އެންޑޯމެޓްރިއޯސިސް އާއި ޕޮލިސިސްޓިކް އޯވަރީ ސިންޑްރޯމަށް ދޭ ފަރުވާ އާސަންދައިގައި ހިމެނުއްވުމަކީ، ހަމަހަމަގޮތެއްގައި ޞިއްޙީ ފަރުވާ ފޯރުކޮށްދިނުމުގެ އަމާޒަށް ވާސިލުވުމަށް އެޅުނު މުހިންމު ފިޔަވަޅެއްކަމަށް ފަސްޓްލޭޑީ ސާޖިދާ މުޙައްމަދު ވިދާޅުވެއްޖެއެވެ.
ފަސްޓްލޭޑީ އެފަދައިން ވިދާޅުވީ ”އެމްބްރޭސިންގ ވެލްނަސް: އަ ހޯލިސްޓިކް އެންޑް އެވިޑެންސް ބޭސްޑް އެޕްރޯޗް ޓު އަންޑަރސްޓޭންޑިންގ އެންޑޯމެޓްރިއޯސިސް އިން ލައިޓް އޮފް ކަރަންޓް ރީސަރޗް“ ގެ ނަމުގައި، ސޮސައިޓީ އޮފް އޮބްސްޓެޓްރީޝަންސް އެންޑް ގައިނަކޮލޮޖިސްޓްސް އޮފް މޯލްޑިވްސްގެ ފަރާތުން ބޭއްވި ސިލްސިލާ މަސައްކަތު ބައްދަލުވުމުގެ ތިންވަނަ އެޕިސޯޑު ނިންމުމުގެ ރަސްމިއްޔާތު ޝަރަފުވެރިކޮށްދެއްވައި ދެއްކެވި ވާހަކަފުޅުގައެވެ.
ފަސްޓްލޭޑީ ވިދާޅުވީ، ސޮސައިޓީ އޮފް އޮބްސްޓެޓްރީޝަންސް އެންޑް ގައިނަކޮލޮޖިސްޓްސް އޮފް މޯލްޑިވްސްގެ ފަރާތުން މިފަދަ މަސައްކަތު ބައްދަލުވުމެއް ކުރިއަށް ގެންދިޔަކަމަށްޓަކައި އެ ޖަމިއްޔާއަށް ޝުކުރު ދަންނަވާކަމަށެވެ.
ފަސްޓްލޭޑީ ވިދާޅުވީ، އެންޑޯމެޓްރިއޯސިސް އަކީ ސިއްޙީގޮތުން ކަންބޮޑުވާން ޖެހޭ މިންވަރަށް އިތުރުވަމުންދާ މައްސަލައެއް ކަމަށާއި، މިއީ ދުނިޔޭގެ ކޮންމެ 10 އަންހެނުންގެ ތެރެއިން އެކަކު ތަހައްމަލު ކުރަންޖެހޭ ޙާލަތެއް ކަމަށެވެ. އަދި ވިދާޅުވީ، ރާއްޖޭގައިވެސް މިކަން ތަހައްމަލު ކުރަމުންދާ އެތައް ބަޔަކު އެބަތިބި ކަމަށެވެ.
މީގެ އިތުރުން، މިކަން ތަހައްމަލު ކުރަމުންދާ އަންހެނުންނަކީ ހިތްވަރުގަދަ ބައެއްކަން ފާހަގަ ކުރައްވައި ފަސްޓްލޭޑީ ވިދާޅުވީ، އެ ޙާލަތުގައިވެސް އަންހެނުން އަދާކުރަން ޖެހޭ އެކިއެކި ޒިންމާތައް އަދާކުރުމުގައި ފަހަތަށް ނުޖެހޭކަމަށެވެ. އެގޮތުން ވަޒީފާގައާއި ގޭގައި އަދާކުރާ ޒިންމާތަކަށް ބަދަލެއް ނާންނަކަން އެކަމަނާ ފާހަގަ ކުރެއްވިއެވެ. އަދި އެކަމަނާ ވަނީ އެންޑޯމެޓްރިއޯސިސްގެ ސަބަބުން ކުރިމަތިވާ ޖިސްމާނީ އަދި ނަފްސާނީ އުނދަގޫތަކަށްވެސް އަލިއަޅުވާލައްވާފައެވެ.
ހަމައެއާއެކު، މި ބަލި ތަހައްމަލު ކުރަމުންދާ އަންހެނުންނަށް ކުރީބައިގައި ބަލި ދެނެނުގަނެވި ދިއުމުގެ ސަބަބުން ބޮޑެތި ސާޖަރީތައް ހަދަން ޖެހިފައިވާކަންވެސް އެކަމަނާ ފާހަގަ ކުރެއްވިއެވެ. އަދި ވިދާޅުވީ، ބަލި ދެނެގަތުމުގެ އުކުޅުތަކާއި، އެންމެ ފަހުގެ ދިރާސާތަކާމެދު ހޭލުންތެރިވުމަކީ ފަންނީ ބޭފުޅުންގެ މައްޗަށް އޮތް އިޚުތިޔާރެއް ނޫންކަމަށާއި، އެއީ ކުރަންޖެހޭ ކަމެއްކަމަށެވެ.
މީގެ އިތުރުން، މި ބަލި ތަހައްމަލު ކުރާ އަންހެނުންގެ ކިބައިން ފެންނަ އެކިއެކި އަލާމަތްތަކުގެ މައްޗަށްވެސް އެކަމަނާގެ ވާހަކަފުޅުގައި އަލިއަޅުވާލައްވާފައިވެއެވެ. އެގޮތުން ގައިގައި ރިއްސުމާއި، ދަރިމައިވުމުގައި ދިމާވާ މައްސަލަތަކާއި، ޑިޕްރެޝަން ފަދަ އެތައް ކަމެއް މި ބަލީގެ ސަބަބުން ކުރިމަތިވާކަމަށް ވިދާޅުވިއެވެ.
އެހެންކަމުން މި ކުރިއަށްދިޔަ މަސައްކަތު ބައްދަލުވުމުގައި ރާއްޖޭގެ ޙާލަތާ ގުޅޭގޮތުން މުހިއްމު މަޝްވަރާތަކެއް ކުރެވިފައިވާކަމަށް އުއްމީދު ކުރެވޭކަމަށްވެސް ފަސްޓްލޭޑީ ވިދާޅުވިއެވެ.
ގުޅުންހުރި ސިޔާސަތުތަކަށް ގެނެވިފައިވާ އިސްލާޙުތަކަށް މަރުޙަބާ ވިދާޅުވަމުން އެކަމަނާ ވަނީ، އެންޑޯމެޓްރިއޯސިސް އާއި ޕޮލިސިސްޓިކް އޯވަރީ ސިންޑްރޯމަށް ދޭ ފަރުވާ އާސަންދައިގައި ހިމެނުއްވުމަކީ، ހަމަހަމަގޮތެއްގައި ޞިއްޙީ ފަރުވާ ފޯރުކޮށްދިނުމުގެ އަމާޒަށް ވާސިލުވުމަށް އެޅުނު މުހިންމު ފިޔަވަޅެއްގެ ގޮތުގައި ސިފަކުރައްވާފައެވެ.
އެކަމަނާ ވަނީ، މި މަސައްކަތުބައްދަލުވުމުން ލިބުނު ފިލާވަޅުތަކުގެ އަލީގައި ޤައުމީ އެކްޝަން ޕްލޭނެއް އެކުލަވާލައި، މައްސަރުކަންތަކާ ގުޅޭގޮތުން ދަރިވަރުން ހޭލުންތެރިކުރުމަށް މަސައްކަތްތަކެއް ކުރެއްވުމަށް ކަމާބެހޭ މުއައްސަސާތަކަށް ގޮވާލައްވާފައެވެ. އަދި އެކަމަނާ ވަނީ، ޤައުމީ ފެންވަރެއްގައި ކަމުގެ މާހިރުންގެ މެދުގައި ގުޅުން ޤާއިމުކުރެއްވުމަށް ކުރައްވާ މަސައްކަތަށާއި، ޝާމިލުގޮތެއްގައި ފަރުވާދިނުމަށާއި ޢިލްމު ހިއްސާކުރެއްވުމަށް އެސް.އޯ.ޖީ.އެމުން ކުރައްވާ މަސައްކަތަށް ތާރީފުކުރައްވާފައެވެ.
އެކަމަނާގެ ވާހަކަފުޅު ނިންމަވާލައްވާފައިވަނީ، އެންޑޯމެޓްރިއޯސިސްއާ ގުޅޭގޮތުން ދައްކަން ޖެހޭ ވާހަކަތައް ދެއްކުމަށާއި، އަންހެނުންގެ ސިއްޙަތާއި ދުޅަހެޔޮކަމަށް އަޑުއުފުލުމުގައި ސާބިތުވެ ތިއްބެވުމަށް، ކަމާގުޅޭ ހުރިހާ ފަރާތްތަކަށް ގޮވާލައްވަމުންނެވެ. މި މަސައްކަތުބައްދަލުވުން ވާން ޖެހޭނީ ހަމަ އެކަނި މަޝްވަރާކުރުމުގެ މަންސައަކަށް ނޫންކަމަށާއި، އެ ބައްދަލުވުން ވާންޖެހޭނީ ޞިއްޙީ ނިޒާމު އިސްލާޙުކުރުމަށް ލިބޭ ހިތްވަރަކަށް ކަމަށް އެކަމަނާ ވިދާޅުވިއެވެ.
