ގުޅީފަޅުގެ ގޯތިތަކުގެ އެއްބަސްވުމަށް ބަދަލު ގެނައީ ގާނޫނާ ފުށުއަރާ ކަންތައްތަކެއް ކުރީގެ އެއްބަސްވުމުގައި ހުރުމުން ކަމަށް ކޮންސްޓްރަކްޝަން މިނިސްޓަރ ޑރ އަބްދުﷲ މުއްތަލިބް ވިދާޅުވެއްޖެއެވެ.
މިނިސްޓަރ އެފަދައިން ވިދާޅުވީ ކުރީ ސަރުކާރުން ދޫކުރި ގޯތީގެ ރަޖިސްޓަރީ އާއި އެއްބަސްވުން ބާތިލު ކުރުމަށް ފަހު، މި ސަރުކާރުން އައު ރަޖިސްޓަރީ އާއި ”ގެދޮރުވެރިން ޕްރޮގްރާމްގެ ދަށުން ބަންޑާރަ ގޯތި ދޫކުރުމުގެ އެއްބަސްވުން“ ދޫކުރަން ފަށާއިރު، ކުރީ ސަރުކާރުން ކަނޑައަޅާފައިވާ އުސޫލާ ޚިލާފަށް މުހިންމު ކަންތައްތަކެއް މިހާރު ބަދަލު ކޮށްފައިވާކަމަށް ބައެއް މީޑިއާތަކުން ރިޕޯޓު ކޮށްފައިވާތީއެވެ.
އެކްސްގައި ހިއްސާކުރެއްވި ޕޯސްޓެއްގައި މިނިސްޓަރ ވިދާޅުވީ، ގޯތި ދޫކުރުމަށް ކުރެވޭ އެއްބަސްވުމަށް ބަދަލު ގެނައީ ދައުލަތުން ހަދާ އެއްބަސްވުންތައް ހުންނަންޖެހޭނީ ގާނޫނާ ފުށު ނާރާ ގޮތަށް ކަމަށް ވާތީ ކަމަށެވެ. އެގޮތުން ބިމާ ބެހޭ ގާނޫނުގެ 11 ވަނަ މާއްދާގައި ދިރިއުޅުމަށް ގޯތި ދެވޭ ގޮތް ވަރަށް ސާފުކޮށް ބަޔާންކޮށްފައިވާކަމަށްވެސް މިނިސްޓަރ ވިދާޅުވިއެވެ.
އެ މާއްދާގައި ބަޔާންކޮށްފައިވަނީ ދިރިއުޅުމަށް ބަންޑާރަ ގޯތި ދޫކުރެވޭނީ ބަންޑާރަ ގޯއްޗެއް، އަމިއްލަ ގޯއްޗެއް، ބައިކޮށްދެވިފައިވާ ބަންޑާރަ ގޯއްޗެއް، އަމިއްލަ ގޯއްޗަކުން ބައެއް، ސަރުކާރުން ހަދާފައިވާ އިމާރާތެއްގެ ފުލެޓެއް ނުވަތަ އެއްމެދު އިމާރާތެއްގެ ފުލެޓެއް ލިބިފައި ނުވާ މީހަކަށް ކަމަށެވެ.
މީގެ އިތުރުން، ކުރިން ލިބިފައި އޮތް ގޯއްޗެއް ނުވަތަ ފްލެޓެއް ދޫކޮށްލާ މީހަކަށް ވެސް ދިރިއުޅުމަށް ބަންޑާރަ ގޯތި ދޫކުރެވޭނެ ކަމަށާއި، އެއްވެސް މީހަކަށް، އެއްވެސް ރަށަކުން ދިރިއުޅުމަށް އެއް ގޯއްޗަށް ވުރެ ގިނަ ގޯތި ނުދެވޭނެކަމަށްވެސް ބަޔާންކޮށްފައިވެއެވެ.
ހަމައެއާއެކު، ދިރިއުޅުމަށް ބަންޑާރަ ގޯއްޗެއް ލިބިފައިވާ ރަށް ނޫން އެހެން ރަށަކުން މީހަކަށް ގޯއްޗެއް ދޫކުރެވޭނީ ސަރުކާރުން ކަނޑައަޅާ ކުއްޔަކަށްކަމަށްވެސް ބަޔާންކޮށްފައިވެއެވެ.
އެހެންކަމުން އެއްބަސްވުންތަކަށް ބަދަލު ގެނައީ އެ މާއްދާތަކާ އެއްގޮތްވާ ގޮތަށް އަދި ޤާނޫނު ފުށުނާރާނެ ގޮތަށް އެއްބަސްވުންތައް ހެދުމަށްކަން މިނިސްޓަރ ވަނީ ފާހަގަ ކުރައްވާފައެވެ.
