ފަތުރުވެރިކަމުގެ ސިނާއަތުގައި ޝާމިލުވާ ފަރާތްތައް ބޭނުންވާ ގޮތަށް، ގާނޫނަށް އިސްލާހު ގެނައުމަކީ ވަރަށް މުހިއްމު ކަމެއް ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެމްބަރު އަދި ޕީޕަލްސް ނޭޝަނަލް ކޮންގްރެސް (ޕީއެންސީ)ގެ ޕީޖީ ލީޑަރު އިބްރާހިމް ފަލާހު ވިދާޅުވެއްޖެއެވެ.
ފަލާހު މިހެން ވިދާޅުވީ، ގާނޫނު ނަމްބަރު ދިވެހިރާއްޖޭގެ ޓޫރިޒަމާ ބެހޭ ގާނޫނުއަށް އިސްލާހު ގެނައުމުގެ ބިލަށް، އިގުތިސާދީ ކޮމިޓީން ދިރާސާކޮށް، ނިންމި ރިޕޯޓަށް ރައްޔިތުންގެ މަޖިލީހުގެ ތަޅުމުގައި ބަހުސްކުރައްވަމުންނެވެ.
މެމްބަރު ފަލާހު ވިދާޅުވީ، ޓޫރިޒަމާއި ބެހޭ ގާނޫނަށް ގެނެވޭ އިސްލާހުތަކަކީ ވަރަށް މުހިއްމު އިސްލާހުތަކެއް ކަމަށާއި، ޓޫރިޒަމަކީ، ރާއްޖޭގެ އިގުތިސާދުގެ މައި ބަދަ އަދި މައި ލޭނާރު ކަމަށެވެ.
ރާއްޖޭގެ އިގުތިސާދުގެ 90 އިންސައްތައަށް ވުރެ މަތިން އާމްދަނީ ހޯދައިދޭ ސިނާއަތަކީ ފަތުރުވެރިކަމުގެ ސިނާއަތް ކަމަށް ފާހަގަކުރައްވައި ފަލާހު ވިދާޅުވީ، އެހެންކަމުން، ރާއްޖޭގެ ކޮންމެ ސަރުކާރެއް އޮތްކަމުގައިވީނަމަވެސް، އިގުތިސާދީ ބަދަލުތަކާއިއެކު، ފަތުރުވެރިކަމުގެ ސިނާއަތްތަކަށް އަންނަން ޖެހޭ ބަދަލުތައް، ކަމާ ބެހޭ ފަރާތްތަކާއި، އެ ދާއިރާގައި ޝާމިލުވާ ފަރާތްތައް ބޭނުންވާ ގޮތަށް، ގާނޫނަށް އިސްލާހު ގެނައުމަކީ، ވަރަށް މުހިއްމު ކަމެއް ކަމަށެވެ.
ދުނިޔޭގެ އެހެން ގައުމުތަކުގެ މިސާލުތައް ފާހަގަކުރައްވަމުން ފަލާހު ވިދާޅުވީ، ކޮންމެ ގައުމެއްގައިވެސް އެ ގައުމަކަށް އާމްދަނީ މަތިން ލިބޭ ސިނާއަތްތައް ހުންނާނެ ކަމަށެވެ. މިގޮތުން، ސައުދީ އަރަބިއްޔާއަކީ، ތެލުން ބޮޑު އާމްދަނީ އެއް ހޯދައި ގައުމަކަށް ވެފައި، އެ ގައުމުން، ތެލާއި ބެހޭ ގާނޫނަށް ވަރަށް ގިނައިން އިސްލާޙު ގެންނާނެ ކަމަށެވެ. އެއީ، އެ އިރެއްގައި، ދުނިޔޭގެ ތެލުގެ ބާޒާރަށް އަންނަ ބައެއް ބަދަލުތަކާއި ގުޅިގެން ކަމަށާއި، އެކަންކަން ފާހަގަކުރެވޭނީ ސައުދީ އަރަބިއްޔާގެ ރައްޔިތުންގެ މަޖިލީސް ބަލާ ފަރާތްތަކަށް ކަމަށް ފަލާހު ވިދާޅުވިއެވެ. އެފަދަ ކަންކަން ނުބަލާނަމަ، އެކަންތައްތައް ފާހަގަ ނުކުރެވޭނެ ކަމަށްވެސް އެމަނިކުފާނު ފާހަގަކުރެއްވިއެވެ.
މެމްބަރު ފަލާހުގެ ވާހަކަފުޅު ނިންމާލައްވަމުން، ފަތުރުވެރިކަމާޢި ބެހޭ ގާނޫނަށް ގެނައުމަށް ހުށަހަޅައިފައިވާ އިސްލާހުތަކަށް ތާއީދުކުރައްވާ ކަމަށް ވިދާޅުވިއެވެ. މި އިސްލާހުތައް ފާސްވުމަކީ، ރާއްޖޭގެ އިގުތިސާދުގެ މައި ސިނާއަތް އިތުރަށް ހަރުދަނާކުރުމަށް އެޅޭނެ މުހިއްމު ފިޔަވަޅެއް ކަމަށް ޕީޖީ ލީޑަރު ޤަބޫލުކުރައްވައެވެ.
