ސްޓޭޓް ޓްރޭޑިންގ އޯގަނައިޒޭޝަން (އެސްޓީއޯ) އާއި ދުނިޔޭގެ މަޝްހޫރު ބްރޭންޑެއް ކަމުގައިވާ ހިޓާޗީއާ ދެމެދު އޮތް ޕަރޓްނަރޝިޕަށް 25 އަހަރު ފުރުމުގެ މުނާސަބާ، ކުލަގަދަ އަދި ވަރަށް ހާއްސަ ހަފްލާއެއްގައި ވަނީ ފާހަގަކުރެވިފައެވެ.
މި ދިގު މުއްދަތުގެ ގުޅުމަކީ ދިވެހިރާއްޖޭގެ ބާޒާރަށް އައިސްފައިވާ ހެޔޮ ބަދަލުތަކާއި، އާންމުންގެ ދިރިއުޅުމަށް ލިބިފައިވާ ލުއިފަސޭހަތަކުގެ ރަމްޒެކެވެ. މި މުނާސަބާ ފާހަގަކުރުމަށްޓަކައި 28 ނޮވެމްބަރު 2025 ވީ ހުކުރު ދުވަހުގެ ރޭ ބާސެލޯ ނަސަންދުރާގައި ބޭއްވުނު މި ހަފްލާއަކީ، މި ދެ ކުންފުނީގެ ގާތް ގުޅުމުގެ އަލިގަދަ ރަމްޒެކެވެ.
ހިޓާޗީ: އިތުބާރުގެ ބްރޭންޑެއް
ގަރުނަކަށް ވުރެ ގިނަ ދުވަހުގެ ތާރީޚެއް އޮތް ހިޓާޗީ ކުންފުންޏަކީ، ފެށުނީއްސުރެ ދުނިޔޭގެ ބާޒާރުގައި ނަންވިދަމުން އަންނަ އިތުބާރު ހިފޭ ކުންފުންޏެކެވެ. އެސްޓީއޯއިން ހިޓާޗީގެ އުފެއްދުންތައް ރާއްޖެއަށް ތަޢާރަފްކުރުމާއިއެކު، ދިވެހީންގެ މެދުގައިވެސް މި ބްރޭންޑުގެ އުފެއްދުންތަކަށް ވަނީ ބޮޑު މަގުބޫލުކަމާއި އިތުބާރެއް ލިބިފައެވެ.
މިއަދާ ހަމައަށްވެސް އެ އިތުބާރު ދަމަހައްޓަމުންދާއިރު، ޚާއްސަކޮށް ހިޓާޗީގެ އޭސީ ތަކާއި އައިސް އަލަމާރިތައް ފަދަ ޕްރޮޑަކްޓްތަކަކީ ގިނަބަޔެއްގެ ގެތަކުން ޖާގަ ހޯދާފައިވާ އަދި ދިގު މުއްދަތަށް ބޭނުންކުރެވޭ މޮޅު އުފެއްދުންތަކެއްގެ ގޮތުގައި ފާހަގަކުރެވެއެވެ. ރާއްޖޭގެ މޫސުމާއި ދިރިއުޅުމުގެ ވައްޓަފާޅިއަށް އެކަށޭނަ އުފެއްދުންތަކެއް ހިޓާޗީއިން ފޯރުކޮށްދެމުންދިއުމަކީ، މި ޕަރޓްނަރޝިޕް ކާމިޔާބުވުމުގެ އެއް ސިއްރެވެ.
ރަންޔޫބީލްގެ ހަފްލާގެ ޝަރަފްވެރި ބައިވެރިން
މި ހާއްސަ ހަފްލާގައި ދެ ކުންފުނީގެ އިސްވެރިންނާއި، ދެ ގައުމުގެ ގުޅުން ރަމްޒުކޮށްދޭ ޝަޚްސިއްޔަތުން ބައިވެރިވެވަޑައިގެންނެވިއެވެ. ހަފްލާގެ ޝަރަފްވެރި މެހެމާނެއްގެ ގޮތުގައި ބައިވެރިވެ ވަޑައިގެންނެވީ ޖަޕާނުން ރާއްޖެއަށް ކަނަޑައަޅުއްވާފައި ހުންނަވާ ސަފީރު އިޝިގާމީ ރުމިކޯއެވެ.
މީގެ އިތުރުން ހިޓާޗީ ކުންފުނީގެ މެނޭޖިންގް ޑިރެކްޓަރ ޔޮޝިޔޫކީ ބަންޑޯއާއި ކުންފުނީގެ އިތުރު ބޭފުޅުން ވަނީ ބައިވެރިވެވަޑައިގެންފައެވެ. އެސްޓީއޯގެ ފަރާތުން ޗެއަރމަން އާމިރު މަންސޫރު، ބޯޑު މެމްބަރުން، މެނޭޖިންގް ޑިރެކްޓަރ ޝިމާދު އިބްރާހިމް އަދި އެސްޓީއޯގެ ކުރީގެ ބައެއް އިސް ބޭފުޅުންވެސް މި ހަފްލާގައި ބައިވެރިވެވަޑައިގެންނެވިއެވެ. މި ބޭފުޅުންގެ ބައިވެރިވުމުން، މި ގުޅުމުގެ މުހިއްމުކަން ވަރަށް ބޮޑަށް ހާމަވެގެންދިޔައެވެ.
ޕަރޓްނަރޝިޕްގެ މުހިއްމުކަން ފާހަގަކުރުން
ހަފްލާގައި ވާހަކަދެއްކެވި ބޭފުޅުންގެ ތެރޭގައި ސަފީރު އިޝިގާމީ ރުމިކޯ، ހިޓާޗީގެ މެނޭޖިންގް ޑިރެކްޓަރ ޔޮޝިޔޫކީ ބަންޑޯ، އެސްޓީއޯގެ މެނޭޖިންގް ޑިރެކްޓަރ އިބްރާހިމް ޝިމާދު އަދި އެސްޓީއޯ ޖެނެރަލް ޓްރޭޑިންގްގެ ޑިރެކްޓަރ އިބްރާހިމް މިރްޒާޤް ހިމެނިވަޑައިގަންނަވައެވެ. އެ ބޭފުޅުންގެ ވާހަކަތަކުގައި، މި 25 އަހަރުވީ ގާތް ގުޅުން ފާހަގަކުރައްވައި، ހިޓާޗީ ބްރޭންޑާއިއެކު ރާއްޖޭގެ ބާޒާރަށް އައިސްފައިވާ ހެޔޮ ބަދަލުތަކާއި އާންމުންގެ ދިރިއުޅުމަށް ލިބުނު ލުއިފަސޭހަތަކުގެ މައްޗަށް އަލިއަޅުވައިލެއްވިއެވެ. އަދި މުސްތަޤްބަލަށް ރޭވިފައިވާ ކަންކަމާއި، ޓެކްނޮލޮޖީގެ އެހީގައި ދިވެހި ރައްޔިތުންނަށް އިތުރު ޚިދުމަތްތައް ފޯރުކޮށްދިނުމުގެ ޢަޒުމްވެސް އައުކުރެއްވިއެވެ.
އުފެއްދުންތައް ތަޢާރަފްކުރުމާއި ކަސްޓަމަރުންނަށް އިނާމު ދިނުން
މި ހަފްލާގައި، ރާއްޖޭގައި ވިއްކާ ހިޓާޗީ ބްރޭންޑްގެ އުފެއްދުންތަކުގެ ތެރެއިން ހޮވާލެވިފައިވާ ޕްރޮޑަކްޓްތައް ޑިސްޕްލޭ ކުރެވުނެވެ. މީގެ އިތުރުން، މި 25 އަހަރުވީ ޕަރޓްނަރޝިޕްގެ ތެރޭގައި އެންމެ ގިނައިން ހިޓާޗީ ޕްރޮޑަކްޓްތައް ބައްލަވައި ގެންނެވި 4 ކަސްޓަމަރެއްގެ ޚިދުމަތް އަގުވަޒަންކޮށް އެވޯޑް ދެވުނެވެ. މިކަމުން ދައްކުވައިދެނީ އެސްޓީއޯއިން ކަސްޓަމަރުންނަށް ދޭ އަހައްމިއްޔަތާއި، ހިޓާޗީއަށް އާންމުންގެ ހިތުގައި އޮތް އިތުބާރެވެ. އެންމެ ޚާއްސަ ކަމެއްގެ ގޮތުން، މި ހަފްލާގައި ހިޓާޗީއިން އަލަށް ތަޢާރަފްކުރި ’ހިޓާޗީ ނިއު އެއަރ‘ ރޭންޖްގެ ޕްރޮޑަކްޓްތައް ލޯންޗުކުރެވުނެވެ. މި އައު އުފެއްދުންތަކަކީ، ދިވެހިރާއްޖޭގެ މާހައުލަށް އެކަށީގެންވާ ގޮތަށް ތައްޔާރުކުރެވިފައިވާ، އެންމެ ފަހުގެ ޓެކްނޮލޮޖީގެ އުފެއްދުންތަކެކެވެ.
މުސްތަޤްބަލުގެ އުންމީދު
އެސްޓީއޯއާއި ހިޓާޗީގެ މި 25 އަހަރުވީ ޕަރޓްނަރޝިޕްގެ ރަންޔޫބީލް ފާހަގަކުރުމުގެ ހަފްލާއަކީ، ދިގު މުއްދަތުގެ ގުޅުމެއް ފާހަގަކުރެވިގެންދިޔަ މުހިއްމު އިވެންޓެކެވެ. މި ހަފްލާއަކީ، މި ދެ ކުންފުނި ދެމެދު އޮތް ގާތް ގުޅުން އިތުރަށް ހަރުދަނާކޮށް، މުސްތަޤްބަލުގައި މިފަދަ މުހިއްމު މަރުހަލާތަކާއި ކާމިޔާބީތައް ފާހަގަކުރުމުގެ އުންމީދު އާލާކުރި ފިޔަވަޅެކެވެ. މި ޕަރޓްނަރޝިޕްގެ އަމާޒަކީ، ދިވެހިރާއްޖޭގެ ރައްޔިތުންނަށް އެންމެ ފެންވަރު ރަނގަޅު އުފެއްދުންތަކާއި ޚިދުމަތްތައް ފޯރުކޮށްދިނުމުގައި ދެމިތިބުމެވެ. މި ގުޅުމުގެ ދަށުން ކުރިއަށް އޮތް ތަނުގައިވެސް އިތުރު ކާމިޔާބީތައް ހާސިލްކުރެވޭނެކަމަށް އުންމީދުކުރެވެއެވެ.
