އުއްތަމަ ފަނޑިޔާރު ޑރ. އަޙްމަދު ޢަބްދުﷲ ދީދީ މިޞްރުގެ ކައިރޯއަށް މިހާރު ކުރައްވަމުން ގެންދަވާ ރަސްމީ ދަތުރުފުޅުގައި، މިޞްރުގެ ޗީފް ޖަސްޓިސް ސަޢީދު މަރްޢީ އުމަރުއާ ބައްދަލުކުރައްވައިފިއެވެ.
މި ބައްދަލުވުމުގައި ޑެޕިއުޓީ ޗީފް ޖަސްޓިސް އޮފް ދަ ސުޕްރީމް ކޮންސްޓިޓިއުޝަނަލް ކޯޓު އޮފް އިޖިޕްޓް، އޮނަރަބަލް ޑރ. ޢާދިލް އުމަރު ޝަރީފް އާއި ދިވެހިރާއްޖޭގެ ސުޕްރީމް ކޯޓުގެ ފަނޑިޔާރު އޮނަރަބަލް އަލްއުސްތާޛު ޢަބްދުލްޣަނީ މުޙައްމަދު ބައިވެރިވެ ވަޑައިގެންނެވިއެވެ.
މި ބައްދަލުކުރެއްވުމުގައި ދިވެހިރާއްޖޭގެ ޢަދުލު އިންޞާފު ޤާއިމުކުރުމުގެ ބާރާއި މިޞްރުގެ ޖުޑިޝަރީއާ ދެމެދުގައި އެއްބާރުލުން ވަރުގަދަކޮށް ގުޅުންބަދަހިކުރުމާ ގުޅޭގޮތުން މަޝްވަރާކުރެއްވެވިއެވެ.
އެމަނިކުފާނު މިސްރަށް ވަޑައިގަތީ ޖުޑީޝަލް ސާވިސް ކޮމިޝަނުން އެމަނިކުފާނުގެ ސުލޫކީ މައްސަލައެއް ބަލަމުންދާ ދަނޑިވަޅެއްގައެވެ. އެ މައްސަލަ ބަލެމުގެ އިހްތިޔާރު ޖޭއެސްސީ އަށް ލިބިގެންނުވާ ކަމަށް ބުނެ ޑރ. ދީދީ ވަނީ ބަޔާނެއް ނެރެ އެ ކޮމިޝަނަށް ހާޒިރުވާން އުޒުރުވެރިވެ ވަޑައިގެންފައެވެ. ހަގީގަތް އޮޅޭ ގޮތަށް އުއްތަމަ ފަނޑިޔާރު ބަޔާން ނެރުއްވާފައިވާ ކަމަށް ބުނެ ޖޭއެސްސީއިން އެމަނިކުފާނުގެ ސުލޫކީ މައްސަލައެއް ބަލަން ވަނީ ނިންމާފައެވެ.
