ތިރީހަކަށް އަހަރަށްވުރެ ގިނަ ދުވަހު އިންޑިއަން ސިނެމާގައި މަސައްކަތްކުރުމަށްފަހު، ބޮލީވުޑްގެ އައިކަން ޝާހްރުކް ޚާނަށް ވަނީ ފުރަތަމަ ފަހަރަށް ނޭޝަނަލް ފިލްމް އެވޯޑް ލިބިފައެވެ. މިއެވޯޑް އޭނާއަށް ލިބުނީ ރާޖްކުމާރް ހިރާނީ ޑައިރެކްޓްކުރި ”ޑަންކީ“ (2023) ފިލްމުގައި އޭނާ ކުޅުނު ރޯލަށެވެ.
ދުނިޔޭގެ އެކި ކަންކޮޅުތަކުގައި ތިބި ފޭންސް މި ދިގު އިންތިޒާރަކަށްފަހު ލިބުނު ޝަރަފު ފާހަގަކުރިއިރު، މި ކާމިޔާބީއާއެކު އާންމުންގެ މެދުގައި އުފެދުނު ސުވާލަކީ: އިންޑިއާގެ އެންމެ ކާމިޔާބު އެއް އެކްޓަރަށް ނޭޝަނަލް އެވޯޑެއް ލިބުމަށް މިހާ ގިނަ ދުވަސްވީ ކީއްވެގެންތޯއެވެ؟
އިންޑަސްޓްރީގެ ތަޙްލީލުކުރާ ފަރާތްތަކުން ބުނާ ގޮތުގައި ޝާހުއަށް އެވޯޑު ލިބެން މި ލަސްވި ލަސްވުމަކީ ހުނަރު ނެތުމުގެ ސަބަބުންނެއް ނޫނެވެ. ނަމަވެސް އެއީ ވާދަވެރިކަމާއި، ވަކި ބާވަތެއްގެ ފިލްމުތަކަށް އިސްކަންދިނުމާއި، އަދި އަހަރުތަކެއް ވަންދެން ޖޫރީން އެކި ކަންކަމަށް އިސްކަންދިނުންތަކުގެ މައްޗަށް ބިނާވެފައިވާ ކަމެކެވެ.
”ޝާރުކް ޚާން އަކީ އަބަދުވެސް ސުޕަރސްޓާރެއް. ނަމަވެސް ނޭޝަނަލް އެވޯޑްތައް ގިނަފަހަރަށް ލިބެނީ އާދަޔާ ޚިލާފު ނުވަތަ އިޖްތިމާޢީ ގޮތުން އަސަރުފޯރުވާ ފަދަ ރޯލުތައް ކުޅޭ އެކްޓަރުންނަށް. ޚާންގެ ކުރީގެ ރޯލުތައް، އެއީ އައިކޮނިކް ރޯލުތަކެއް ކަމުގައިވީ ނަމަވެސް، ގިނަފަހަރަށް ހުންނަނީ ލޯބީގެ ނުވަތަ ވިޔަފާރީގެ ބާވަތުގެ ރޯލުތައް“ ފިލްމް ކްރިޓިކް ޕަރުލް މެހްރާ.
ފިލްމްފެއަރ ނުވަތަ އައި.އައި.އެފް.އޭ ފަދަ މަޤްބޫލު އެވޯޑް ޝޯތަކާ ޚިލާފަށް، ނޭޝަނަލް ފިލްމް އެވޯޑްތައް ނިންމަނީ އިންޑިއާގެ ސަރުކާރުން ޢައްޔަންކުރާ ޖޫރީއަކުންނެވެ. މި ޖޫރީން ބޮކްސް އޮފީހުގެ އާމްދަނީ ނުވަތަ ފޭންސްގެ މަޤްބޫލުކަމަށް ނުބަލައެވެ.
ގިނަ ފިލްމްފެއަރ އަދި ބައިނަލްއަޤްވާމީ އިނާމުތައް ލިބިފައިވީ ނަމަވެސް، މިއީ ޝާރުކް ޚާންއަށް ނޭޝަނަލް ފިލްމް އެވޯޑްސް އިން ލިބުނު ފުރަތަމަ ފަހަރެވެ. މިއީ އޭނާގެ 30 އަހަރުގެ ކެރިއަރގައި ވަރަށް ހާއްސަ އެވޯޑެކެވެ.
އެވޯޑް ދިނުމުގެ ރަސްމިއްޔާތު ބޭއްވުމަށް ހަމަޖެހިފައިވަނީ އޮގަސްޓް މަހުގެ ފަހުކޮޅު ނިއު ދިއްލީގައެވެ. އިނާމުތައް ހަވާލުކުރައްވާނީ އިންޑިއާގެ ރައީސް ދްރައުޕަދީ މުރުމުއެވެ.
