ގެދޮރުވެރިޔާ ސްކީމަށް ކުރިން ލައިފައިވާ ފޯމުތައް ބާތިލުކޮށް، އަލުން ފޯމުލުމުގެ ފުރުސަތު ހުރިހާ ދިވެހީންނަށް ހުޅުވާލައިފައިވާކަމަށް ބުނެ ދައުރުވަމުންދަނީ ސްކޭމް މެސެޖުތަކެއްކަމަށް ދިވެހި ފުލުހުންގެ ޚިދުމަތުން ބުނެފިއެވެ.
އެކަމުގެ މައުލޫމާތު ހިއްސާކުރަމުން ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުން ބުނީ، ސްކީމަށް ކުރިން ލައިފައިވާ ފޯމުތައް ބާތިލުކޮށް، އަލުން ފޯމުލުމުގެ ފުރުސަތު ހުރިހާ ދިވެހީންނަށް ހުޅުވާލައިފައިވާކަމަށް ބުނެ ދައުރުވަމުންދާ މެސެޖަކީ ނުރައްކާތެރި ސްކޭމް ލިންކެއް ކަމަށެވެ.
ފުލުހުން ބުނީ، ސްކޭމަރުން ސައްޙަނޫން ބޯހިޔާވަހިކަމުގެ އިޢުލާންތައް ބޭނުންކޮށްގެން ލިންކުތަކުގެ ޒަރިއްޔާއިން ޖީމެއިލް ލޮގިން އެކްސެސް ހޯދުމަށް މަސައްކަތް ކުރަމުންދާ ކަމަށެވެ. އަދި އެކަން ކުރަމުންދަނީ ފޯމުތައް ބާޠިލުވެފައިވާކަމަށް ނުވަތަ އެޕްލިކޭޝަންތައް އަލުން ހުޅުވާލިކަމަށް ބުނެއެވެ.
ފުލުހުން މައުލޫމާތު ދޭ ގޮތުގައި ޖީމެއިލް ކޮމްޕްރޮމައިޒްކޮށް އިންޓަނެޓް ބޭންކިންގ އަށް ބޭނުންވާ ބޭންކުގެ އޯޓީޕީ ހޯދައި، އެކައުންޓްގައިވާ ފައިސާ ނެގުމުގެ މައްސަލަތަކެއް ދަނީ ހުށަހެޅެމުންނެވެ.
އެހެންކަމުން އެކަންކަމަށް ސަމާލުވުމަށް ދިވެހި ފުލުހުންގެ ޚިދުމަތުގެ އެންޓި ސްކޭމް ސެންޓަރުން ދަނީ އިލްތިމާސް ކުރަމުންނެވެ.
ހަމައެއާއެކު، ގެދޮރުވެރިކަމާ ގުޅޭ މަސައްކަތްތަކުގެ ރަސްމީ މުއާމަލާތްތައް ހަމައެކަނި ކުރެވޭނީ ގެދޮރުވެރިން ޕޯޓަލް (gedhoruverin.gov.mv) އަދި ކަށަވަރުކޮށްފައިވާ .gov.mv ވެބްސައިޓްތަކުގައިކަން ހަނދާން ކުރުމަށް ފުލުހުން ވަނީ އިލްތިމާސް ކޮށްފައެވެ.
