ސަރުކާރުގެ އަމަލުތަކުގެ ސަބަބުން ރައްޔިތުންގެ ޕެންޝަން ފަންޑުގައި ހުރި ފައިސާގައި އަގެއް ނެތްކަމަށް ރައްޔިތުންގެ މަޖިލީހުގެ ހުޅުމާލެ ދެކުނު ދާއިރާގެ މެމްބަރު ޑރ އަހުމަދު ޝަމްހީދު ވިދާޅުވެއްޖެއެވެ.
ޕެންޝަން ގާނޫނަށް ހުށައަޅާފައިވާ އިސްލާހަށް ބަހުސް ކުރައްވަމުން ޑރ ޝަމްހީދު ވިދާޅުވީ، މި އިސްލާހުގެ ބޭނުމަކީ ރާއްޖޭގައި ބޭސްފަރުވާއަށް ހުރި ދަތިތަކާއި، ރައްޔިތުންގެ ހާލަތު ހުރި ގޮތުން މިކަންކަމަށްޓަކައި ފައިސާ ލިބޭޏެ ގޮތް ހެދުންކަމަށެވެ. މިއީ އަލަށް ކުރެވޭކަމެއް ނޫންކަމަށާއި، ސިންގަޕޫރުފަދަ ދުނިޔޭގެ އެހެން ގައުމުތަކުގައިވެސް އޮންނަނީ ޓާމިނަލް އިލްނެސްއެއް ކުރިމަތިވެއްޖެ ހާލަތެއްގައި އެމީހެއްގެ ފައިސާ ލިބޭ ގޮތަށްކަމަށް ޑރ ޝަމްހީދު ވިދާޅުވިއެވެ.
ޑޮކްޓަރަކު މީހަކު ގާތުގައި އޭނާއަށް ދެން ދުނިޔޭގައި އުޅޭން އޮތީ މަދު ދުވަސްކޮޅެއްކަމަށް ނުވަތަ ވަކ މުއްދަތެއްކަމަށް ބުނާ ހިސާބުން، އެ ފައިސާ ފަހަށް ރައްކާކުރުމުގެ އެއްވެސް މާނައެއް ނެތްކަމަށް ފާހަގަކޮށް ޑރ ޝަމްހީދު ވިދާޅުވީ، އެހެންކަމުން އެ ފައިސާ މި ހާލަތުގައި ލިބޭނެ ގޮތެއް އޮންނަން ޖެހޭނެކަމަށެވެ.
ދެން އޮތީ މިއަދު ޕެންޝަން ފައިސާ އަޅުގަނޑުމެންނަށް ރިޓަޔަރމެންޓަށް ބޭނުން ކުރެވޭ ކަހަލަ ގޮތަކަށް އޮތް އެއްޗެއްތޯ؟ އާންމު މީހަކަށް ރިޓަޔަރމެންޓަށްދާއިރު މި ލިބެނީ، ސޭވް މި ކުރެވެނީ މިއަދު ތިން ލައްކަ ނޫނީ ހަތަރު ލައްކަ ރުފިޔާ. އެހެންވެ އޭގެ މާނައަކީ މަހަކު 1،600 އެއްހާ ރުފިޔާ ރިޓަޔަރމެންޓް ސްކީމްގެ ތެރެއިން އެމީހާއަށް މި ލިބެނީ.
ޑރ ޝަމްހީދު ވިދާޅުވިއެވެ.
ރިޓަޔަރމެންޓާއި ހިސާބަށް ދާއިރު ގާތްގަނޑަށް ސޭވް ކުރެވެނީ 4 ލައްކައެއްހާ ރުފިޔާކަމަށްވާއިރު، މީގެން މާ ބޮޑު ބޭނުމެއް ހިފޭނެތޯ ޑރ ޝަމްހީދު ސުވާލު އުފެއްދެވިއެވެ. މިއަދު ރާއްޖޭގެ ފައިސާގެ އަގު ވެއްޓިގެންދާއިރު، ކުރިއަށް އަންނަ އޮތް އަހަރުތަކުގައި މީގެ މާ ބޮޑޫ އަގެއް ނުހުންނާނެކަމަށް ޑރ ޝަމްހީދު ވިދާޅުވިއެވެ. ރިޓަޔަރމެންޓް ޕެންޝަންގެ ގޮތުގައި ބަހައްޓަން މިއީ މާ ކުޑަ އަދަދެއްކަމަށާއި، އެހެންކަމުން ވީހާވެސް ފަސޭހަކަމާއިއެކު އަވަހަށް މި ފައިސާ ބޭނުންކުރެވޭނެ ގޮތް ފަހިކޮށްދޭޏް ޖެހޭކަމަށް ޑރ ޝަމްހީދު ވިދާޅުވިއެވެ.
ދުނިޔޭގެ ބައެއް ގައުމުތަކަށް ބަލާއިރު ޕެންޝަން ސްކީމްތަކަކީ ބޯހިޔާވަހިކަމާއި، ސިއްހީ މައްސަލަތަކާއި އަދި ރިޓަޔަރމެންޓްގެވެސް ހައްލުކަމަށާއި، ނަމަވެސް ރާއްޖޭގައި ކަން އޮތީ މިހެން ނޫންކަމަށް ފާހަގަކުރެއްވިއެވެ. އަދި ވިދާޅުވީ އެ ގޮތަށް ކަންކަން ބަދަލު ކުރަން ބޭނުންވަނީނަމަ ލިބޭ އާމްދަނީ ޕެންޝަނަށް ފައިސާ ޖަމާކުރަން ޖެހޭކަމަށެވެ. އެހެންކަމަށްވާނަމަ ލިބޭ އާމްދަނީއަށްވެސް ކުރިއެރުން އަންނަން ޖެހޭކަމަށް ވިދާޅުވިއެވެ.
ޑރ ޝަމްހީދު ވިދާޅުވީ މިހާރު ރާއްޖޭގައި ޕެންޝަން ސްކީމް އޮންނަ ގޮތުން ފައިދާވަނީ ދައުލަތަށްކަމަށާއި، މަހުން މަހަށް ކުރަން ޖެހޭ ހަރަދުތައް ކުރުމަށް މި ސްކީމް ބޭނުން ކުރަމުން އަންނަކަމަށް ވިދާޅުވިއެވެ. މި ސްކީމް ބޭނުންކޮށްގެން ނުރަނގަޅު އަމަލުތައް ހިންގަމުން އަންނަކަމަށްވެސް ވިދާޅުވިއެވެ. އެކަންކަމުގެ ސަބަބުން އަނެއްކާ ރައްޔިތުންގެ ޕެންޝަން ފަންޑުތަކުގައި ހުރި ފައިސާ އަގު ދަށްވެގެންދާނެކަމަށްވެސް ވިދާޅުވިއެވެ.
