ރައްޔިތުންގެ މަޖިލީހުގެ ދެވަނަ ދައުރު ނިމި، މަޖިލިސް ޗުއްޓީއަކަށް ގޮސްފައިވަނިކޮށް، ދައުރުން ބޭރުން މަޖިލީހުގެ ޖަލްސާތަކެއް ބޭއްވުމަށް ނިންމައިފިއެވެ.
މަޖިލީހުގެ އިދާރާއިން މައުލޫމާތު ދެއްވާފައިވާ ގޮތުގައި މި މަހުގެ ފަހުކޮޅު ދެ ޖަލްސާއެއް ބޭއްވުމަށް ވަނީ ހަމަޖެހިފައެވެ. ނަމަވެސް މި ޖަލްސާތަކުގެ އެޖެންޑާ އަދި ވަނީ ހާމަކޮށްފައެއް ނުވެއެވެ. އެޖެންޑާގެ މައުލޫމާތު އަންނަ ދުވަސްތަކުގައި ހިއްސާކުރައްވާނެ ކަމަށް މަޖިލީހުގެ އިދާރާއިން ވަނީ ބުނެފައެވެ.
ނަމަވެސް ބައެއް ފަރާތްތަކުން ރިޕޯޓުކުރާ ގޮތުގައި މި ޖަލްސާތަކުގައި މަސްތުވާތަކެތީގެ ގާނޫނަށް އިސްލާހު ގެނައުމުގެ ބިލުގެ މަސައްކަތްތައް ކުރިއަށް ގެންދެވޭނެއެވެ. މީގެ އިތުރުން މަޖިލީހުގެ ޗުއްޓީއަށް ދިއުމުގެ ކުރިން ހުށަހެޅިފައިވާ އެހެނިހެން މުހިންމު ބިލުތަކުގެ މަސައްކަތްތައްވެސް ކުރިއަށް ގެންދެވޭނެ ކަމަށް ބެލެވެއެވެ. އޭގެ ތެރޭގައި މީޑިއާ ކޮމިޝަންގެ ބިލް ހިމެނެއެވެ.
މަޖިލީހުގެ ޗުއްޓީއަށް ދިއުމުގެ ކުރިން ހުށަހެޅިފައިވާ މުހިންމު ބިލުތަކުގެ ތެރޭގައި އިދިކޮޅު ފަރާތްތަކުން ކަންބޮޑުވުން ފާޅުކުރަމުންދާ މީޑިއާ ރެގިއުލޭޝަންގެ މަސައްކަތްތައްވެސް ހިމެނެއެވެ. މި ބިލާ ގުޅޭގޮތުން އިދިކޮޅު ފަރާތްތަކުން ވަނީ ތަފާތު ކަންބޮޑުވުންތައް ފާޅުކޮށްފައެވެ.
