މާނަވީ ތަރިކައިގެ މަސައްކަތްތައް ރާއްޖޭގެ އެކި ހިސާބުތަކުގައިކަމަށް މިނިސްޓަރ އޮފް ދިވެހި ލެންގުއޭޖް، ކަލްޗަރ އެންޑް ހެރިޓޭޖް އާދަމް ނަސީރު އިބްރާހީމް ވިދާޅުވެއްޖެއެވެ.
މިނިސްޓަރު މިއަދު މަޖިލީހަށް ހާޒިރުކުރުމުން މަރަދޫ ދާއިރާގެ މެންބަރު އަހުމަދު ދީދީ ސުވާލުކުރީ، ތާރީހާއި ސަގާފަތާއި ބެހޭ އެއްވެސް މަސައްކަތެއް އެ ދާއިރާގައި ކުރިއަށް ދޭތޯއެވެ. އަދި ގަމުގައި ކުރިއަށްދާ އެއާޕޯޓު ތަރައްގީކުރުމުގެ މަސައްކަތުގެ ތެރެއިން ތާރީހީ ތަންތަނަށް ގެއްލުން ލިބެމުންދާކަމަށް އޭނާ ވިދާޅުވިއެވެ.
މިނިސްޓަރު ވިދާޅުވީ ތަރިކައިގެ ދާއިރާގައި ހިމެނެނީ މައިގަނޑު ދެ ބާވަތެއްކަމަށެވެ. އެއީ މާނަވީ ތަރިކައާއި، މާއްދީ ތަރިކަކަމަށެވެ. މާނަވީ ތަރިކައިގެ މަސައްކަތްތައް ރާއްޖޭގެ އެކި ހިސާބުތަކުގައި ކުރިއަށް ދާނެކަމަށް ފާހަގަކޮށް މިނިސްޓަރު ވިދާޅުވީ އެގޮތުން އައްޑޫގައިވެސް ކުރިއަށްދާކަމަށެވެ. މާއްދީ ތަރިކައިގެ ކަންތައްތައްތަކުގެ ތެރެއިން ސްޓްރެޖިކް އެކްޝަން ޕްލޭނުގައި ހިމެނިފައިވާ ކަންތައްތައް ފުރިހަމަވެގެންދާއިރު، އައްޑޫ ސިޓީގެ މަސައްކަތްވެސް އޭގެ ތެރެއިން ކުރެވިގެންދާނެކަމަށެވެ.
ހިތަދޫ ދެކުނު ދާއިރާގެ މެންބަރު އިބްރާހީމް ނާޒިލްވެސް ވަނީ މިނިސްޓަރާއި ސުވާލުކުރައްވާފައެވެ. އެގޮތުން މާއްދީ ގޮތުން ދެ އަހަރު ދުވަހުގެ ބަޖެޓު ވުޒާރާއަށް ލިބިފައިވާކަމަށާއި، މިހަ ހިސާބަށް އައިއިރު، ވުޒާރާއަށް ކުރެވިފައިވާ މަސައްކަތްތަކަކީ ކޮބައިތޯ ނާޒިލް ވަނީ ސުވާލު ކުރައްވާފައެވެ. އަދި ކުރަން ބޭނުންވާ ކަންކަން މި ބަޖެޓު ނުކުރެވެނީތޯވެސް ސުވާލުކުރެއްވިއެވެ. ދެެން އަންނަ އަހަރަކަށް އިތުރަށް ފައިސާ ބޭނުންވާކަމެއް އެބަހުރިތޯ ނާޒިލް ވަނީ ސުވާލު އުފައްދަވާފައެވެ.
މިނިސްޓަރު ވިދާޅުވީ ބަޖެޓަށް އެދެނީ ސަރުކާރުގެ ސްޓްރޭޖިކް އެކްޝަން ޕްލޭންގައިވާ ކަންތައްތަކަށްކަމަށެވެ. އެގޮތުން އެކަންކަން ދަނީ ކުރިއަށްކަމަށް ވިދާޅުވިއެވެ
