ވިޒިޓް މޯލްޑިވްސްގެ ގްލޯބަލް އެމްބެސަޑަރެއްގެ ގޮތުގައި ނެޓްފްލިކްސްގެ ރެކޯޑް މުގުރާލި ލައިވް އެކްޝަން ސީރީޒް ”ވަން ޕީސް“ ގެ ތަރި ޓޭޒް ސްކައިލާ ހަމަޖައްސައިފިއެވެ. މި މަޝްހޫރު އެކްޓަރު މި މަގާމަށް ހަމަޖެއްސިފައިވަނީ ވިޒިޓް މޯލްޑިވްސްއިން ހިންގާ ގްލޯބަލް އެމްބެސެޑަރޝިޕް ޕްރޮގްރާމުގެ ދަށުންނެވެ.
ވިޒިޓް މޯލްޑިވްސްއިން ފާހަގަކުރި ގޮތުގައި، ސްކައިލާ އެމްބެސެޑަރެއްގެ ގޮތުގައި ހަމަޖެއްސުމަކީ ދުނިޔޭގެ މުނިފޫހިފިލުވުމުގެ ދާއިރާގެ އެންމެ ނުފޫޒުގަދަ އެއް ފަރާތް މެދުވެރިކޮށް، ބައިނަލްއަގްވާމީ މުޖުތަމަޢުއަށް ރާއްޖޭގެ އަލިކަން ފޯރުކޮށްދިނުމުގެ ފުރުސަތެއް ކަމުގައި ބުނެފައިވެއެވެ.
މި އެމްބެސެޑަރޝިޕްގެ ދަށުން ސްކައިލާ 2025 ވަނަ އަހަރުގެ އޮގަސްޓު 27 އިން ސެޕްޓެމްބަރު 15 އަށް ރާއްޖެއަށް ޒިޔާރަތްކުރާނެއެވެ. މި ޒިޔާރަތުގައި ރާއްޖޭގެ ކަލިނަރީ އާޓްސް އަދި ގުދުރަތީ ރީތިކަން ފާހަގަކޮށް، ރާއްޖޭގެ މަންޒިލު މާކެޓްކުރުމުގެ ޚާއްސަ ޕްރޮޖެކްޓެއް ކުރިއަށް ގެންދެވޭނެއެވެ.
އެމްބެސެޑަރޝިޕްގެ މައިގަނޑު އަމާޒުތައް
މި އެމްބެސެޑަރޝިޕްގެ މައިގަނޑު އަމާޒުތަކުގެ ތެރޭގައި ބައިނަލްއަގްވާމީ އޯޑިއަންސްއަށް ރާއްޖެ ޕްރޮމޯޓްކުރުމާއި، ރާއްޖޭގެ ޕްރީމިއަމް އަދި އަސްލު ސަގާފީ ތަޖުރިބާތައް ދައްކުވައިދިނުން ހިމެނެއެވެ. މީގެ އިތުރުން އާއިލާތަކާއި، ޒުވާނުންނާއި، އެޑްވެންޗަރ ލޯބިކުރާ ފަރާތްތަކަށް އަމާޒުކޮށްގެން ރާއްޖޭގެ ފަތުރުވެރިކަމުގެ ބްރޭންޑު އިތުރަށް ހަރުދަނާކުރުމަށް މަސައްކަތްކުރެވޭނެއެވެ.
ސްކައިލާއަކީ އިންސްޓަގްރާމްގައި 1.8 މިލިއަނަށްވުރެ ގިނަ ފޮލޯވަރުން ތިބި، ސޯޝަލް މީޑިއާގެ ނުފޫޒުގަދا ތަރިއެކެވެ. އޭނާގެ ކޮންމެ ޕޯސްޓަކަށް އެވްރެޖްކޮށް 45,000 ލައިކްސް އަދި 300 ކޮމެންޓް ލިބެއެވެ. މި ނުފޫޒަކީ ރާއްޖޭގެ ފަތުރުވެރިކަން އައު ހަރުފަތަކަށް ގެންދިއުމަށް ލިބޭނެ މުހިންމު ބާރެއް ކަމުގައި ވިޒިޓް މޯލްޑިވްސްއިން ފާހަގަކޮށްފައިވެއެވެ.
