އިންސާފަކީ މުއްސަނދިންނަށް ލިބޭ އެއްޗެއްކަމަށް ރާއްޖޭގެ 99 އިންސައްތަ ރައްޔިތުން ޤަބޫލުކުރާކަމަށް އިނގުރައިދޫ ދާއިރާގެ މެމްބަރު އިބްރާހިމް ފަލާހު ވިދާޅުވެއްޖެއެވެ.
މެމްބަރު އެފަދައިން ވިދާޅުވީ ފަނޑިޔާރުންގެ ޤާނޫނަށް ހުށަހެޅިފައިވާ އިސްލާޙަށް ބަހުސް ކުރައްވަމުންނެވެ.
ފަލާހު ވިދާޅުވީ، ފަނޑިޔާރުގެއަކީ ޤައުމެއްގެ މަސްލަޙަތު ހިމާޔަތްކޮށް، ޤައުމުގެ އިޖުތިމާއީ ކަންކަން ހަމަމަގަށް އެޅުމުގައި އެންމެ ބޮޑު ޒިންމާއެއް ދެވިފައިވާ އެއް އިދާރާ ކަމަށެވެ. ނަމަވެސް ރާއްޖޭގެ އަދުލު އިންސާފުގެ ދާއިރާ ހަލާކުވެފައިވާކަމަށް ރައްޔިތުންގެ ތެރެއިން 99 އިންސައްތަ ރައްޔިތުން ޤަބޫލު ކުރާކަމަށް ފަލާހު ވިދާޅުވިއެވެ.
ރާއްޖޭގެ ރައްޔިތުންގެ ތެރެއިން 99 އިންސައްތަ ރައްޔިތުން ޤަބޫލު ކުރަނީ ފަނޑިޔާރުގެ ހަލާކުވެފައިވާކަމަށް
ފަލާހު ވިދާޅުވީ، މުއްސަނދި ފައިސާވެރިންނަށް އަދުލު އިންސާފު ލިބިދާނެކަން ރައްޔިތުން ޤަބޫލު ކުރާ ކަމަށެވެ.
މީގެ އިތުރުން، ފަނޑިޔާރުންނަކީ ދައުލަތުން ވަރަށް ބޮޑެތި ޚަރަދުތަކެއް ކުރާ ބައެއްކަންވެސް ފަލާހު ފާހަގަ ކުރެއްވިއެވެ. އެގޮތުން މުސާރައާއި އިނާޔަތްތަކުގެ އިތުރުން ބޭސްފަރުވާއާއި، ރިޓަޔަރ ކުރުމަށްފަހުވެސް ދޭ އެކިއެކި އެލަވަންސްތަކަށް ފަލާހު އަލިއަޅުވާލެއްވިއެވެ.
ފަލާހު ވިދާޅުވީ، މި ވެރިކަން އައިފަހުން ފަނޑިޔާރުގެއަށް އަމާޒުކޮށް އެކިއެކި ޙަމަލާތައް ދެމުންދާކަމުގެ ވާހަކަތައް ދެކެވޭ ކަމަށާއި، ނަމަވެސް ހަގީގަތުގައި އެ ޙަމަލާތައް ދީފައިވަނީ އެމްޑީޕީންކަން ރައްޔިތުންވެސް ޤަބޫލުކުރާ ކަމަށެވެ. އެގޮތުން އެމްޑީޕީގެ ނިމިދިޔަ ވެރިކަމުގެ ފުރަތަމަ 1 އަހަރުގެ ތެރޭގައިވެސް 8 ފަނޑިޔާރުން ވަކިކޮށްފައިވާކަން ފަލާހު ފާހަގަ ކުރެއްވިއެވެ. އަދި ވިދާޅުވީ، އެތައް ފަނޑިޔާރުންނެއް ސަސްޕެންޑްކޮށް، ސުލޫކީ މައްސަލަތައްވެސް ބަލާފައިވާ ކަމަށެވެ.
މިހާތަނަށް ވެރިކަމެއްގެ ތެރޭގައި ފަނޑިޔާރުގެއަށް އެންމެ ބޮޑަށް އަތް ބާނައި، ފަނޑިޔާރުގެއަށް ނުފޫޒު ފޯރުވާފައިވަނީ އެމްޑީޕީގެ ނިމިދިޔަ ވެރިކަމުގައި، އެމްޑީޕީގެ ފުރަތަމަ ވެރިކަން ހަލާކުވެގެން ދިޔައީވެސް ފަނޑިޔާރުގެއާ ކުޅެގެން، ދެން އަނެއް ވެރިކަން ނަސީބަކުން ހަލާކެއް ނުވޭ، ނަމަވެސް އެ ވެރިކަން ރައްޔިތުން ނިންމި 2023 ގައި.
ފަލާހު ވިދާޅުވީ، ރައީސް ޑރ މުޙައްމަދު މުއިއްޒަކީ މިހާތަނަށް ފަނޑިޔާރުގެއަށް އެއްވެސް ނުފޫޒެއް ފޯރުވާފައިނުވާ ރައީސެއް ކަމަށެވެ. އެގޮތުން ވެރިކަމަށް ދޮޅުއަހަރުވެގެންދާއިރު، ރައީސް ފަނޑިޔާރުގެއަށް ނުފޫޒު ފޯރުއްވެވިކަމުގެ އެއްވެސް ހެއްކެއް ނެތްކަން ރައްޔިތުންވެސް ޤަބޫލު ކުރާނެ ކަމަށާއި، ވަކި ކުރެއްވި ފަނޑިޔާރުންވެސް ވަކި ކުރެއްވީ މައްސަލަތަކެއް ދިމާވެގެންކަން ފަލާހު ފާހަގަ ކުރެއްވިއެވެ.
ފަލާޙު ވިދާޅުވީ، ފަނޑިޔާރުންގެ ޤާނޫނަށް 15 އަހަރުވެގެންދާއިރު 7 އިސްލާޙެއް ހުށަހެޅިފައިވާ ކަމަށާއި، މިހާރު މި ހުށަހެޅިފައިވަނީ 8 ވަނަ އިސްލާޙު ކަމަށެވެ. އަދި މިހާރު ހުށަހެޅިފައިވާ އިސްލާޙުގައިވެސް ފަނޑިޔާރުންނާ ގުޅުންހުރި ގިނަ ކަންކަން ހިމެނިފައިވާކަން ފަލާޙު ފާހަގަ ކުރެއްވިއެވެ.
