މިއަހަރުގެ ސެޕްޓެމްބަރުގެ ނިޔަލަށް 326 މިލިއަން ޑޮލަރުގެ މުދާ އެކްސްޕޯޓް ކޮށްފައިވާކަމަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އާންމުކޮށްފައިވާ އެންމެ ފަހުގެ ތަފާސްހިސާބުތަކުން ދައްކައިފިއެވެ.
އެމްއެމްއޭގެ ތަފާސްހިސާބުތައް ދައްކާގޮތުން މި އަހަރުގެ ޖެނުއަރީ އިން ސެޕްޓެމްބަރުގެ ނިޔަލަށް ރާއްޖެއިން 323.6 މިލިއަން ޑޮލަރުގެ މުދާ އެކްސްޕޯޓް ކޮށްފައިވެއެވެ. މިއީ މިދިޔަ އަހަރުގެ މި މުއްދަތުގައި އެކްސްޕޯޓްކުރި މުދަލަށްވުރެ 39.6 މިލިއަން ޑޮލަރު އިތުރު އަދަދެކެވެ. އަދި 13.9 ޕަސެންޓް އިތުރުވުމެކެވެ. އެގޮތުން މިދިޔަ އަހަރުގެ މި މުއްދަތުގައި އެކްސްޕޯޓް ކޮށްފައިވަނީ 284 މިލިއަން ޑޮލަރުގެ މުދަލެވެ.
މި އަހަރުގެ އެކްސްޕޯޓްގެ ތެރެއިން 211 މިލިއަން ޑޮލަރަކީ ރި-އެކްސްޕޯޓެވެ. އެ ގޮތުން 167.8 މިލިއަން ޑޮލަރުގެ ޖެޓް ފިއުލް ރި-އެކްސްޕޯޓްކޮށްފައިވެ އެވެ.
މީގެ އިތުރުން 104.5 މިލިއަން ޑޮލަރުގެ މަހުގެ ބާވަތް އެކްސްޕޯޓްކޮށްފައިވެ އެވެ.
އެމްއެމްއޭގެ ތަފާސްހިސާބުތަކުން ދައްކާގޮތުގައި މިދިޔަ އަހަރާ އަޅާބަލާއިރު މި އަހަރުގެ ޖުލައި މަހުގެ ނިޔަލަށް ރާއްޖެއިން މުދާ އެކްސްޕޯޓުކުރި މިންވަރު ވަނީ 27 އިންސައްތަ އިތުރުވެފައެވެ. މި އިތުރުވުން އައިސްފައިވަނީ މައިގަނޑު ގޮތެއްގައި ރާއްޖޭގައި އުފައްދާ މުދާ ބޭރުކުރުން އިތުރުވެފައިވުމުގެ ސަބަބުންނެވެ. މީގެ ތެރޭގައި ޚާއްޞަކޮށް ގަނޑުކުރި ކަޅުބިލަމަހުގެ އެކްސްޕޯޓުން ލިބުނު އާމްދަނީ ފާހަގަކޮށްލެވެއެވެ.
ޖުމްލަ ގޮތެއްގައި ބަލާއިރު، 2025 ވަނަ އަހަރުގެ ފުރަތަމަ ބައިގައި ރާއްޖޭގެ އެކްސްޕޯޓުގެ ދާއިރާއަށް ވަނީ ފާހަގަކޮށްލެވޭ ކުރިއެރުމެއް ލިބިފައެވެ. ޚާއްޞަކޮށް ރާއްޖޭގައި އުފައްދާ މުދަލުގެ އެކްސްޕޯޓު އިތުރުވެފައިވުމަކީ އިޤްތިޞާދީ ގޮތުން ވަރަށް އެދެވޭ ކަމެކެވެ. މިއީ ރާއްޖޭގެ އުފެއްދުންތެރިކަން އިތުރުވެ، އިޤްތިޞާދީ ހަރަކާތްތައް ފުޅާވަމުން އަންނަކަމުގެ ހެއްކެކެވެ.
