާ ކަމަށެވެ. އޭނާގެ މައްޗަށް ދައުވާ އުފުލާފައިވަނީ މިދިޔަ އަހަރުގެ ޖުލައި މަހުގެ 25 ވަނަ ދުވަހުއެވެ. އަދި އޭނާގެ މައްޗަށް އުފުލާފައިވަނީ ހަޑިހުތުރު އެއްޗެއް ހިމެނޭ ވަސީލަތެއް ޝާއިޢުކުރުމުގެ ކުށުގެ ދައުވާއެވެ.
މި މައްސަލައާ ގުޅިގެން ކޯޓު އަމުރެއްގެ ދަށުން ކ.މާލެ، ގ.ކަމަރާގޭގައި އޭނާ ދިރިއުޅޭ ކޮޓަރި ބަލައިފާސްކުރަން ފުލުހުން ދިއުމުން، އޭނާއަކީ ޓިކްޓޮކްގައި ”ކޮރޮސް ޑްރެސަރ“ އެއްކަމަށް ބުނެ، އެ ކޮޓަރި ތެރެއިން އޭނާ ބޭނުންކުރާ އަންހެން ހެދުންތައް ފުލުހުންނަށް ދައްކާފައިވާއިރު، އޭނާގެ ވީޑިއޯތަކުގައި ހަޑިހުތުރުކޮށް ނިވައިކަންކުޑަ އަންހެން ހެދުންލައިގެން ނަށައިފައިވާކަންވެސް ފާހަގަކޮށްފައިވެއެވެ.
