ރައްޔިތުންގެ އަސާސީ ކަންކަން ބާއްވާފައި ސަރުކާރުން ބޭކަރު ހަރަދުތައް ކުރާ ކަމަށްބުނެ ވައިކަރަދޫ ދާއިރާގެ މެމްބަރު ހުސެއިން ޒިޔާދު ސަރުކާރަށް ފާޑުވިދާޅުވެއްޖެއެވެ.
މެމްބަރު މުހައްމަދު އިބްރާހިމް ހުށައަޅުއްވާފައިވާ ދިވެހިރާއްޖޭގައި ލޭ ހޯދުމަށް ނުހަނު ދަތިވާކަން ފާހަގަކޮށް އެ މައްސަލަ ހައްލުކުރުމާއި މެދު ރައްޔިތުންގެ މަޖިލީހުގެ މެމްބަރުން ދެކޭގޮތް ބެލުމަށް ހުށައަޅާފައިވާ ގަރާރަށް ބަހުސް ކުރައްވަމުން މެމްބަރު ޒިޔާދު ވިދާޅުވީ އެ ގަރާރަށް ފުރިހަމައަށް ތާއިދުކުރައްވާ ކަމަށެވެ.
ޒިޔާދު ވިދާޅުވީ ތެލެސީމިއާ ކުދިންނަށް ދިމާވާ ދަތިތައް ހައްލުކުރުމަށް ވަރަށް ގިނަ ވައުދުތައް އެކި ސަރުކާރުން ވެފައިވާ ކަމަށާއި، ހަމަ އެފަދައިން މި ސަރުކާރުންވެސް ގިނަ ވައުދުތަކެއް ވެފައިވާ ކަމަށެވެ. ތެލެސީމިއާ ކުދިންނަށް ހާއްސަ ހޮސްޕިޓަލެއް ގާއިމްކުރުމުގެ ވައުދަކީވެސް އޮތް ވައުދެއް ކަމަށް މެމްބަރު ވިދާޅުވިއެވެ.
ޒިޔާދު ވިދާޅުވީ އެކަމަށް ބޭނުންވާ ލޭ، ބޭނުން ނުކުރޭވަރަށް ހަލާކުވެ ރައްޔިތުން މުޒާހަރާއަށް ނިކުތުމުން އެތަނުގެ ހާލަތު އިނގޭކަމަށް ބުނެ އެތަނަށް ވެރިއަކު ލުން ފޔަވާ މާބޮޑު ކަމެއް ރައީސް ކުރައްވާފައި ނުވާ ކަމަށެވެ.
”އަޅުގަނޑުމެން މި ދައްކަނީ އޮންލައިން އެޕެއް ހަދައިގެން މިކަން ކުރާ ވާހަކަ އިއްޒަތްތެރި ރައީސް. މިއަދާއި ހަމައަށް އައިއިރަކު މާބޮޑުކަމެއް ނެތް އެކަމުގައި އަޅުގަނޑުމެންނަށް ވެފައެއް. ލޭ ހޯދުމުގެ ދަތި އަދިވެސް އޮތީ އެހެން. ހަމައެކަނި ލެޔެއް ނޫން އިއްޒަތްތެރި ރައީސް، ރާއްޖޭގައި ބޭހުގެ ދަތިކަންވެސް ހަމަ އެވަރުގައި އޮތީ“
ރާއްޖޭގައި ހުރި މައްސަލަތައް ހައްލުކުރަން ހަޅޭލެވިޔަސް އެކަން އަދި ނުވާނެ ކަމަށާއި، އަމަލުން އެކަން ދައްކަން ޖެހޭ ކަމަށް ޒިޔާދު ވިދާޅުވިއެވެ. ޒިޔާދު ވިދާޅުވީ މިއަދުވެސް ކުޅުއްދުފުށީ ރީޖަނަލް ހޮސްޕިޓަލުން ކޮވިޑް ޓެސްޓެއް ހަދަން ވެސް ނަގަނީ 1000 ރުފިޔާ ކަމަށެވެ. އެއީ އަ ތަނުގައި ވަސީލަތްތައް ނެތުމުގެ ސަބަބުން އެހެންތަނަކުން އެ ޓެސްޓު ހަދަން ޖެހޭތީ ކަމަށް އެ ހޮސްޕިޓަލުން ބުނާ ކަމަށް ޒިޔާދު ވިދާޅުވިއެވެ.
މެމްބަރު ވިދާޅުވީ މިހުރިހާ ކަމެއް އެހެންދާއިރު، އިއްޔެވެސް 4 ޑްރޯން ރާއްޖެ ގެނެސްފައިވާ ކަމަށެވެ. މެމްބަރު ވިދާޅުވީ ފުރަތަމަ ކުރަންޖެހޭނީ ރައްޔިތުން ބޭނުންވާ އަސާސީ ކަންކަން ކަމަށާއި، ދެން ހުރި ކަންކަން ކުރާނީ އެއަށްފަހުކަމަށެވެ. މީގެއިތުރަށް މެމްބަރު ވަނީ ވީއައިއޭގެ އައުޓާމިނަލް ހުޅުމުގައި ހަވާ އަރުވައި ރެކޯޑު ހަދާފައިވާ ކަމަށްބުނެ އެކަމަށް ވެސް ވަރަށް ބޮޑަށް ފާޑުވިދާޅުވެފައެވެ.
