ޑިވެލޮޕްމެންޓު ބެންކަށް ގެނައި މެނޭޖަރަށް މުސާރަ ނުދެވި އޮތް މައްސަލައިން ރާއްޖޭގެ އިގްތިސާދީ ހާލަތު ހުރިގޮތް ވަޒަން ކުރެވޭކަމަށް އެމްޑީޕީގެ ޕީޖީ ލީޑަރު އިބްރާހިމް ނާޒިލް ވިދާޅުވެއްޖެއެވެ.
އެމްޑީޕީގެ ގައުމީ މަޖިލީސް ބައްދަލުވުމެއްގައި ވާހަކަދައްކަވަމުން ޕީޖީ ލީޑަރު ނާޒިލް ވިދާޅުވީ، އޮކްޓޫބަރު ތިން ވަނަ ދުވަހުން ފެށިގެން މާލެ ސަރަހައްދުގައި މުޒާހަރާތައް ކުރިއަށް ގެންދިއުމަށް ފާސްކުރެވުނު ގަރާރަށް ތާއީދުކުރައްވާކަމަށެވެ. އަދި ގަރާރަށް ބަލާއިރު އެންމެ ބޮޑަށް ފާހަގަކުރެވެނީ 17 ނޮވެމްބަރު 2018ގައި ވުޖޫދަށް އައި ސަރުކާރުގެ ދައުރު ނިމި މިހާރު އޮތް ސަރުކާރުން ވެރިކަމާއި ހިސާބަށް ވާސިލުވިއިރު ރީއްޗަށް ހިނގަހިނގާ އޮތް އިގްތިސާދެއް ހަލާކުވެ ރައްޔިތުން ނިކަމެތިވެގެންދިޔަ ސަބަބުކަމަށެވެ. ނާޒިލް ވިދާޅުވީ، އެކަން މެދުވެރިވީ މިހާރު އޮތް ސަރުކާރުގެ ނާގާބިލުކަމުގެ ސަބަބުންކަން ސާފުކޮށް އެނގިގެންދާކަމަށެވެ.
އެހެންކަމުން ގަރާރުގައި އުފެއްދިފައިވާ އެންމެ މުހިންމު އެއް ސުވާލަކީ އަދިވެސް ރައްޔިތުން މަޑުން ތިބޭނީތޯ ކަމަށް އިޝާރާތްކުރެއްވިއެވެ. މެމްބަރު ވިދާޅުވީ، އޮކްޓޫބަރު 3 ވަނަ ދުވަހު ނުކުތުމަށް ކަނޑައެޅިފައިވާއިރު އެ ފިޔަވަޅު އަޅަން އެމްޑީޕީއަށް މަޖުބޫރުވި ސަބަބުވެސް ވަރަށް ސާފުކަމަށާއި ރާއްޖޭގެ އިގްތިސާދު ހަލާކުވެ ނެތިގޮސްފައިވާކަމަށެވެ.
ރައީސް އިބްރާހިމް މުހައްމަދު ސާލިހުގެ ވެރިކަމުގެ ދައުރުގައި ކޮވިޑް19ގެ ބަލިމަޑުކަން އައުމުންވެސް އޭރު ހުންނެވި އިގްތިސާދީ ވަޒީރު ފައްޔާޒް އިސްމާއިލްގެ ބެއްލެވުމުގެ ދަށުން އިގްތިސާދު ސުންނާފަތިވިޔަ ނުދިނުމަށްޓަކައި މަސައްކަތްތައް ކުރެވިގެންދިޔަ ގޮތް ރައްޔިތުންނަށް ވަރަށް ސާފުވާނެކަމަށް ވިދާޅުވިއެވެ. އެހެންކަމުން މިހާރު އޮތް ހިސާބަށް ވާސިލުވީ މި ސަރުކާރުގެ ނާގާބިލުކަމުންކަން ފެނިގެންދާކަމަށެވެ.
ވެރިކަަމަށް އައުމުގެ ކުރިން ސަރުކާރުން ދެއްކި ވާހަކަތަކާއި މިހާރު ދައްކަމުންދާ ވާހަކަތައް ތަފާތުކަމަށްވެސް އިޝާރާތްކުރެއްވިއެވެ. ނާޒިލް ވިދާޅުވީ، ކެމްޕެއިން ދުވަސްވަރު ފައިސާ ގެންނަން އެނގޭކަމަށް ބުނަމުންދިޔަކަމަށެވެ. އެހެންކަމުން މިހާރު ހުންނެވީ ޗައިނާގައިކަމަށްވާއިރު އަންނައިރު ވިދާޅުވިގޮތަށް ފައިސާ ހިފައިގެން ވަޑައިގަތުމަށް ގޮވާލައްވާކަމަށެވެ. އަދި ރައްޔިތުންގެ އަތުން ވޯޓުތަކެއް ހޯދާފައިވަނީ މާލީ ހާލަތު ރަނގަޅުކޮށްދެވޭނެކަމުގެ ވައުދާއިއެކުކަމަށް ފާހަގަކުރެއްވިއެވެ.
ވޯޓު ހޯދީ އިގްތިސާދު ކުރިއަރުވާނެކަމުގެ ޔަގީންކަން ދީގެންކަމަށްވާއިރު ސަރުކާރުން ފެށި ބަންކަރިންގެ ހިދުމަތަށް ވެގެންދިޔަ ގޮތާއިމެދު ނާޒިލް ވަނީ ސުވާލު އުފައްދަވާފައެވެ. އަދި ޑިވެލޮޕްމެންޓު ބެންކު ކޮބައިތޯވެސް ސުވާލު ކުރެއްވިއިރު ބަންކަރިންއަކީ 4 މިލިއަން ޑޮލަރުގެ އިންވެސްޓުމެންޓެއްކޮށްގެން 400 މިލިއަން ޑޮލަރު އަހަރެއްގެ ތެރޭގައި ހޯދައިދޭނެކަމަށް ބުނެ ފެށި ޕްރޮޖެކްޓެއްކަމަށްވެސް ވިދާޅުވިއެވެ. ނާޒިލް ވިދާޅުވީ، ބަންކަރިންގެ ހިދުމަތް ފެށި ސަރަހައްދަށް ނިސްބަތްވެވަޑައިގަންނަވާ ރައްޔިތުންނަށް އެ ހިދުމަތަށް ވެގެންދިޔަ ގޮތް ވަރަށް ސާފުކޮށް އެނގިވަޑައިގަންނަވާނެކަމަށެވެ.
ޑިވެލޮޕްމެންޓު ބެންކުގެ ކަންކަމަށް އަލިއަޅުއްވައި ނާޒިލް ވިދާޅުވީ، އެ މަސައްކަތްތަކާއި ހަވާލުވި މެނޭޖަރަށް އަދި ފައިސާ ނުދެވޭކަމަށެވެ. ތިން މަހުގެ މުސާރަ ނުދެވި އޮތުމުން އިގްތިސާދީ ހާލަތު ހުރިގޮތް ވަޒަންކުރެވޭނެކަމަށް އިޝާރާތްކުރެއްވިއެވެ. މެމްބަރު ވިދާޅުވީ، ކުރިއަށް އޮތް އަހަރުގެ ތެރޭގައި ލޯނު ފައިސާ ނުދެއްކޭނެ ވާހަކަ އެމްޑީޕީން ތަކުރާރުކޮށް ދައްކަމުންދާކަމަށެވެ.
