ދިވެހިރާއްޖޭގެ އިމާމުންގެ ޢިލްމީ ފެންވަރު މަތިކުރުމަށްޓަކައި މޮރޮކޯ ސަރުކާރުން ވަނީ އައު ދޮރެއް ހުޅުވާލައްވާފައެވެ. މިގޮތުން، ދިވެހި އިމާމުންނަށް މޮރޮކޯގައި ޢަރަބި ބަސް ކިޔެވުމުގެ ފުރުޞަތު ދިނުމަށް މޮރޮކޯ ސަރުކާރުން ނިންމަވައި، އެކަން ދިވެހި ސަރުކާރަށް ރަސްމީކޮށް އަންގަވާފައިވެއެވެ.
މި މުހިންމު ފުރުޞަތު ފަހިވެގެން ދިޔައީ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު، މޮރޮކޯގެ ރަސްގެފާނަށް ފޮނުއްވެވި ސިޓީފުޅަކާ ގުޅިގެންނެވެ. އިސްލާމިކް މިނިސްޓްރީން މަޢުލޫމާތު ދެއްވާފައިވާ ގޮތުގައި، މިއީ ދެ ޤައުމުގެ ދެމެދުގައި އޮތް އިސްލާމީ އުޚުއްވަތްތެރިކަމުގެ ގުޅުން އިތުރަށް ބަދަހިކޮށް، ދީނީ ދާއިރާއިން ކުރިއެރުން ހޯދުމަށް ލިބިގެންދިޔا މުހިންމު ފުރުޞަތެކެވެ.
އިސްލާމީ ކަންތައްތަކާބެހޭ ވަޒީރު ޑރ. މުޙައްމަދު ޝަހީމް ޢަލީ ސަޢީދު ވިދާޅުވެފައިވާ ގޮތުގައި، މިކަމާ ގުޅޭ އެއްބަސްވުން މޮރޮކޯ ސަރުކާރުން ވަނީ ދިވެހި ސަރުކާރަށް ފޮނުއްވާފައެވެ. އަދި ވަރަށް އަވަހަށް މި އެއްބަސްވުމުގައި ސޮއިކުރެވިގެންދާނެ ކަމަށް އުންމީދުކުރެވެއެވެ. މި ޕްރޮގްރާމްގެ ދަށުން ދިވެހި އިމާމުންނަށް ޢަރަބި ބަސް އުނގެނުމުގެ ފުރުޞަތު ލިބިގެންދާނީ މޮރޮކޯގެ ރަސްގެފާނުގެ ޚާއްޞަ ބެއްލެވުމުގެ ދަށުން ހިންގާ އިންސްޓިޓިއުޓަކުންނެވެ.
މި ޕްރޮގްރާމްގެ ދަށުން ކިޔަވާ ދަރިވަރުންނަށް ހިލޭ ދިރިއުޅުމުގެ އިންތިޒާމުގެ އިތުރުން ޕޮކެޓްމަނީވެސް ލިބިގެންދާނެއެވެ. މިއީ ދިވެހި އިމާމުންނަށް ލިބިގެންދާ ވަރަށް މުހިންމު ފުރުޞަތެއް ކަމުގައި ފާހަގަކުރެވެއެވެ.
މިހާރުގެ ސަރުކާރުގެ އެންމެ މުހިންމު އެއް އަމާޒަކީ އިމާމުންނަށް ރާއްޖެއާއި ރާއްޖެއިން ބޭރުން އިތުރު ތަމްރީނާއި ތަޖުރިބާގެ ފުރުޞަތުތައް ހޯދައިދިނުމެވެ. މިގޮތުން ވޭތުވެދިޔަ އަހަރު އެކަނި 100 އަށްވުރެ ގިނަ އިމާމުންނަށް ރާއްޖެއިން ބޭރުން ތަމްރީނާއި ތަޖުރިބާގެ ފުރުޞަތު ވަނީ ހޯދައިދެވިފައެވެ.
މި ފުރުޞަތުގެ ސަބަބުން ދިވެހިރާއްޖޭގެ މިސްކިތްތަކުގައި ޚިދުމަތްކުރާ އިމާމުންގެ ޢިލްމީ ފެންވަރު މަތިވެ، އިސްލާމްދީނުގެ ޢިލްމު ފެތުރުމުގައި އިތުރު ކުރިއެރުންތަކެއް ލިބިގެންދާނެކަން ކަށަވަރެވެ. އަދި މޮރޮކޯއަކީ އިސްލާމީ ތަޢުލީމުގެ ރޮނގުން ވަރަށް ކުރިއަރާފައިވާ ޤައުމަކަށްވުމާއެކު، އެ ޤައުމުގެ ތަޖުރިބާއިން ދިވެހި އިމާމުންނަށް ވަރަށް ގިނަ ފައިދާތަކެއް ކުރާނެކަން ޔަޤީނެވެ.
މޮރޮކޯ ސަރުކާރުން ދިވެހި އިމާމުންނަށް ހުޅުވާލެއްވި މި ފުރުޞަތަކީ ދެ ޤައުމުގެ ދެމެދުގައި އޮތް ގުޅުން އިތުރަށް ވަރުގަދަވެ، ދިވެހިރާއްޖޭގެ ދީނީ ޚިދުމަތްތައް އިތުރަށް ފުޅާވެގެންދާނެ ކަމެކެވެ. މި ފުރުޞަތުގެ ބޭނުން އެންމެ ފުރިހަމަ ގޮތުގައި ހިފައި، ގިނަ އިމާމުންތަކަކަށް މީގެ މަންފާ ލިބިގެންދިއުމަކީ އެދެވިގެންވާ ކަމެކެވެ.
