ފަނޑިޔާރުންގެ ސުލޫކީ މައްސަލަތައް ނުބެލުމަކީ ރަނގަޅަށް މަސައްކަތް ކުރާ ފަނޑިޔާރުންނަށް ބޭއިންސާފެއްކަމަށް ޖުޑީޝަރީ ކޮމިޓީގެ މިހާރުގެ މުގައްރިރު، މަނަދޫ ދާއިރާގެ މެންބަރު ހުސްނީ މުބާރަކު ވިދާޅުވެއްޖެއެވެ.
ފަނޑިޔާރުންނާއިމެދު ގިނަ ރައްޔިތުންގެ ބޮޑެތި ކަންބޮޑުވުންތަކެއް އޮންނަނީ، ހުށައެޅޭ މައްސަލަތައް ލަސްވާތީކަމަށް ހުސްނީ މުބާރަކު ވިދާޅުވިއެވެ. މިކަމުގެ ސަބަބުން ރައްޔިތުންގެ ހައްގުތަކެއް އުނިވާކަމަށް އޭނާ ވިދާޅުވިއެވެ.
ޖިނާއީ މައްސަލައެއް ތިމާގެ މައްޗަށް ހުށައެޅިފައިވާނަމަ އެމީހާގެ ކުރިމަގަށް ވަރަށް ބޮޑަށް ހުރަސްއެޅޭކަމަށާއި، ވަޒީފާއެއް ހޯދުމަށް ނޫނީ އެހެން ގޮތަކުން ނަމަވެސް ދަތިތަކާއި ކުރިމަތިވާކަމަށް އޭނާ ވިދާޅުވިއެވެ.
މައްސަލަތައް ލަސްވެގެން ދަނީ ޖާގައިގެ ދަތިކަމުންކަމަށް އަބަދުވެސް ވާހަކަތައް ދެކެވޭކަމަށް މެންބަރު ފާހަގަކުރެއްވިއެވެ. މިދިޔަ ސަރުކާރުން މި މައްސަލަތަކަށް ހައްލެއް ހޯދައިދީފައިނުވާކަމަށާއި ނަމަވެސް މި ސަރުކާރުން މިހާރު އެ މަސައްކަތް ކުރިއަށް ގެންދާކަމަށް ވިދާޅުވިއެވެ.
މި މަސް ތެރޭގައި ކްރިމިނަލް ކޯޓު ހުޅުމާލެއަށް ބަދަލުކުރެވި އަދި އޭގެ އިތުރަށް ކޯޓު ކޮމްޕްލެކްސް އެޅި ޖުޑިޝަރީއަށް ދިމާވެފައިވާ ޖާގައިގެ ދަތިކަން ހައްލުވާނެ. މި ސަރުކާރުން ޖުޑިޝަރީއަށް އެކަން ފަހިކޮށްދޭނެ. އެއީ މިދިޔަ ސަރުކާރުން އިހުމާލުވެފައިވާކަމެއް.
ހުސްނީ މުބާރަކް ވިދާޅުވިއެވެ.
މެންބަރު ވިދާޅުވީ މި މަހުގެ ތެރޭގައި ކްރިިމިނަލް ކޯޓު ހުޅުމާލެއަށް ބަދަލުކޮށް، ކޯޓު ކޮމްޕްލެކްސްގެ މަސައްކަތް ނިމޭނެކަމަށެވެ.
މެޖިސްޓްރޭޓު ކޯޓުތަކުގައިވެސް އެތައް އަހަރުދުވަހެއްވީ މައްސަލަތައް އެބަހުރިކަމަށާއި، މިއީ ޖާގައިގެ ދަތިތަކުގެ ސަބަބުން ވާކަމެއްތޯ އޭނާ ސުވާލު އުފެއްދެވިއެވެ. މައްސަލަ ބައްލަވާ ފަނޑިޔާރު އެކަށީގެންވާ ގޮތެއްގައި މައްސަލަ ކުރިއަށް ނުގެންދަނީތޯ ބަލަން ޖެހޭކަމަށް މެންބަރު ވިދާޅުވިއެވެ.
އާންމު ގޮތެއްގައި މަޖިލީހުން ފަނޑިޔާރުންގެ ކަންކަމާއި ނުބެހޭނެކަމަށާއި، ނަމަވެސް މަޖިލީހުގެ ޖުޑިޝަރީ ކޮމިޓީއަށް ހުށައަޅާފައިވާ ކަންތައްތަކުން މިކަންކަން ހާމަވާކަމަށް މެންބަރު ވިދާޅުވިއެވެ. މަދަނީ މައްސަލަތައް ލަސްވެގެން ދަނީ ފަނޑިޔާރުންގެ ސަބަބުންކަމަށާއި، އެކަންކަމުގައި ފަނޑިޔާރުން ޖަވާބުދާރީ ކުރެވެން ޖެހޭކަމަށް ފާހަގަކުރެއްވިއެވެ. ގޯސް ހަދާ ފަނޑިޔާރުންގެ މައްސަލަތައް ނުބެލުމަކީ ރަނގަޅަށް މަސައްކަތް ކުރާ ފަނޑިޔާރުންނަށް ބޭއިންސާފެއްކަމަށް އޭނާ ވިދާޅުވިއެވެ.
