ލޯކަލް ގަވަރމަންޓް އޮތޯރިޓީ (އެލްޖީއޭ) އިން ހަދާ ކައުންސިލްތަކުގެ އިންކުއަރީގެ ސަމަރީ ރިޕޯޓްތައް ޢާންމު ކުރާ ގޮތަށް ހަމަޖައްސާފައިވާ ކަމަށް ސިޓީ ތަކާއި އިދާރީ ދާއިރާތައް ހިންގުމާއި ގުޅޭ ވަޒީރު އާދަމް ޝަރީފް ޢުމަރު ވިދާޅުވެއްޖެއެވެ.
މި ނިންމުމަކީ މުހިންމު ބޭނުންތަކެއްގައި ނިންމާފައިވާ ނިންމުމެއްކަމަށް ވަޒީރު އެކްސްގައި ކުރެއްވި ޕޯސްޓެއްގައި ފާހަގަކުރައްވާފައިވެއެވެ. މި ނިންމުމުގެ މައިގަނޑު މަޤްޞަދުތަކުގެ ތެރޭގައި އެލްޖީއޭގެ ހާމަކަން (ޓްރާންސްޕޭރަންސީ) އިތުރުކުރުމާއި، ކައުންސިލްތަކުން ޖަވާބުދާރީވުމާއި ޒިންމާދާރުވުން އިތުރުކުރުން ހިމެނެއެވެ.
މީގެ އިތުރުން، ގުޑް ގަވަރނަންސްގެ ހަމަތައް ދެމެހެއްޓުމަށް މަގުފަހިކޮށްދިނުމަކީވެސް މި ނިންމުމުގެ މުހިންމު މަޤްޞަދެއްކަމަށް ވަޒީރު ވަނީ ފާހަގަކުރައްވާފައެވެ.
މި ނިންމުން ނިންމާފައިވަނީ، ކައުންސިލްތަކާ ގުޅޭގޮތުން މީގެ ކުރިން ތައްޔާރުކޮށްފައިވާ ރިޕޯޓުތަކުން ފާހަގަކުރެވިފައިވާ ގިނަ މައްސަލަތަކަކަށް ރިޢާޔަތްކޮށެވެ. މި މައްސަލަތަކުގެ ތެރޭގައި ކައުންސިލްތަކަށް އިދާރާތަކުން ފޮނުވާ ސިޓީތަކަށް ޖަވާބު ނުދިނުމާއި، އަތޮޅު ކައުންސިލާއި ދައުލަތުގެ އެހެނިހެން އިދާރާތަކުން މަޢުލޫމާތަށް އެދި ފޮނުވާ ލިޔެކިޔުންތަކަށް އަޅާނުލައި ދޫކޮށްލުން ފަދަ ކަންކަން ހިމެނެއެވެ.
މި އައު ނިޒާމުގެ ދަށުން، ކައުންސިލްތަކުގެ މަސައްކަތްތައް އިތުރަށް ހަރުދަނާވެ، ރައްޔިތުންނަށް ދެވޭ ޚިދުމަތްތަކުގެ ފެންވަރު މަތިވެގެންދާނެ ކަމަށް އުންމީދު ކުރެވެއެވެ.
